1 Mapyopyongano naakamana Paulu wakaita basyomi antoomwi okubapa majwi okuyumya-yumya okubalaizya. Mpoonyina wakanyamuka ookwiinka ku Masedoniya. 2 Kacili mu Masedoniya wakayumya-yumya basyomi mumataindi oonse mwaakainda. Mpoonyina wakasika kucooko ca Gilisi*, 3 ooko kwaakakala kwe myeezi yotatwe. Naalikulibambila kwiinka ku Siliya omugolo mupati, wakaziba kuteeti Majuda balikukanza kumujaya, mpoonyina wakayeeya feela kupiluka kwiinda mu Masedoniya. 4 Bakainka o Paulu kwali Sopata mwaana wa Pilasi woku Bbeliya o Alisitakasi o Sekundasi boku Tesalonika, Gayasi woku Delebbe, Tikikasi o Tilofimasi boku cooko ca Eziya o Timoti. 5 Aaba bakainka kunembo okuyootulindila ku Tilosi, 6 kono twakasika ku Filipi. Mpoonyina niwakamana mukiti we cinkwa citakwe mumena, twakeenda omugolo mupati kwamazuba osanwe. Twakaakusangana abamwi mu Tilosi mutwakakala nsunda yomwe.

7 Mubuzuba bokusaanguna bwe nsunda twakaswaangana antoomwi kulya*. Paulu wakakambookela bantu mane akati kamasiku kaambo kokuteeti walikuyanda kunyamuka buzuba bwali kucilila. 8 Malampi manji alikuyaka mungʼanda yomujulu oomo mutwaswaangene. 9 Umwi musyimani wezina lya Yutikasi walikede ampulungwido. Kaambo Paulu wakatola nako ndamfu kwaamboola, Yutikasi wakafwa ngʼonzi okoona amane wakawida ansi kuzwa mungʼanda yatatu mujulu. Nibakamubweza walifwide. 10 Kono Paulu wakainka ansi okulisowela alinguwe okumukumbata mpoonyina wakateeti, "Mutapengi kaambo uloobuumi!" 11 Mpoonyina Paulu wakapiluka mujulu lye ngʼanda okuyookomona cinkwa okulya. Wakaamboola ambabo kweciindi cilamfu kusikila mane lyaandula zuba, kumane wakainka. 12 Musyimani bakamutola kungʼanda kali muumi ape abantu bakayumisigwa loko.

13 Iino Paulu wakatwaambilide kuteeti ulainka amaulu ku Asosi. Swebo wakatwaambilide kuteeti twiinke omugolo mupati ku Asosi ooko kwayootusangana mumugolo mupati. Mpoonyina twakacita mbuli mbwaakatulailila, kono we wakeenda amaulu. 14 Naakatuswaana mu Asosi, twakamubweza okuza awe kutaindi lya Mitilene. 15 Twakeenda omugolo kuzwa kwateni kuyoosika kucibaka cilangene ensumbu ya Kiyosi buzuba bwakacilila. Nikwakainda buzuba bomwi twakainka ku nsumbu ya Samosi, mpoonyina buzuba bwakacilila twakasika ku Melitasi. 16 Paulu wakayeeyede kuteeti aiinde mbali Efeso kuteegwa atasowi nako mucooko ca Eziya, kaambo walikuyanda kusika kufwambaana ku Jelusalemu nakakukonzyeka mubuzuba bwe Pentekositi.

17 Kali ku Melitasi Paulu wakatuma mulaizyo ku Efeso wokwiita bamaalu bembungano kuteegwa baswaangane anguwe. 18 Nibakasika wakabaambila kuteeti, "Mulizi mbundali kupona nako yoonse nindali andinwe, kuzwa buzuba nindakasika mucooko ca Eziya. 19 Ndakacita musebezi wo Mwami mukulicesya, mumisozi omumasunko aakandicitikila kaambo kamakanze aa Majuda. 20 Mulizi kuteeti taakwe cindakasiya calikunoomugwasya nindakali kukambooka okumwiisya antangalala omumaanda eenu. 21 Ndakabacenjezya Majuda antoomwi a Bamasi kuteegwa beelede kusiya zibi zyabo okusandukila kuli Leza ape okusyoma Mwami wesu Jesu. 22 Iino ndeelede kumvwida Muuya wa Leza okwiinka ku Jelusalemu kanditezi ciyoondicitikila. 23 Ndizi feela kuteeti mumataindi oonse Muuya Uusalala wakandicenjezya kuteeti ntolongo amapenzi zilandilindila. 24 ✝ Kono buumi bwangu tabukwe mpindu kulindime. Cintu cipati kumanisya feela musebezi wangu obukamboosi mbwaakandipa Mwami Jesu bwakwaambilizya Makani Mabotu oluzyalo lwa Leza.

25 "Iino ndilizi kuteeti taakwe naanga womwi akati kenu mbindakeendela okukambookela zyo Bwami bwa Leza uyoondibona ape. 26 Kono buno buzuba ndimwaambila cokusinizya kuteeti na bamwi benu basweeke ciindi cabo, mebo tandikwe mulandu, 27 kaambo taakwe cindakamusisila kono ndakamukambookela zyoonse Leza zyayanda. 28 Amulimamele nobeni ape obutanga boonse oobo Muuya Uusalala mbwaakamupa kuteeti mulange okweembela mbungano ya Leza eyo njakaula egazi lyo Mwanaakwe. 29 Ndilizi kuteeti ndazwa, baumpe* babutambo bazooza akati kenu ape tabakozoobuleka butanga nee. 30 Naanga akati kenu kuzoozwa bamwi baalumi bayoiisya zibakapilinganya mukusola kukwelela basyomi kulimbabo. 31 Iino amumamele okuyeeya kuteeti kwemyaaka yotatwe ndalikucenjezyaanga umwi oumwi wenu sikati amasiku emisozi minji.

32 "Iino ndamusiya mumaanza a Leza omumakani ooluzyalo lwakwe, aayo akonzya kumuyaka okumupa lukono akati kaabo Leza mbaakalisalila. 33 Taakwe nindakanyomenena nsiliva naanga ngolide naanga cizwato comuntu umwi nee. 34 Nywebo nobeni mulizi kuteeti ndabeleka amaanza angu aya kulijanina zyoonse zyendibula azyebabula beenzuma mbotwakali limwi. 35 Kwiindila muleezi zintu zyoonse zyendakacita, ndakamutondezya kuteeti mukubeleka namu tweelede kugwasya aabo batalikonzyezi, netucita namu katuyeeya amajwi ngaakaamba Mwami Jesu lwakwe naakateeti, ‘Kupa kweeta cileleko cipati kwiinda kutambula.’"

36 Iino Paulu naakamana kwaamba namu wakafugama okukomba ambabo. 37 Mpoonyina boonse bakalila loko kabamukumbata okumumyonta mukumulaya. 38 Akabapa kuusa loko majwi ngakaamba kuteeti tabaciyomuboni. Mpoonyina bakamusindikila kwiinka kumugolo mupati.