Misebezi ya Baapositola 23

1 Paulu wakabalangisisya Benkuta Mpati ya Majuda okuteeti, "Nobazyalwama! Sizumboozyi mumoyo wangu obuumi mbundapona kuli Leza kusika sunu." 2 Mpoonyina Mupaizi Mupati wezina lya Ananiyasi wakalailila bali afwiifwi o Paulu kuteeti baume Paulu kumulomo. 3 ✝23:3 Mateyo 23:27-28. Mpoonyina Paulu wakateeti, "Yebo oosikuupaupa amenso*23:3 "Kuupaupa amenso" aawa maambilambali okuteeti "bwaanda bwalambwa kutuba" mu Cigiliki. , Leza ulakuuma ayibo! Ukede aawo kundaatula kweelana o Mulawo kono ndiwenya utyola Mulawo kwiindila mukwaambila bantu kuteeti banduume!"

4 Aabo bali afwiifwi o Paulu bakateeti, "Yebo! Utukila Mupaizi Mupati wa Leza."

5 ✝ 23:5 Kulonga 22:28. Paulu wakataba kuteeti, "Nobazyalwama, tindalizi kuteeti Mupaizi Mupati. Malembo aamba kuteeti, ‘Utaambooli zibi amusololi wa bantu bako.’"

6 ✝ 23:6 Misebezi 26:5; Bafilipi 3:5. Iino Paulu naakabona kuteeti mu Nkuta Mpati eeyi bamwi bali ba Saduki*23:6 Basaduki kali kabunga ka Majuda kalikucilizya kabotu-kabotu Mulawo wakalembwa o Mozesi kono taakwe nikali kusyoma mukubuka kwabafu, omubangelo naanga mumyuuya, cicali kubaindanya kutubunga tumwi twa Majuda tuli mbuli Mafalisi. Balikusyoma kuteeti mabbuku osanwe okusaanguna Mucizuminano Ceciindi ngemajwi feela aa Leza enconzyo. Balivubide ape balibayumu kutunzanyu. bamwi bali Bafalisi wakoongolola kateeti, "Nobazyalwama, ndili Mufalisi, mwanaa Bafalisi*23:6 Mafalisi kali kabunga ka Majuda kalikusyoma kuteeti Bbaibbo ye Cihibbulu yoonse (Cizuminano cesu Ceciindi) nga majwi aa Leza. Balikusyoma kuteeti kucilizya Mulawo wa Leza cintu cipati loko. Balikuyungizizya emilawo imbi otunsiyansiya kuteegwa bantu kabatakonzezyi limwi kutyola Mulawo wa Leza.. Ndiimvwi aano okwaatulwa kaambo kobulangizi bokubuka kuzwa kubafu!"

7 Naakaamba feela namu, Mafalisi aba Saduki bakatalika kukazyana. Mpoonyina Nkuta yakaanzana, 8 ✝23:8 Mateyo 22:23; Maako 12:18; Luka 20:27.kaambo Basaduki tabazumini kuteeti bantu bayoobuka kuzwa kubafu ape tabasyomi kuteeti kuli bangelo na muuya, kono bo Mafalisi balasyoma muli eezi zyotatwe zyoonse. 9 Kuyoba kwakaindilizya mpoonyina bamwi bamayi bo Mulawo balikuzulilwa kukabunga ka Mafalisi bakaima okukazya loko kabateeti, "Taakwe cibi citwajana mumwaalumi ooyu. Ino na kuteeti muuya na mungelo wamwaamboozya?"

10 Kukazyanya nikwakakomena, mweendelezi mupati wabasilumamba wakazooyoowa kuteeti bantu inga bamukwamoona muzipanzi panzi Paulu. Mpoonyina wakaambila basilumamba kuteeti bainke mubantu oomo okumubweza Paulu kuteegwa bamutole ooko kukala basilumamba.

11 Aayo masiku ngoonyina, Mwami wakeza okwiima afwiifwi o Paulu okuteeti, "Utayoowi! Mboonyina mbuwapa bumboni alindime mu Jelusalemu, oku Loma weelede kuyoocita mboonyina namu."

Makanze Ookujaya Paulu

12 Nibwakaca bamwi Majuda bakaswaangana okukanza kujaya Paulu. Bakakonkezya kuteeti tabakoolya naanga kunywa aati bamujaye Paulu. 13 Bakayeeya kucita namu balikwiinda makumi one. 14 Mpoonyina bakainka kubapaizi basilutwe abamaalu okuteeti, "Swebo twakonkezya kuteeti tatukoolya na kunywa cintu mane Paulu tumujaye. 15 Iino nywebo abe Nkutanyoko, amutume majwi ku mweendelezi mupati wabasilumamba ba Maloma, mucite mbuli kuteeti kulizyemuyanda kumvwisisisya zijatikizya Paulu. Tulilibambilide kumujaya katana sika afwiifwi ecibaka cino."

16 Kono mujwa wa Paulu wakaamvwa makanze aaya mpoonyina wakainka kukala basilumamba okuyaambila Paulu. 17 Mpoonyina Paulu wakaita umwi wa beendelezi babasilumamba okumwaambila kuteeti, "Mutole ooyu musyimani kumweendelezi mupati wabasilumamba, kuli zyajesi zyayanda kwaamba." 18 Mpoonyina ooyu mweendelezi wabasilumamba wakamutola kumweendelezi mupati okuteeti, "Sintolongo Paulu walindiitide okundikumbila kuteeti ndeete ooyu musyimani kulindiwe kaambo kulizyajesi zyayanda kukwaambila."

19 Mweendelezi mupati wabasilumamba wakamujata kujanza okumukwelela ambali kubakakuba bobile feela okuteeti kulinguwe, "Ino niinzi coyanda kundaambila?"

20 Wakateeti, "Beendelezi Majuda bamvwana kuteeti junza bazookukumbile kuteeti uzootole Paulu ku Benkuta Mpati mbulikuteeti kuli zyebayanda kuzibisisya amakani akwe. 21 Utakazizumini eezi zintu kaambo kuli baalumi bainda makumi one bayuba kulindila kuteeti bamujaye. Bakakonkezya kuteeti tabakoolya naanga kunywa cintu kusikila mane bamujaye Paulu. Iino balilibambilide, balindila feela muzeezo wako."

22 Mpoonyina mweendelezi mupati wabasilumamba wakaambila ooyu musyimani kuteeti, "Eeyi nkani utaambili umbi nee." Mpoonyina wakamuleka kuteegwa ainke.

Paulu Watolwa ku Muleli Felikisi

23 Mpoonyina mupati wabasilumamba wakaita beendelezi babasilumamba bobile okubaambila kuteeti, "Amubambe basilumamba bali myanda yobile, bainke ku Sizeliya antoomwi abasimbizi bali makumi aliciloba ape aba simasumo bali myanda yobile. Mulibambile kunyamuka sunu masiku awoola lyafuka. 24 Mumubambile mbizi anguwe Paulu kuteegwa atolwe kabotu kumuleli Felikisi*23:24 Felekisi wali mweendelezi wecooko ca Judiya kutalikila mu 52 kusikila mu 60 AD (myaka kuzwa Mwami naakazyalwa). Walimuzike womukwasyi wo Muleli Mupati we Loma, mpoonyina wakazoolukululwa. Mubweendelezi bwakwe wazizilwe kubija moyo ku Majuda basikulwanina lwaanguluko.." 25 Mpoonyina mupati wabasilumamba wakalemba lugwalo luteeti,

26 "Ndime Kolodiyasi Lisiyasi, ndilembela ndinwe nomulemekwa, nobaleli ba Felikisi. Ndamulumelisya. 27 Ooyu mwaalumi Majuda bakamujata, kwasyeede aniini kuteeti bamujaye. Iino nindakaziba kuteeti muna Loma, ndakainka abasilumamba kuyoomuvuna. 28 Mukuyandisisya kuziba mulandu ngubakamupa ooyu muntu, ndakamutola ku Nkuta Mpati ya Majuda. 29 Ndakaakujana kuteeti ooyu muntu taakwe mulandu wokuteeti mane ajayigwe na kusowelwa muntolongo, balikumutamizya mumibuzyo kujatikizya emilawo yabo. 30 Nindakazoambilwa kuteeti kuli makanze ookumujaya, cokufwambaana ndakamutuma kulindinwe okwaambila basikumutamizya kuteeti baze bazoomwaambile zyebatamizya Paulu."

31 Mpoonyina basilumamba kweelana ambobakalaililwa, bakabweza Paulu okumutola kutaindi pati lya Antipatilisi amasiku. 32 Buzuba bwakacilila basilumamba baansi bakapiluka kubalikukala, mpoonyina basimbizi bakazumanana o Paulu 33 okumutola ku Sizaliya, kubakaakupa muleli lugwalo okusiya Paulu mumaanzaakwe. 34 Muleli wakalubala lugwalo okubuzya Paulu kuteeti, "Ino uzwa kucooko nzi?" Paulu wakataba kuteeti, "Ndizwa ku Silisiya." 35 Muleli wakamwaambila kuteeti, "Ndizoumvwa mulandu wako basikukutamizya bazooza." Mpoonyina wakalailila kuteeti bamumamele okumubika mungʼanda yobwami njakasiya mwami Helodi.