Marcos 8

Jesu Wasanina Bantu Bali Zyuulu Zyone

1 Taakwe nikwakainda nako ape kwakabungana bantu banji. Kaambo kokuteeti tibalikwe zyokulya, Jesu wakaita basikwiiya bakwe kuteeti baze kulinguwe okubaambila kuteeti, 2 "Aaba bantu ndabamvwida mangʼeke kaambo kwamazuba otatwe tulilimwi, ape taakwe cokulya. 3 Kuteeti ndabaambila kuteegwa bapiluke kumaanda aabo enzala, balanetuka munzila kaambo bamwi bazwa kule."

4 Basikwiiya bakwe bakabuzya kuteeti, "Ino tulazijanayi zilyo muno munkanda zyokusanina bantu boonse aaba?"

5 Jesu wakababuzya kuteeti, "Ino kuli zinkwa zyongayi?"

Bakamutaba kuteeti, "Ciloba."

6 Mpoonyina Jesu wakaambila bantu kuteeti bakale ansi. Kuzwaawo wakabweza zinkwa ziliciloba, wakalumba Leza okuzikomoona. Mpoonyina wakapa basikwiiya bakwe kuteeti baabanye bantu, abo bakacita mboonyina mbubakaambilwa. 7 Balikujesi otuswi tuniini, Jesu naakamana kulumba wakaambila basikwiiya bakwe kuteeti ato batwaabanye bantu. 8,9 Boonse bakalya okukuta. Kwali bantu batakasike kuzyuulu zyone bakalya. Mpoonyina basikwiiya bakabwezelela zizuma ziliciloba zyezilyo zyakasyaala. Mpoonyina Jesu wakamwaisya bantu. 10 Mpoonya-mpoonya wakanjila mumugolo abasikwiiya bakwe okwiinka kubusena bwa Damanuta.

Bafalisi Bayanda Citondezyo Camaleele

11 ✝ 8:11 Mateyo 12:38; Luka 11:16. Bamwi Bafalisi bakeza kuli Jesu okutalika kukazyana anguwe. Mukuyanda kumuca, bakamukumbila kuteeti acite maleele kutondezya kuteeti uleenguzu zizwa kuli Leza.

12 ✝ 8:12 Mateyo 12:39; Luka 11:29. Mpoonyina wakayeekesya loko mumoyo okuteeti, "Ino niinzi bantu bamazuba aano nebayandisya citondezyo camaleele? Nconzyo ndimwaambila kuteeti taakwe citondezyo cebaticitilwe."

13 Mpoonyina wakabasiya okupiluka mumugolo okuzubukila kutala limwi lyo lwizi.

Mimena ya Bafalisi eya Mwami Helodi

14 Iino basikwiiya bakwe bakaluba kweeta cinkwa cikwene, banyamwide feela comwi mumugolo. 15 ✝8:15 Luka 12:1. Mpoonyina Jesu wakabacenjezya kuteeti, "Amucenjele okumamela emimena*8:15 Mumena musyobo we ngula iibelesegwa kufutumusya busu bokupangisya cinkwa okukondozya bukoko ezinywigwa zikola zimwi. Ma Juda bakalikubelesya bbala lyo "mumena" mumaambilambali apandulula kweembululwa munzila mbotu aibi. Jesu naakalibelesya awa walikwaamba Bafalisi o Helodi mbubalikuyembulula bantu okutasyoma kwabo. ya Bafalisi eya Mwami Helodi."

16 Mulicabo bakatalika kwaamboozyanya kuteeti, "Waamba namu kaambo tatukwe cinkwa."

17 Jesu walizi zibali kwaamba, mpoonyina wakababuzya kuteeti, "Ino niinzi nemwaamba nkani yokubula cinkwa? Aiino taakwe cemuzi naanga taakwe cemubwene? Ino mizeezo yenu ilalela na?" 18 ✝8:18 Jelemiya 5:21; Ezekelo 12:2; Maako 4:12. Mulijesi menso ino niinzi tamuboni? Mulijesi matwi ino niinzi tamumvwi? Ino mwaluba 19 aalya nindakakomoona zinkwa zyosanwe kusanina bantu bali zyuulu zyosanwe? Ino mwakazuzya zizuma zyongayi zyezilyo zyakasyaala?

Bakamutaba kuteeti, "Zyali kumi ezyobile."

20 "Ino nindakakomoona zinkwa zili ciloba kusanina bantu bali zyuulu zyone mwakazuzya zizuma zyongayi zyezilyo zyakasyaala?"

Bakamutaba kuteeti, "Zyali ciloba."

21 Jesu wakateeti, "Aino tamuna mvwisisisya na?"

Jesu Waponya Moofu ku Betisaida

22 Jesu abasikwiiya bakwe nibakasika ku Betisaida, bamwi bantu bakeeta mwaalumi moofu kuli Jesu okumukumbila kuteeti amukume kuteegwa apone. 23 Jesu wakajatilila mwaalumi moofu kujanza okumugwisya mumuunzi. Naakamana kumubika mate mumenso wakamubika maanzaakwe okumubuzya kuteeti, "Ino kuli cobwene na?"

24 Ooyu mwaalumi wakalanga-langa okutaba kuteeti, "Iiyi ndibwene bantu, nekuteegwa baboneka mbuli zisamu ziyobweendeenda."

25 Ape Jesu wakamubika maanzaakwe amenso. Mpoonyina mwaalumi ooyu wakalangisisya mpoonyina menso aakwe akapona okutalika kubona kabotu. 26 Kuzwaawo Jesu wakamwaambila kuteeti ainke kungʼanda okumulailila kuteeti, "Utapilukili mumuunzi kuyaambila bantu zyacitika."

Pita Waamba Kuteeti Jesu ngo Mesiya

27 Mpoonyina Jesu abasikwiiya bakwe bakainka kumiinzi ilafwiifwi etaindi lye Sizeliya Filipi. Munzila wakababuzya kuteeti, "Ino bantu bandaamba kuteeti ndime ni?"

28 ✝ 8:28 Maako 6:14-15; Luka 9:7-8. Bakamutaba kuteeti, "Bamwi baamba kuteeti ndiwe Joni Mubbabbatizi, bamwi baamba kuteeti, ndiwe Elija Musinsimi, bamwi baamba kuteeti, uli umwi wabasinsimi beciindi."

29 ✝ 8:29 Joni 6:68-69. Mpoonyina wakababuzya kuteeti, "Ino nywebo mundaamba kuteeti ndime ni?"

Pita wakataba kuteeti, "Ndiwe Mesiya."

30 Mpoonyina Jesu wakabalailila kuteeti bataambili muntu naanga omwi zyakwe.

Jesu Waamba Zyolufu Okupenzegwa Kwakwe

31 Mpoonyina Jesu wakatalika kwiisya basikwiiya bakwe kuteeti, "Mwanoo Muntu weelede kupenga loko okukakwa abamaalu, bapaizi basilutwe, abamayi bo Mulawo wa Leza. Uyoojaigwa kono kwaakwiinda mazuba otatwe uyoobuka.*8:31 Bajuda bo balikubala kufumbwa nako mubuzuba mbulikuteeti mbuzuba bukwene. Buzuba mbwaakafwa Jesu bwakabalwa kuteeti mbubwali bokusaanguna. Buzuba buzwide mbwaakakala mucuumbwe bwakabalwa kuteeti mbwabili. Cibela cobuzuba katana kubuka kuzwa kubafu cakabalwa kuteeti mbuzuba bwatatu. " 32 Wakabasalazizya, mpoonyina Pita wakamutola kumbali okuyoomupatookela.*8:32 Bajuda balikuyeeyela kuteeti Mesiya wabo uyooba mwami mupati utizozunde mbebalwana abo boonse. Takwe nibalikumuyeeyela kuteeti uzopenga okufwa. 33 Kono Jesu wakacebuka okulanga basikwiiya bakwe. Wakapatokela Pita kuteeti, "Zwaawa Satani! Mizeezo yako taiinsi ya Leza kono njobuntu!"

34 ✝ 8:34 Mateyo 10:38; Luka 14:27. Mpoonyina Jesu wakaita bbunga lyabantu abasikwiiya bakwe okubaambila kuteeti, "Na kuli uyanda kundicilila, aliimye zyayanda, anyamune ciingano*8:34 Muciindi ca Jesu, muntu waatulwa kuteeti akankaminwe aciingano walikusungilizigwa kucinyamuna. Wali kucinyamuna paka mane kubusena kobayanda kuyomukankamina alicico. Jesu awa walikupandulula kuteeti kufumbwa muntu uyanda kuba mucilili wakwe weelede kulibambila kupenga okufwa kuteegwa amucilile. cakwe okundicilila. 35 ✝8:35 Mateyo 10:39; Luka 17:33; Joni 12:25. Iino kufumbwa uyanda kufutula buumi bwakwe, uyoobusweekelwa, kono kufumbwa usweekelwa buumi bwakwe kaambo kangu a Makani Mabotu, uyoobufutula. 36 Ino inga muntu wajana mpindu nzi kuteeti nyika yoonse yaba yakwe kono wasweekelwa buumi butamani? Taakwe! 37 Ino niinzi muntu canga wapa kuteegwa aboobuumi butamani ape? Taakwe! 38 Kufumbwa uulisenda akaambo kangu ezyendiisya muliino nako akati kabantu basimamambe ababi, awe Mwanoo Muntu uzoolisenda kaambo kakwe aakuza mubulemu bwa Isi abangelo basalala."