1 ✝ Buzuba bwa Pentekositi* nibwakasika basyomi boonse babungene mucibaka comwi. 2 Mpoonya-mpoonya kujulu kwakamvwika kuvuuma mbuli guwo pati, kwakazuzya cibaka coonse cibakakede mwateni. 3 Mpoonyina bakabona zyalikulibonyaanga malimi emililo aayo akazoosabalangana okukala aluumwi oumwi wabo.Malimi ee Mililo Mubuzuba bwe Pentekositi 4 Kumane, boonse bakazula o Muuya Uusalala, okutalika kwamboola mumisyobo iisiyene-siyene kweendelana o Muuya Uusalala mbuwakabazumizya.

5 Aleeyo nako, kwakali Majuda balikukomba Leza balikuzwa muzisi zisiyene-siyene nyika yoonse mbwiizulwa bakali kukala mu Jelusalemu. 6 Nibakamvwa coongo eeci, bbunga pati lyabantu lyakabungana. Bakalyangana okukomokwa kaambo bakamvwa umwi oumwi wabasikwiiya ba Jesu kaamboola mumusyobo waumwi oumwi waabo babungene. 7 Kabakomokedwe loko bakateeti, "Amulange! Tiinsi boonse aaba baamboola mbana Galilelya na? 8 Ino cilibuti kuteeti toonse tulibamvwide kabaamboola mumusyobo woumwi oumwi wesu? 9 Aano tuliboku Patiya, Midiya oku Elamu, ku Mesopotamiya, Judiya, Kapadosiya, oku Pontasi ape oku Eziya, 10 oku Filigiya oku Pamfiliya, mane ku Ijipiti kuyoosika omu zilalaanda zya Libbiya afwiifwi o Sailini. Mane tobamwi tuzwa ku Loma, 11 boonse Majuda a Bamasi bakasandulwa kweetwa mubukombi bwe Cijuda, ape tobamwi tuzwa ku Kileti oku Alebbiya, kono toonse tulibamvwide kabaamboola mumisyobo yesu kujatikizya zintu zipati zyaacita Leza." 12 Boonse kabakomokedwe okulyangana, bakazumanana kubuzyanya kuteeti, "Ino eeci caamba nzi?"

13 Kono bamwi mubbunga bakafubaazika basyomi kabateeti, "Aaba bantu balikoledwe!"

14 Mpoonyina Pita antoomwi abaapositola bali kumi aomwi bakanyamuka. Amane Pita wakatalika kwaamboola kubbunga ataleejwi lyakwe kateeti, "No Majuda ma, andinywe noonse nomukala mu Jelusalemu, amundiswiilizye ndimupandulwide cecaambeeci. 15 Aaba bantu tabakoledwe mbuli mbomuyeeya. Ino inga bakolwa buti kucili kuseni? Iino ninako yewoola lyefuka. 16 Kono eeci cemubwene cecico cakaambwa omusinsimi Joweli,

17 ✝ Leza wakateeti, ‘Kumazuba aamamanino,

ndiyootila Muuya wangu kubantu boonse.

Mpoonyina bana benu basyimani abasimbi bayoosinsima.

Bakubusyi bayoobona zilengaano,

abo madaala bayoolota ziloto.

18 Mumazuba aayo, ndiyootila Muuya wangu okubabelesi bangu boonse baalumi abanakazi, mpoonyina bayoosinsima.

19 Ndiyoocita zikomosya kujulu ezitondezyo zyamaleele aano ansi.

Kunooli gazi, mulilo a mayoba oobusi.

20 Izuba liyoosiya,

awo mweezi uyoosalala mbuli gazi.

Ziyoocitika buzuba bo Mwami bupati ape bobulemu kabutanaza.

21 Mpoonyina kufumbwa wiita Mwami kuteegwa amugwasye uyoofutulwa.’"

22 Mpoonyina Pita wakazumanana kateeti, "Nobana Izilaili amuswiilizye majwaaya! Jesu woku Nazaleta, wali mwaalumi Leza ngwaakatuma kulindinywe. Eeci Leza wakacitondezya mumisebezi mipati, maleele ape ezitondezyo zyaakacita kwiindila muli Jesu. Nywebo lwenu mulizizi eezi kaambo zyakacitikila akati kenu. 23 ✝ Ooyu Jesu wakaabwa kono Leza walizi kuteeti eeci ciyoocitika kaambo walizikanzide kale ciindi. Mwakamujaya kwiindila mukuzumizya baalumi basizibi kuteeti bamukankamine aciingano. 24 ✝ Kono Leza wakamubusya kuzwa kulufu, wakamulukulula kuzwa mukucisa kolufu kaambo taakwe nicalikukonzeka kuteeti abe mwaange wolufu. 25 ✝ Tulicizi eeci kuteeti cenconzyo kaambo Deveti wakaamba fateni aalinguwe kateeti,

‘Ndakabona Mwami kali kunembo lyangu nako yoonse.

Kaambo kokuteeti ulaafwiifwi amebo tandiyoopenzegwi.

26 Kaambo keeci moyo wangu uliboteledwe,

amajwaangu ngokusekelela.

Nekuteegwa mubube bwangu ndilimuntu feela,

kono ndinookede okulangila,

27 kaambo toyoondilekelezyi munyika yabafu.

Ape toyoocizumizyi kuteeti Uusalala wako akabole mucuumbwe.

28 Wanditondezya nzila zitola kubuumi,

ape uyoondibotezya loko nako njonoolaandime.’"

29 Pita wakazwidaanembo okuteeti, "Nobazyalwama, ndiyanda kuteeti mumvwisisisye! Deveti sikale wesu taakwe naalikulyaamba lwakwe naakaamba aaya majwi ngindaamba, kaambo wakafwa okuzikwa, ecuumbwe cakwe kocili akati kesu kusikila sunu. 30 ✝ Kono wali musinsimi, ape walizi kuteegwa Leza wakasyomezya okukonka kuteeti umwi wolunyungu lwa Deveti uyookala acibbula cobwami bwa Deveti. 31 Deveti wakazibona zintu Leza zyaalikuyanda kucita kunembo, mpoonyina wakaamba kujatikizya kubuka kwa Mesiya kuteeti,

‘Taakwe naakalekelezegwa munyika yabafu,

naanga mubili wakwe kubola.’

32 Leza wakabusya ooyu Jesu kuzwa kubafu ape toonse tulibakamboni beeci. 33 Mpoonyina Leza wakamusumpula ejanza lyakwe lyolulyo.* Mpoonyina Leza Isi wakamupa Muuya Uusalala mbuli mbwaakasyomezya. Iino Jesu watila ooyu Muuya Uusalala alindiswe mbuli mbomubona okumvwa. 34 ✝ Ede Deveti taakwe naakainka kujulu, kono we lwakwe wakateeti,

‘Mwami wakaambila Mwami wangu kuteeti

kala kubbazu lyolulyo lwangu lyobulemu 35 kusikila mane ndibike basinkondonyoko kunsi ezituta zyako*.’"

36 Mpoonyina mukumanizya Pita wakateeti, "Iino kaambo keeci, nobana Izilaili noonse muzibe nconzyo kuteeti ooyu Jesu ngubakakankamina aciingano ngonguwe Leza ngwaakabika kuteeti abe Mwami ape ngo Mesiya!"

37 Iino bantu nibakamvwa namu, bakayaswa mumyoyo yabo, mpoonyina bakabuzya Pita abamwi maapositolanyina kuteeti, "Nobazyalwama, ino tucite buti?"

38 Pita wakateeti, "Umwi oumwi eempwe kuzibi zyakwe okubbabbatizigwa muzina lya Jesu Mesiya kuteeti zibi zyeenu zijatilwe. Kuzwaawo mulatambula Muuya Uusalala, cipego cizwa kuli Leza. 39 Amucite namu kaambo eeci cisyomezyo cicenu abana benu, aabo balikule boonse. Nconzyo cisyomezyo ca boonse mbaita kulinguwe Mwami Leza wesu."

40 Mpoonyina Pita wakazwidaanembo kukambooka okukombelezya bantu kateeti, "Amulifutule lwenu kuzwa kucisubulo ciza alaaba bantu basimucitazibi!" 41 Mpoonyina aabo bakasyoma zyakaamba Pita bakabbabbatizigwa. Mubuzuba oobo bakayungizigwa kumbungano batikasike zyuulu zyotatwe. 42 Basyomi boonse bakalyaaba kuziisyo zyabaapositola okukuswaanana okukulya mulalilo ape okukukomba.

43 Mpoonyina Leza wakacita zikomosya ezitondezyo zyamaleele zinji kwiindila mubaapositola, mane bantu boonse bakayoowa okukomokwa. 44 ✝ Basyomi boonse bakazumanana kubungana antoomwi mucibaka comwi okwaabana zyoonse zibakajesi. 45 Bakauzya lubono lwabo okwaabana mali abasyomi batalikwe. 46 Buzuba o buzuba balikuswaangana okukomba antoomwi mulabba lye Ngʼanda ya Leza. Ape balikuswaangana omumaanda aabo okwaabana zilyo zyabo kababoteledwe okulibombya mumyoyo yabo, 47 kumwi kabalumbaizya Leza okubotezya bantu boonse. Ape buzuba o buzuba Mwami walikuyungizizya kumbunga yabo aabo balikufutulwa.