1 Aimwi Nsabata, Jesu wakanjila mu cikombelo ape. Oomo mwali mwaalumi wayuminide janza. 2 Bakamulangisisya kuyanda kubona na ulamuponya mu Nsabata kuteegwa bamujanine mulandu. 3 Mpoonyina Jesu wakaambila mwaalumi ooyu kuteeti, "Koza kunembo." 4 Mpoonyina wakababuzya kuteeti, "Ino ceecili Mulawo wesu cuuzumizya kucita mu Nsabata? Kucita cibotu na cibi? Kufutula buumi na kujaya?"

Taakwe nibakamutaba naanga comwi. 5 Jesu naakabalanga wakanyema o kuusa kaambo kokuyuma kwemyoyo yabo. Mpoonyina wakaambila mwaalumi ooyu kuteeti, "Olola janza lyako." Mpoonyina wakacita mboonyina namu, janza lyakapona. 6 Mpoonyina Bafalisi bakazwa mucikombelo okuyooswaanana abana Helodi kuyoopangana mbobanga bamujaya Jesu.

7 Kuzwaawo Jesu abasikwiiya bakwe bakainka ku lwizi lwa Galileya, mpoonyina mabungaabantu akabacilila. Bamwi bakazwa ku Galileya oku Judiya 8 oku Jelusalemu okucilalaanda ce Idumiya ecili kujwe lya Jolodani ecizingulikide mataindi omu Tayila o Sidoni. Bantu banji bakeza kuli Jesu kaambo bakamvwa zyaalikucita. 9 ✝Ali mabunga-mabunga mane Jesu wakaambila basikwiiya bakwe kuteeti bamubambile mugolo kuteegwa bantu batamusyaanikizyi. 10 Kaambo kokuteeti wakaponya bantu banji, boonse balikucisidwe bakalisyanikizya kuteegwa bamugume kuteeti baponisigwe. 11 Ape boonse bakanjidwe myuuya mibi bamubona, yalikubawisya kunembo lyakwe okoongolola kuteeti, "Uli Mwanaa Leza."

12 Jesu wakaambilisisya myuuya mibi kuteeti itamuzibisyi kubantu.

13 Mpoonyina Jesu wakainka acilundu okwiita baalumi mbaalikuyanda kuteeti baze kulinguwe. Bakeza kulinguwe, 14 mpoonyina wakasala fateni bali kumi abobile, okubaita kuteeti mbaapositola. Wakabaambila kuteegwa "Ndamusala kuteeti katulilimwi, mpoonyina ndizoomutuma kuyookambooka, 15 ape muzoba enguzu zyokutanda madimona."

16 Aaba bali kumi abobile mbaakasala kwali: Saimoni, Jesu ngwakauzika kuteegwa Pita, 17 Jemusi omuzyalwanyina Joni, bana ba Zebbediya, Jesu wakabauzika kuteegwa Bonajesi, kokuteeti "bantu bali mbuli muzumo", 18 Andulu, Filipo, Bbatolomeyo, Mateyo, Tomasi, Jemusi mwanaa Alifasi, Tediyasi, Saimoni uteegwa Sikulwanina Lwaanguluko, 19 o Judasi Isikaliyoti wakazoaba Jesu.

20 Mpoonyina Jesu wakainka kungʼanda kwaali kukala. Ape kwakabungana bantu banji cokuteeti mane Jesu abasikwiiya bakwe bakabula nako yokuteeti balye. 21 Bomukwasyi wakwe nibakamvwa namu, bakainka kuyoomujata kaambo balikwaamba kuteeti, "Wasondoka!"

22 ✝Bamwi bamayi bo Mulawo bakazwa ku Jelusalemu balikwaamba kuteeti, "Unjilidwe Bbelizabbuli, mwami wamadimona! Nguumupa nguzu zyokwaatanda."

23 Mpoonyina Jesu wakabaita okubaambila muzikozyanyo kateeti, "Ino Satani inga watanda buti Sataninyina? 24 Na cisi kacaanzeene mutubunga tulwaanisyanya mulicato cilasinyeka. 25 Ape kuteeti mukwasyi kawaanzeene mulicawo ulamwacooka. 26 Iino kuteeti bwami bwa Satani kabwaanzeene mutubunga tulwanisyanya, taakwe kobuya, kono bulamwacooka.

27 "Taakwe unga wanjila mungʼanda yo mwaalumi singuzu okumubbida zibya zyakwe, aati kumwanga pili. Mpoonyina naloobubbide.

28 "Nconzyo ndamwaambila kuteeti muntu inga wajatilwa kuzibi zyoonse zyanga wacita nebuba busampoozi boonse mbwangawaamba. 29 ✝Kono kufumbwa usampoola Muuya Uusalala tayoojatilwi, kaambo ulamulandu wokucita cibi citamani." 30 Jesu wakaamba namu kaambo bamwi bantu balikwaamba kuteeti, "Unjilidwe muuya mubi."

31 Mpoonyina banyina abazyalwanyina Jesu bakeza okwiima anze lye ngʼanda, okutuma muntu kuteetii amwiite. 32 Bantu banji balikede kabamuzingulukide Jesu, mpoonyina bakamwaambila kuteeti, "Bona! Banyoko abazyalwanyoko balaanze bayanda yebo."

33 Jesu wakataba kuteeti, "Ino bamama abazyalwama beni-beni mbaabali?" 34 Mpoonyina wakalanga bantu bakamuzingulukide okwaamba kuteeti, "Aaba mbabamama abazyalwama! 35 Kufumbwa ucita zyayanda Leza muzyalwama, mucizaangu, mbamama."