1 Jesu abasikwiiya bakwe nibakaswena afwiifwi o Jelusalemu, kumbali omuunzi wa Betifage owa Bbetaniya a Cilundu ca Oliva*, Jesu wakatuma bobile ali basikwiiya bakwe 2 kuteeti, "Kamuya kumuunzi ulaanembo. Muciyoosika feela, muyoojana mbongolo yaangidwe acisamu itana beleka. Mukayaangunune mpoonyina muyeete kuno. 3 Na umwi amubuzye kuteeti, ‘Ino niinzi nemucita namu?’ Mumwaambile kuteeti, ‘Mwami ulaiyanda. Kono ulaipilusya inawa.’"

4 Mpoonyina bakainka okuyoojana mbongolo munzila kayaangilidwe kumanjililo engʼanda. Nibali kuyaangununa, 5 bamwi balikwiimvwi aawo bakababuzya kuteeti, "Ino mucita nzi? Ino muyaangunwida nzi mbongolo?"

6 Bakabataba mboonyina mbwaakabaambilide Jesu. Mpoonyina aabo bantu bakabazumizya kuteeti baitole. 7 Bakayeeta kuli Jesu, okuyala zizwaato zyabo amunsana wayo, mpoonyina wakatanta fateni. 8 Bantu banji balikuyoobuyala zizwaato zyabo munzila bamwi kabatyola ntabi zyamalala mumyuunda okuziyala munzila. 9 ✝ Bantu bali kunembo lyakwe abali kuyoobumucilila musule, bakatalika koongoolola kuteeti, "Hosana!* Ulilelekedwe ooyo uza muzina lyo Mwami! 10 Bulilelekedwe Bwami buza bwa tata Deveti, sikale wesu. Hosana kuli uuli kujulu lyamajulu!"

11 Jesu wakanjila mu Jelusalemu okwiinka mulabba lye ngʼanda ya Leza, wakalanga-langa zintu zyoonse. Mukuteeti nako yaliinkide, wakainka ku Bbetaniya abasikwiiya bakwe bali kumi abobile.

12 Nibwakaca Jesu abasikwiiya bakwe kabayoobuzwa ku Bbetaniya, wakafwa nzala. 13 Aleele wakabona cisamu comukuyu cavuzyenye maani, mpoonyina wakainka kwateni kuyobona na cilizyede. Kono naakasika wakajana maani feela, kaambo nako yenkuyu tiyalina sika. 14 Jesu wakaambila cisamu kuteeti, "Kutakabi utakalye nkuyu zyako ape!"

Basikwiiya bakwe bakamumvwa caakaamba.

15 Nibakasika ku Jelusalemu, Jesu wakainka mulabba lye Ngʼanda ya Leza okutanda boonse bali kuula okuuzya. Wakapindamuna matafule aabasikupindula mali otubbula twabasikuuzya nkwilimba,* 16 ape taakwe unyamwide cintu ngwakazumizya kwiinda mulabba lye Ngʼanda ya Leza. 17 ✝ Mpoonyina wakaiisya bantu kuteeti, "Kulilembedwe mu Malembo kuteeti Leza wakateeti, ‘Ngʼanda yangu iyoitwa kuteeti ningʼanda yokukombela ya bantu bemisyobo yoonse munyika.’ Kono mwaisandula kuba ciyubilo cababbi!"

18 Bapaizi basilutwe abamayi bo Mulawo bakazimvwa zyakacitika, mpoonyina bakatalika kulangoola nzila yokuteeti bajaye Jesu. Balikumuyoowa kaambo wakomosezye bantu boonse ambwaisya.

19 Kujolezya Jesu abasikwiiya bakwe bakazwa mu Jelusalemu.

20 Mujunzoonza nibalikuyoobweenda munzila, bakabona ciya cisamu comukuyu kaciyumide kuzwa kumiyanda. 21 Pita wakayeeya zyakacitika, mpoonyina wakaambila Jesu kuteeti, "Omwiiyi, bona! Cisamu comukuyu ciwakafwiza cayuma!"

22 Mpoonyina Jesu wakabataba kuteeti, "Amusyome muli Leza! 23 ✝ Ndimusyomezya kuteeti kufumbwa waambila cilundu eeci kuteeti, ‘Nyukuka okulifusila mulwizi,’ ape kuteeti katazumboozyi mumoyo kono kasyoma kuteeti zyaamba zilacitika, ulacitilwa. 24 Kaambo keeci ndamwaambila kuteeti, mwanokomba okukumbila zintu, musyome kuteeti mwatambula kale, mpoonyina muyopegwa kufumbwa cimwakumbila. 25 ✝ Ape mwanookomba, mweelede kujatila zibi zyoonse zibakamubisizya bamwi kuteegwa uso uuli kujulu amujatile zibi zemwakacita. 26 Kono kuteeti na tamujatili bamwi, awe uso woku julu takomujatila milandu yenu."*

27 Ape Jesu abasikwiiya bakwe bakeza ku Jelusalemu. Jesu naalikuyoobweenda mulabba lye Ngʼanda ya Leza, bapaizi basilutwe, bamayi bo Mulawo abamaalu bakamuzida 28 okumubuzya kuteeti, "Ninguzu nzi zyobelesya kucita zintu eezi? Ngwani wakakupa zizyo?"

29 Jesu wakabataba kuteeti, "Pili ndimubuzye mubuzyo omwi, mwanditaba, ndilamwaambila nguzu zyondibelesya kucita zintu eezi. 30 Ino nguzu zya Joni zyokubbabbatizya zyakazwida kujulu na kubantu? Amunditabe!"

31 Bakatalika kukazyanya mulicabo kuteeti, "Ino tulataba buti? Twataba kuteeti, ‘Zyakazwa kuli Leza,’ ulaamba kuteeti, ‘Ino niinzi nimwatakamusyoma Joni?’ 32 Ape inga twaamba buti kuteeti, ‘Zizwa kubantu’?" Balikuyoowa dwi lyabantu kaambo boonse balikusyoma kuteeti Joni wali musinsimi wenconzyo. 33 Bakamutaba kuteeti, "Tatuzi."

Mpoonyina Jesu wakabaambila kuteeti, "Ano amebo tandikomwaambila nguzu zyondibelesya kucita zintu eezi."