1 ✝ Iino bamwi baalumi bakazwa ku Judiya kuza ku Antiyoki, bakatalika kwiisya basyomi kuteeti, "Tamukonzya kufutulwa, aati mwapalulwa kweelana o Mulawo wa Mozesi." 2 Mpoonyina Paulu o Bbanabbasi bakakazyanya loko aaba bantu, cokuteeti mbungano yakasala Paulu o Bbanabbasi abamwi basyomi kuteegwa bainke ku Jelusalemu kuyoobuzya maapositola abamaalu ankani eeyi.

3 Mpoonyina mbungano yakababambila musinzo wabo okubatuma. Iino nibalikwiinda mu Fonisiya o mu Samaliya bakalungulula mubulamfu Bamasi mbubakasandukila kuli Leza, eeci cakababotela loko basyomi. 4 Nibakasika ku Jelusalemu, bakatambulwa abaapositola abamaalu embungano yoonse, mpoonyina bakalungulula zyoonse Leza zyaakacita kwiinda mulimbabo. 5 Kono bamwi basyomi balikuzwa kukabunga ka Bafalisi nibakamwva bulunguluzi bwa Bbanabbasi o Paulu bakaima okwaamba kuteeti, "Bamasi beelede kupalulwa okulaililwa kuteeti kabacilila Mulawo wa Mozesi."

6 Mpoonyina baapositola abamaalu bakaswaangana kuteegwa balanganye nkani eeyi. 7 ✝ Nibakaambozyanya kwenako ndamfu ankani eeyi, Pita wakanyamuka okwaamba kuteeti, "Nobazyalwama, imwi nakoi Leza walindisalide akati kenu okundituma ku Bamasi kuteeti ndikabakambookele Makani Mabotu kuteegwa ambabo bamvwe okusyoma. 8 ✝ Leza uzi mizeezo yabantu boonse wakabatambula. Wakacitondezya eeci kulindiswe kwiindila mukubapa Muuya Uusalala mbuli mbwaakacita okulindiswe. 9 Taakwe lwindano ndwaakatondezya alindiswe aalimbabo. Wakasalazya myoyo yabo kaambo bakasyoma. 10 Iino niinzi nemuyanda kusunka Leza kwiinda mukubika Bamasi basyomi jokwe munsingo nditwakakacilwa kunyamuna swebo abasikale besu? 11 Nee! Tusyoma kuteeti toonse tufutulwa munzila yoomwi, kwiinda muluzyalo lo Mwami Jesu."

12 Mbunga yoonse yakaumuna zii, kaiswilizya Bbanabbasi o Paulu nibalikupa bumboni bwezitondezyo zyamaleleele ezikomosya zyalikucita Leza kwiindila mulimbabo akati ka Bamasi. 13 Nibakamana kwaamboola, Jemusi* wakateeti, "Amundimvwe nobazyalwama! 14 Saimoni wazwaa kulungulula Leza mbwaakasaanguna kutondezya luyando lwakwe ku Bamasi kwiindila mukusala bamwi akatikabo kuteegwa babe bakwe. 15 Majwi abasinsimi alazuminizyanya eeci, mbuli mbwaamba mumalembo kuteeti,

16 ✝ ‘Kuzwaawo ndizoopiluka,

okuzooyakulula bwami bwa Deveti bwakawide mbuli teente.

Ndizooyakulula matongo ambubo

okuzoobubukulusya,

17 kuteegwa abamwi bantu boonse bazooyandoole Mwami,

kokuteeti Bamasi boonse mbindakaita kuba bangu.’

18 Oobu mbwaamba Mwami wakayubununa zintu eezi ciindi."

19 Jemusi wakazumanana kateeti, "Muzeezo wangu ngokuteeti tutapenzyi Bamasi balimukusandukila kuli Leza. 20 ✝ Kono atubalembele lugwalo lokubalailila kuteeti, batanoolyi zilyo zyakatuuzigwa kumituni, bataciti bumambe okutalya nyama yakasinwa ape okutalya gazi. 21 Kuzwa ciindi ooyu Mulawo wa Mozesi ulakambookwa mumataindi oonse ape ulabalwa Nsabata e Nsabata muzikombelo."

22 Mpoonyina baapositola abamaalu antoomwi embungano yoonse bakazuminana kusala baalumi kuzwa akati kabo okubatuma ku Antiyoki antoomwi o Paulu ape o Bbanabbasi. Bakasala baalumi bobile akati kabasololi babasyomi, Judasi walikwiitwa kuteeti Bbasabbasi o Sailasi 23 okubatuma o lugwalo lwalikwaamba kuteeti,

"Swebo tobazyalwanyoko tobapositola abamaalu twamulumelesya nobazyalwama Bamasi nomukala mu Antiyoki, mu Siliya omu Silisiya. 24 Twakamvwa kuteeti bamwi bakazwa akati kesu okumunyonganya okumukatazya mumizeezo yenu eziisyo zyabo nekuba kuteeti taakwe nitwakabatuma. 25 Cecico eeco cotwabunganina antoomwi okuba omuzeezo omwi wokuteeti tusale baalumi bamwi kuteegwa tubatume kulindinywe. Balazida antoomwi abayandisi besu Bbanabbasi o Paulu, 26 aba mbaalumi bakaaba maumaabo kaambo komusebezi wo Mwami wesu Jesu Kilisitu. 27 Twatuma Judasi o Sailasi lwabo kuteegwa bamulungulwide makani aaya. 28 Cakabotela Muuya Uusalala aswibo kuteegwa tutamubiki mukuli umwi kunze kweeyi milawo yeelede. 29 Mutalyi zilyo zyakatuuzigwa kumituni, mutalyi gazi, naanga nyama yabanyama bakasinwa, mutaciti bumambe. Muyoocita kabotu mwaakuligwisya mukuzicita eezi. Mupone kabotu."

30 Mpoonyina basyomi mu Jelusalemu bakatuma aaba baalumi bone ku Antiyoki. Nibakasika kuya, bakakubunganya basyomi boonse okubapa lugwalo. 31 Bantu nibakalubala bakabotelwa loko kaambo kamajwi alikubayumya-yumya. 32 Judasi o Sailasi lwabo bali basinsimi, bakatola nako ndamfu mukuyumya-yumya okukulwaizya basyomi mulusyomo. 33 Nibakakala-kala kwateni, basyomi bakabapilusya muluumuno ku Jelusalemu kulaabo balikubatumide. 34 [Kono Sailasi wakasala kusyaala ookuya.]*

35 Kono Paulu o Bbanabbasi bakasyaala mu Antiyoki kabayiisya okukambooka jwi lyo Mwami antoomwi abamwi banji.

36 Nikwakainda mazuba mace Paulu wakaambila Bbanabbasi kuteeti, "Atupilukile tukapotele basyomi mumataindi oonse mutwakakambooka jwi lyo Mwami, tukabone pobeendela." 37 Mpoonyina Bbanabbasi wakayanda kubwezelezya o Joni Maako, 38 ✝ kono Paulu wakakaka kaambo kokuteeti Joni Maako wakapiluka okubasiya mu Pamfiliya, taakwe naakazumanana kubeleka ambabo. 39 Bakakazyana loko cokuteeti mane bakaanzaana. Bbanabbasi wakabweza Maako okuzubukila ku Saipulusi, 40 kono Paulu wakasala Sailasi mpoonyina basyomi bakamubika muluzyalo lo Mwami, bamane bakainka. 41 Wakainda mucooko ca Siliya eca Silisiya, kayoobuyumya-yumya mbungano.