1 Agilipa wakaambila Paulu kuteeti, "Ulizumizidwe kulyaambilila omwini." Mpoonyina Paulu wakatandabika janza lyakwe okutalika kuliiminina, kateeti,

2 "O mwami Agilipa! Ndalimvwa kubeecoolwe kuliiminina ndemwini kunembo lyako sunu kuleezyo zyebanditamizya Majuda. 3 Ndalimvwa kubeecolwe loko kaambo ulizizi kabotu-kabotu zizo otwaambo toonse tobatazuminani Majuda. Kono ndakumbila kuteeti undiswiilizisye.

4 "Boonse Majuda balizi mbuli mbundakapona buumi bwangu kuzwa kubukubusi. Balizi mbuli mbundakabupona, kutalikila mucisi cangu mpoonyina omu Jelusalemu. 5 ✝ Balindizi kweciindi cilamfu ape nakuteeti kabayanda inga bazumina kwaamba kuteeti ndakapona kandili umwi wakabunga ka Bafalisi, kabunga kacilizya loko zizo zyobukombi bwesu. 6 Iino ndilimukuzekisigwa aano kaambo kokulangila kwangu mucisyomezyo Leza caakapa basikaale besu. 7 Eeci cisyomezyo misyobo yesu iili kumi eyobile ciilangila kuzootambula yanoobelekela Leza cokulyaaba masiku esikati. Iino kaambo kokulangila ooku o mwami, cendilimukutamizigwa aawa a Majuda. 8 Ino niinzi nemutakonzyi kusyoma kuteeti Leza inga wabusya bafwide?

9 ✝ "Mebo lwangu ndalikusyoma kuteeti ndeelede kucita zyoonse zyendikonzya kulwaanisya zina lya Jesu woku Nazaleta. 10 Zezizyo zindakacita mu Jelusalemu. Ndakatola basyomi banji muntolongo kwiindila munguzu zindakatambula ku Bapaizi Basilutwe. Ape amebo ndakazuminana abasololi ba Majuda kuteegwa basyomi bajaigwe. 11 Ziindi zinji ndakapa zisubulo muzikombelo zyoonse okusola kubasungilizya kukaka lusyomo ndobakajesi. Ndali babbebbelide cokuteeti ndalikwiinkaanga mumasi amwi okuyoobapenzya.

12 "Kekaambo aako kakanditola ku Damasikasi munguzu omumalailile aabapaizi basilutwe. 13 Nindalikuyoobweenda munzila sikati o mwami, ndakabona mumuni kuuselemuka kuzwa kujulu. Walikumwekesya loko kwiinda zuba okundizunguluka koonse-koonse aabo mbindalikweenda ambabo. 14 Toonse twakawida ansi, mpoonyina ndakamvwa jwi kalyaamboola mu Cijuda* kuteeti, ‘Saulu, Saulu! Ino undipenzezya nzi? Ulalicisa feela omwini kuteeti kouma ciconsyo*.’ 15 Mpoonyina ndakataba kuteeti, ‘Ino ndiweni O Mwami?’ Mpoonyina Mwami wakataba kuteeti, ‘Ndime Jesu ngopenzya.Mapulu Eendelezegwa e Ciconsyo 16 Kono nyamuka! Ndalibonya kulindiwe kuteegwa ndikusalile limwi kuba mubelesi wangu okuba kamboni wezintu ziwabona ape omuzintu mondizoolitondezezya kulindiwe. 17 Ndiyookuvuna kubantu bako bana Izilaili a Bamasi boonse ooko kondiyookutuma. 18 Weelede kubajula menso aabo kuteegwa ubasandule kubagwisya mumudima okubeeta mumumuni ape okubagwisya kunguzu zya Saatani okubeeta kuli Leza. Mpoonyina zibi zyabo ziyoolekelelwa okutambula caabilo akati kaabo bakasalazigwa kwiindila mukusyoma ndime.’

19 "O mwami Agilipa, ndakacilila cilengaano cindakabona kuzwa kujulu. 20 ✝ Ndakatalikila kukambookela bantu bomu Damasikasi mpoonyina bomu Jelusalemu ape abomu cisi coonse ca Izilaili oku Bamasi, kuteegwa basanduke kuzwa kuzibi zyabo okuza kuli Leza okucita zintu zitondezya kuteeti basanduka nconzyo. 21 Cecico eeci Majuda cibakandijatila kandili mulabba lye Ngʼanda ya Leza ape okusola kundijaya. 22 Kono kusika obuno buzuba, ndilimukugwasigwa o Leza, cecico eeco cindaimina aano kuteeti ndipe bumboni kuli boonse, bantu feela abolupati-pati. Eezi zyendaamba, cintu comwi azibakaamba basinsimi o Mozesi kuteeti ziyoocitika. 23 ✝ Bakateeti Mesiya weelede kupenga okuba wokusaanguna kubuka kuzwa kubafu, kuteegwa aambilizye mumuni wolufutuko ku Majuda okuli Bamasi boonse."

24 Paulu naalikuliiminina muleyi nzila, Fesitasi wakoongolola okuteeti, "Ulisondokede Paulu! Kwiiya kwako kupati kwaandokusondola!"

25 Mpoonyina Paulu wakataba kuteeti, "Tandisondokede oolemekwa Fesitasi! Kono ndaamboola feela zyenconzyo ape zyamaano. 26 O mwami Agilipa, inga ndakonzya kwaamboola obusicamba, kaambo ulizizi eezi zintu. Ndisyoma kuteeti eezi zintu taakwe nizyakacitika kotezi kaambo taakwe nizyakacitikila musisikide, kono zyakacitika antangalala. 27 O mwami Agilipa, ino ulasyoma mubasinsimi na? Ndilizi kuteeti ulasyoma!"

28 Mpoonyina Agilipa wakateeti kuli Paulu, "Ubonaanga mukaindi kaniini aaka inga wandisandula kuba muna Kilisitu?"

29 Mpoonyina Paulu wakataba kuteeti, "Nekuba mukaindi kaniini naanga muciindi cilamfu, kukomba kwangu kuli Leza kwakuteeti yebo aaba boonse bandiswiilizya sunu mube mbuli ndime kono kakutakwe maceeni."

30 Mpoonyina mwami omweendelezi o Bbenisi antoomwi abamwi bakanyamuka okwiinka. 31 Mpoonyina nibalikuyoobuya, bakatalika kwaamboozyanya muli cabo kabateeti, "Ooyu mwaalumi taakwe caacita cokuteeti inga wajailwa nekuba kubikwa muntolongo." 32 Ape Agilipa wakaambila Fesitasi kuteeti, "Ooyu mwaalumi nalukulwidwe kale naatakayanda kwiinka kuyaatulwa kuli Kaisala."