1 Taakwe nikwakainda nako ape kwakabungana bantu banji. Kaambo kokuteeti tibalikwe zyokulya, Jesu wakaita basikwiiya bakwe kuteeti baze kulinguwe okubaambila kuteeti, 2 "Aaba bantu ndabamvwida mangʼeke kaambo kwamazuba otatwe tulilimwi, ape taakwe cokulya. 3 Kuteeti ndabaambila kuteegwa bapiluke kumaanda aabo enzala, balanetuka munzila kaambo bamwi bazwa kule."

4 Basikwiiya bakwe bakabuzya kuteeti, "Ino tulazijanayi zilyo muno munkanda zyokusanina bantu boonse aaba?"

5 Jesu wakababuzya kuteeti, "Ino kuli zinkwa zyongayi?"

Bakamutaba kuteeti, "Ciloba."

6 Mpoonyina Jesu wakaambila bantu kuteeti bakale ansi. Kuzwaawo wakabweza zinkwa ziliciloba, wakalumba Leza okuzikomoona. Mpoonyina wakapa basikwiiya bakwe kuteeti baabanye bantu, abo bakacita mboonyina mbubakaambilwa. 7 Balikujesi otuswi tuniini, Jesu naakamana kulumba wakaambila basikwiiya bakwe kuteeti ato batwaabanye bantu. 8,9 Boonse bakalya okukuta. Kwali bantu batakasike kuzyuulu zyone bakalya. Mpoonyina basikwiiya bakabwezelela zizuma ziliciloba zyezilyo zyakasyaala. Mpoonyina Jesu wakamwaisya bantu. 10 Mpoonya-mpoonya wakanjila mumugolo abasikwiiya bakwe okwiinka kubusena bwa Damanuta.

11 ✝ Bamwi Bafalisi bakeza kuli Jesu okutalika kukazyana anguwe. Mukuyanda kumuca, bakamukumbila kuteeti acite maleele kutondezya kuteeti uleenguzu zizwa kuli Leza.

12 ✝ Mpoonyina wakayeekesya loko mumoyo okuteeti, "Ino niinzi bantu bamazuba aano nebayandisya citondezyo camaleele? Nconzyo ndimwaambila kuteeti taakwe citondezyo cebaticitilwe."

13 Mpoonyina wakabasiya okupiluka mumugolo okuzubukila kutala limwi lyo lwizi.

14 Iino basikwiiya bakwe bakaluba kweeta cinkwa cikwene, banyamwide feela comwi mumugolo. 15 ✝ Mpoonyina Jesu wakabacenjezya kuteeti, "Amucenjele okumamela emimena* ya Bafalisi eya Mwami Helodi."

16 Mulicabo bakatalika kwaamboozyanya kuteeti, "Waamba namu kaambo tatukwe cinkwa."

17 Jesu walizi zibali kwaamba, mpoonyina wakababuzya kuteeti, "Ino niinzi nemwaamba nkani yokubula cinkwa? Aiino taakwe cemuzi naanga taakwe cemubwene? Ino mizeezo yenu ilalela na?" 18 ✝ Mulijesi menso ino niinzi tamuboni? Mulijesi matwi ino niinzi tamumvwi? Ino mwaluba 19 aalya nindakakomoona zinkwa zyosanwe kusanina bantu bali zyuulu zyosanwe? Ino mwakazuzya zizuma zyongayi zyezilyo zyakasyaala?

Bakamutaba kuteeti, "Zyali kumi ezyobile."

20 "Ino nindakakomoona zinkwa zili ciloba kusanina bantu bali zyuulu zyone mwakazuzya zizuma zyongayi zyezilyo zyakasyaala?"

Bakamutaba kuteeti, "Zyali ciloba."

21 Jesu wakateeti, "Aino tamuna mvwisisisya na?"

22 Jesu abasikwiiya bakwe nibakasika ku Betisaida, bamwi bantu bakeeta mwaalumi moofu kuli Jesu okumukumbila kuteeti amukume kuteegwa apone. 23 Jesu wakajatilila mwaalumi moofu kujanza okumugwisya mumuunzi. Naakamana kumubika mate mumenso wakamubika maanzaakwe okumubuzya kuteeti, "Ino kuli cobwene na?"

24 Ooyu mwaalumi wakalanga-langa okutaba kuteeti, "Iiyi ndibwene bantu, nekuteegwa baboneka mbuli zisamu ziyobweendeenda."

25 Ape Jesu wakamubika maanzaakwe amenso. Mpoonyina mwaalumi ooyu wakalangisisya mpoonyina menso aakwe akapona okutalika kubona kabotu. 26 Kuzwaawo Jesu wakamwaambila kuteeti ainke kungʼanda okumulailila kuteeti, "Utapilukili mumuunzi kuyaambila bantu zyacitika."

27 Mpoonyina Jesu abasikwiiya bakwe bakainka kumiinzi ilafwiifwi etaindi lye Sizeliya Filipi. Munzila wakababuzya kuteeti, "Ino bantu bandaamba kuteeti ndime ni?"

28 ✝ Bakamutaba kuteeti, "Bamwi baamba kuteeti ndiwe Joni Mubbabbatizi, bamwi baamba kuteeti, ndiwe Elija Musinsimi, bamwi baamba kuteeti, uli umwi wabasinsimi beciindi."

29 ✝ Mpoonyina wakababuzya kuteeti, "Ino nywebo mundaamba kuteeti ndime ni?"

Pita wakataba kuteeti, "Ndiwe Mesiya."

30 Mpoonyina Jesu wakabalailila kuteeti bataambili muntu naanga omwi zyakwe.

31 Mpoonyina Jesu wakatalika kwiisya basikwiiya bakwe kuteeti, "Mwanoo Muntu weelede kupenga loko okukakwa abamaalu, bapaizi basilutwe, abamayi bo Mulawo wa Leza. Uyoojaigwa kono kwaakwiinda mazuba otatwe uyoobuka.*" 32 Wakabasalazizya, mpoonyina Pita wakamutola kumbali okuyoomupatookela.* 33 Kono Jesu wakacebuka okulanga basikwiiya bakwe. Wakapatokela Pita kuteeti, "Zwaawa Satani! Mizeezo yako taiinsi ya Leza kono njobuntu!"

34 ✝ Mpoonyina Jesu wakaita bbunga lyabantu abasikwiiya bakwe okubaambila kuteeti, "Na kuli uyanda kundicilila, aliimye zyayanda, anyamune ciingano* cakwe okundicilila. 35 ✝ Iino kufumbwa uyanda kufutula buumi bwakwe, uyoobusweekelwa, kono kufumbwa usweekelwa buumi bwakwe kaambo kangu a Makani Mabotu, uyoobufutula. 36 Ino inga muntu wajana mpindu nzi kuteeti nyika yoonse yaba yakwe kono wasweekelwa buumi butamani? Taakwe! 37 Ino niinzi muntu canga wapa kuteegwa aboobuumi butamani ape? Taakwe! 38 Kufumbwa uulisenda akaambo kangu ezyendiisya muliino nako akati kabantu basimamambe ababi, awe Mwanoo Muntu uzoolisenda kaambo kakwe aakuza mubulemu bwa Isi abangelo basalala."