1 Apolosi naali mu Kolinto Paulu wakainda mukati mweni mwecilalaanda mane kuyoosika ku Efeso ooko kwaakakujana bamwi basyomi. 2 Mpoonyina wakababuzya kuteeti, "Ino mwakatambula Muuya Uusalala na nimwakasyoma?"

Bo bakamutaba kuteeti "Nee, mane taakwe nitwakamvwa okuteeti kuloo Muuya Uusalala."

3 Mpoonyina Paulu wakababuzya kuteeti, "Ino ndubbabbatizyo nzi ndumwakabbabbatizigwaalo?"

Bakamutaba kuteeti, "Lubbabbatizyo lwa Joni."

4 ✝ Paulu wakateeti "Joni walikubbabbatizya olubbabbatizyo lokusanduka, kaambila bantu kuteeti basyome muli ooyo uza musule lyakwe, kokuteeti muli Jesu."

5 Nibakamvwa eeci bakabbabbatizigwa muzina lyo Mwami Jesu. 6 Mpoonyina Paulu wakabika maanza aakwe alimbabo, kumane Muuya Uusalala wakabaselukila, mpoonyina bakatalika kwaamboola misyobo imwi okusinsima. 7 Kwali baalumi batakasike kumi abobile antoomwi.

8 Kuzwawo Paulu wakanjila mucikombelo ca Majuda kwemyeezi yotatwe kaamboola cobusicamba kubantu kuteegwa asole kubakweelela kukusyoma zyo Bwami bwa Leza. 9 Kono bamwi baleelikanyi okukaka kusyoma, okutalika kwaamboola zintu zibi Anzila yo Mwami kunembo lye mbungano. Mpoonyina Paulu wakazwa okubwezelezya basyomi okwiinka mucikolo ca Tilanasi ooko kwaali kwaamboozyanya ambabo buzuba-obuzuba. 10 Eeci cakatola myaaka yobile mpoonyina boonse bali mucilalaanda ca Eziya Majuda antoomwi a Bamasi bakamvwa jwi lya Mwami.

11 Leza walikucita maleele aakomosya kwiindila muli Paulu 12 cokuteeti ntaulu nekuba tusila twakakuma amubili wakwe kuteeti mwatutola kubalwazi, balikupona. Kuli aabo bali emyuuya mibi, myuuya mibi yalikuzwa. 13 Iino kwali bamwi Majuda balikweendeenda kutanda myuuya mibi. Bakasola kubelesya zina lyo Mwami Jesu alaabo bajesi madimona kabateeti, "Ndakulailila muzina lya Jesu ooyo Paulu ngwaakambooka, zwaa!" 14 Balikucita namu bali baalumi bali ciloba. Aaba bali bana bo Mupaizi Mupati* wa Majuda walikuteegwa Sikeva.

15 Muuya mubi wakateeti kulimbabo, "Jesu ndilimuzi ape o Paulu ndilimuzi. Ino nwyebo ndinywe bani?"

16 Mpoonyina mwaalumi wakanjidwe madimona wakabasotokela okubazunda okubauma loko boonse cokuteeti bakacija kuzwa mungʼanda kabali ecinkuna ape kabaliciside loko. 17 Boonse Majuda a Bamasi balikukala mu Efeso bakazimvwa eezi bakayoowa mpoonyina zina lyo Mwami Jesu lyakalumbaizigwa. 18 Bunji bwaabo bakasyoma bakeza kulyaambilila antangalala okutondezya zintu zibi zibalikucita. 19 Bunji bwaabo balikucita masalamusi bakeeta mabbuku aabo aazyamasalamusi okwaatenta antangalala. Muulo wamabbuku aaya oonse niwakasanganizigwa wakasika ku zyuulu zili makumi osanwe zya mali emiwaya-waya ye nsiliva. 20 Muleeyi nzila, jwi lyo Mwami lyakazumanana kusabalangana okubeleka cenguzu.

21 Nizyakainda eezi Paulu wakayeeya kwiinka ku Jelusalemu kwiinda mucooko ca Masedoniya eca Akaya kateeti, "Ndaakuzwa ku Jelusalemu, ndeelede kuyoinka oku Loma." 22 Mpoonyina wakatuma baalumi bobile mbaalikubeleka abo, Timoti o Elasitasi kuteeti bainke ku Masedoniya, we wakasyala musule mucooko ca Eziya.

23 Aciindi coonyina eeci kwakaba mapyopyongano mu Efeso kaambo kenzila yo Mwami Jesu. 24 Umwi mwaalumi uteegwa Dimitiliyasi mufuzi we nsiliva walikufula tufwanikisyo twe nsilva twe ngʼanda ya leza wokupanga mwanakazi uteegwa Atemisi ape musebezi ooyu wokufula tufwanikiso ootu walikubeetela mpindu loko, we abasikufula bamwi. 25 Wakaita basikufulanyina antoomwi abamwi balikucita misebezi iswana eyabo okubaambila kuteeti, "Nobaalumi, mulizi kuteeti ooyu musebezi nguutweetela mpindu nji. 26 Mulibwene okumvwa ooyu mwaalumi Paulu mbwaayunga okusweesya bantu banji kutainsi feela omuno mu Efeso kono ezibaka zinji zyomucooko ca Eziya kaamboola kuteeti ba leza bokupanga amaanza tiinsi ba leza benconzya. 27 Kuli ntenda kutaamba feela kuteeti musebezi wesu ulasampoolwa kubantu kono okuteeti ngʼanda ya leza mupati Atemisi ilabula ntuso kubantu ape obupati bwakwe bulasinyeka, leza mupati ngobakomba mu Eziya enyika mbwiizulwa!"

28 Bantu nibakamvwa eeci bakalutila okutalika koongolola kabateeti, "Atemesi woku Efeso ngomupati!" 29 Mapyopyongano aaya akazula taindi lyoonse, mpoonyina bbunga lyakazuzila kubbuwa lyezisaanino antoomwi okuyookulunta Gayasi o Alisitakasi. Aabo baalumi bali bana Masedoniya balikweenda antoomwi o Paulu. 30 Paulu walikuyanda kunjila mubbunga kono basyomi bakamukasya. 31 Mpoonyina bamwi basololi becooko bali beenzinyina bakatuma mulaizyo wokumukombelezya kuteegwa atanjili mwateni. 32 Anako eeyo muswaangano wacili mumapyopyongano, bantu bamwi balikoongolola cintu cimwi abamwi balikoongolola cimwi kaambo bunji bwa bantu taakwe nibezi ecibakazidilide. 33 Kwali umwi mwaalumi Mujuda akati kabo wezina lya Alekizanda. Bamwi Majuda bakamutontela kunembo kuteegwa amboole kubantu. Mpoonyina Alekizanda wakanyamuna maanza akwe kuteeti bantu baumune kuteegwa aambe kuteeti tainsi Majuda bakeeta mapyopyongano. 34 Kono bantu nibakamvwa kuteeti Mujuda bakoongololesya loko kabateeti, "Atemesi woku Efeso ngomupati! Atemesi woku Efeso ngomupati!" Bakoongolola namu kwa mawoola obile.

35 Mpoonyina mulembi wetaindi pati wakabaumuzya okubaambila kuteeti, "Nobana Efeso, ino ngwani utazi kuteeti taindi pati lya Efeso ndelibabalela ngʼanda ya Atemisi mupati ape kokubambwa ebbwe lyalikubonekaanga nguwe lyakawa kuzwa kujulu? 36 Mbokunga taakwe ukonzya kukazya eezi zintu, amusitikizye zyamba, mutaciti zintu kamutayeeyi. 37 Ape ndabona kuteeti mweeta aba baalumi bobile nekuba kuteeti taakwe nibakafumpa mumaanda aaba leza naanga kusampoola leza wesu mwanakazi Atemesi. 38 Nakuteeti Demitiliyasi abafuzi balaanguwe baleetongoosi kujatikizya umwi muntu, nkuta zilijulidwe ape abaatuzi bapati kobali inga baakuzekesyanya okuya. 39 Nakuli cimbi ciindilila awa ceelede kuyoobambwa mumiswaangano yomulawo. 40 Kuleezi zyacitika sunu, tulimuntenda yokupegwa mulandu wokweeta mapyopyongano, mukuteeti taakwe citamizyo kumapyopyongano aaya. Tatukwe bupanduluzi bubotu bokupa kuleezi zyacitika." 41 Naakamana kwaamba aya majwi wakamwaisya mbunga yabantu.