1 Muciindi eeco Mwami Helodi Agilipa wakajata bamwi basyomi bomumbungano kuteegwa abapenzye. 2 Wakajazya mwaapositola Jemusi esabule muzyalwanyina o Joni. 3 Mpoonyina Helodi naakabona kuteeti eeci cakanoneezya ma Juda, wakaanzya o Pita. Eeci cakacitika nako yo mukiti we Cinkwa Citakwe Mumena. 4 ✝ Mpoonyina Helodi wakajata Pita okumubika muntolongo, oomo mwaakaabwa mumaanza ootubunga tone twabasikalumamba bali bone kabunga akabunga kuteegwa kabamulindilila. Helodi wali kuyanda kweeta Pita kuzoomwaatula antangalala yainda Pasika. 5 Kono Pita naali muntolongo, mbungano yakamukombela kuli Leza loko.

6 Ngoonyina masiku aalya Helodi naalikuyeeya kuteeti bwaca abeteke Pita, Pita walikoona kaangidwe maceeni obile akati kabasilumamba bobile. Bamwi balikulindilila kumanjililo entolongo. 7 Mpoonya-mpoonya kwakalibonya mungelo wo Mwami, mpoonyina kwakamweka muntolongo. Kumane mungelo wakatikimuna Pita okumubusya kateeti, "Fwambaana! Nyamuka!" Kuzwaawo maceeni akaloka kumaanzaakwe. 8 Kumane, mungelo wakamwaambila kuteeti, "Anga lukanda lwako uzwaate amanyantelaako." Mpoonyina wakacita mboonya namu. Ape mungelo wakateeti, "Iino zwaata jansi lyako undicilile." 9 Mpoonyina Pita wakazwa muntolongo okucilila mungelo, kono taakwe naakaziba kuteeti zyaalikucita mungelo zyalikucitika nconzyo, kono walikuyeyaanga calicilengaano feela. 10 Nibakaindilila balindizi bokusaanguna ababili, bakasika kumulyango wezibulo utozya mutaindi pati, mulyango wakalijula aulike. Kuzwaawo bakazwaanze okutalika kweenda mumugwagwa. Mpoonya-mpoonya mungelo wakamusiya. Pita Wagwisigwa Camaleele Muntolongo

11 Mpoonyina Pita naakaziba zyakacitika kulinguwe, wakateeti, "Iino ndaziba nconzyo kuteeti Mwami watuma mungelo wakwe kuzoondifutula kunguzu zya Helodi okuli zyoonse Majuda zibalikuyeeyela kuteeti inga zyacitika."

12 Pita naakaziba namu, wakainka kungʼanda ya Maliya banyina Joni Maako, ooko kwabungene bantu banji balikukomba. 13 Naakakonkomona kucitendele celabba, umwi musimbi mubelesi walikwiitwa kuteeti Loda wakeza kuteeti azoobone walikoodisya. 14 Mpoonyina naakaliziba jwi lya Pita, wakabotelwa loko, taakwe naakajula citendele kono wakazuzila mukati kuyaambila bantu boonse kuteeti, "Pita ulaamulyango!" 15 Kono bakamwaambila kuteeti, "Ulisondokede yebo!" Mpoonyina naakazumanana bakaamba kuteeti, "Mungelo* wa Pita."

16 Iino Pita wakaindilizya kukonkomona. Mpoonyina nibakajula citendele okumubona bakakomokwa loko. 17 Kuzwaawo wakanyamuna janza lyakwe kuteegwa baumune, amane wakabalungulwida Mwami mbwaakamugwisya muntolongo okwaamba kuteeti, "Mumwaambile Jemusi* abakwesu bamwi zyacitika." Amane, Pita wakainka kucibaka cimwi.

18 Nibwakaca kwali kulyangana kutalikomeneni akati kabasilumamba alizyakacitika kuli Pita. 19 Mpoonyina Helodi wakalailila kuteeti alangoolwe kono taakwe nibakamujana. Mpoonyina Helodi wakabazekisya balindizi okulailila kuteeti bajaigwe.

Kuzwaawo Helodi wakazwa ku Judiya okuyookala-kala mu Sizaliya.

20 Iino Helodi wakanyemena bantu bomutaindi pati lya Taila elya Sidoni*, mpoonyina bo bakainka antoomwi kuyoobonana awe. Bakanjilila kuli Bbalasitasi mugwasyi wo mwami kukumbila kuteeti kube luumuno kaambo cisi cabo calikujana zilyo mucisi co mwami.

21 Mubuzuba bwakasalidwe, Helodi wakazwaata zyobwami okukala acibbula cakwe co bwami okupa majwi kubantu. 22 Mpoonyina bantu bakoongolola kabateeti, "Eeli ndijwi lya Leza kutali lyo muntu!" 23 Mpoonyinaawo mungelo wo Mwami wakapa kuteeti Helodi aciswe kaambo taakwe naakapa likute kuli Leza. Mpoonyina wakaligwa amabuku okufwa.

24 Kono majwi a Leza akazwidaanembo kumwaigwa mpoonyina basyomi bakavula.

25 Kuzwaawo Bbanabbasi o Saulu nibakamanisya musebezi wabo mu Jelusalemu, bakapilukila ku Antiyoki okubwezelezya o Joni Maako.