1 Pita o Joni kabacaamboola abantu, kwakabazida bapaizi bamwi awolupati-pati wabalindizi bomu Ngʼanda ya Leza abamwi ba Saduki. 2 Bakeza kabanyemene kaambo aaba bamaapositola bobile balikwiisya bantu kuteeti Jesu wakabuka kuzwa kubafu, eeci cakalitondezya kuteeti bantu bayoobuka kuzwa kubafu. 3 Mpoonyina bakabajata okubabika muntolongo mane kusikila bwaca kaambo kwalisiide kale. 4 Kono bunji bwaabo bakalimvwa jwi bakasyoma, omweelwe wabaalumi wakavula cokuteeti batikasike kuzyuulu zyosanwe.

5 Buzuba bwakacilila, basololi ba Majuda, bamaalu, abamayi bo Mulawo bakabungana mu Jelusalemu. 6 Alaabo baliwo kwali Anasi Mupaizi Mupati, Kayafasi, Joni, o Alekizanda ape abamwi balikuzulilwa mumukwasyi wo Mupaizi Mupati. 7 Mpoonyina bakaimika Pita o Joni kunembo lyabo okutalika kubabuzya kuteeti, "Ino ninguzuunzi na muuzina lyani ndimwabelesya kuponya ooyu mwaalumi?"

8 Mpoonyina Pita kazwide Muuya Uusalala, wakabataba kuteeti, "Nobasololi babantu amaalu! 9 Ino sunu tubuzigwa kaambo komusebezi mubotu wacitwa kumwaalumi ooyu cihole na? Ino muyanda kuziba mbwaaponisigwa na? 10 Nywebo abana Izilaili noonse muzibe kuteeti ooyu mwaalumi waponisigwa kwiindila muzina lya Jesu Kilisitu woku Nazaleta, ooyo ngumwakakankamina kono Leza wakamubusya kuzwa kubafu. 11 ✝ Ooyu Jesu nguwaambwa mumalembo kuteeti,

‘Bbwe ndimwakakaka nywebo nobayaki

lyakaba ndeliyandisi kwiinda oonse.’

12 Lufutuko lujanika feela mulinguwe kaambo taakwe limwi zina ndyaakapa Leza muno munyika oomo motunga twajana lufutuko."

13 Iino Benkuta Mpati ya Majuda nibakabona busicamba bwa Pita o Joni okuziba kuteeti balibantu feela batalikwe olwiiyo, bakakomokwa loko, mpoonyina bakaziba kuteeti balikujanikaanga o Jesu. 14 Kono kaambo kokuteeti bakabona mwaalumi wakaponesegwa kaimvwi ambabo bakabula ecokwaamba aleeci. 15 Mpoonyina bakaambila Pita o Joni kuteeti bazwidaanze, kumane Benkuta Mpati bakalyaamboozya mulicabo kabateeti, 16 "Ino tubacite buti aaba baalumi? Jelusalemu yoonse yaziba kuteeti bacita maleele aakomosya eeco cetutakonzyi kukaka aswebo. 17 Kono kuteegwa nkani eeyi itasabalangani, atubalailile kuteeti baleke kwaamboola muzina lya Jesu kumuntu naanga omwi."

18 Mpoonyina bakabaita mukati okubalailila kuteeti batakasoli kwaamboola naanga kwiisya muzina lya Jesu. 19 Kono Pita o Joni bakabataba kuteeti, "Amulyaatwide nobeni na Leza uyanda kuteeti tucilizye nywebo na nguwe? 20 Kono swebo lwesu tatukonzyi kuleka kwaamboola alizitwabona okumvwa." 21 Nibakamana kubakonga, bakabalukulula kaambo kokuteeti bakakacilwa kubapa cisubulo kaambo kabantu balikulumbaizya Leza kuli cakacitika. 22 Mwaalumi wakacitilwa maleele ookuponesegwa waleemyaaka yalikwiinda makumi one.

23 Pita o Joni nibakalukululwa feela, bakainka kubasyominyina okuyoobaambila zyoonse zibakabaambila bapaizi basilutwe abamaalu. 24 ✝ Nibakamvwa eeci, bakanyamuna majwaabo antoomwi okukomba kuli Leza kabateeti, "O Mwami Singuzu Zyoonse, owakalenga julu enyika, lwizi ezintu zyoonse zili mulizizyo! 25 ✝ Yebo wakaamba kubelesya Muuya Uusalala kwiindila mumubelesi wako Deveti sikale wesu kuteeti,

‘Ino niinzi capa kuteeti Bamasi banyeme loko?

Ino niinzi bantu nebakanza zyobufuba-fuba?

26 Bami benyika bakalibambila nkondo,

abaleli bakabungana antoomwi

kulwanisya Mwami o Mesiya wakwe.’

27 ✝ Nconzyo mwami Helodi o muleli Pontiyasi Pilato, Bamasi, abana Izilaili bakaswaangana omuno mutaindi kuteeti bayandoole nzila yokujaya Jesu mubelesi wako uusalala nguwakananika. 28 Zyoonse zibakacita wakalizikanzide kale ciindi kwiindila munguzu oluyando lwako kuteeeti zicitike. 29 Iino O Mwami, mvwa mbubalikutuyoosya wamana utupe nguzu zinji tobabelesi bako zyokukambooka majwi aako cokutayoowa. 30 Tandabika janza lyako kuteeti uponye okucita zitondezyo zyamaleele ezikomosya kwiindila muzina lyomubelesi wako uusalala Jesu."

31 Nibakamana kukomba, cibaka pibakaswaangene cakazungaana. Mpoonyina boonse bakazula Muuya Uusalala okutalika kukambooka majwaa Leza cokutayoowa.

32 ✝ Basyomi boonse baloomuzeezo omwi o moyo omwi, mane okulimvwa kuteeti lubono ndobakajesi taakwe nilwalilwabo kubagama kono bakabaana zintu zyoonse zibakajesi. 33 Mpoonyina baapositola bakapa bumboni bokubuka kwa Mwami Jesu kubafu cenguzu loko ape luzyalo lwa Leza lupati lwali aalimbabo boonse, 34 cokuteeti taakwe wakabula akati kabo kaambo aabo bakajesi zibaka naanga maanda bakazyuuzya okweeta mali ngobakauzya, 35 okwatola kunembo lya maapositola. Mpoonyina bakaabaanya kuli umwi oumwi kweelana ambwaabulide.

36 Mboonyina mbuli Josefa mu Levi uuzwa ku Saipulasi baapositola ngubalikwiita kuteeti Bbanabbasi, caamba kuteeti, "Sikuyumya-yumya". 37 Wakauzya muunda wakwe okweeta mali kubaapositola.