1 "Nobakwesu amatata, amundiswiilizye mbondiliiminina kunembo lyenu." 2 Nibakamumvwa Paulu kaamboola mu Cijuda boonse bakaumuna zii! Mpoonyina Paulu wakazumanana.

3 ✝"Ndili Mujuda wakazyalilwa mutaindi pati lya Tasisi mucooko ca Silisiya kono ndakakomenena omuno mu Jelusalemu. Ndali sikwiiya wa Gamaliyo, ndakaiisigwa kabotu-kabotu Mulawo wabasikale besu ape ndakalipa kuli Leza mbuli ndinywe mbomulipede noonse nomulaawa sunu. 4 ✝ Ndakapenzya okujazya bantu bakali kucilila Nzila yo Mwami Jesu, ndakaanga baalumi abanakazi okubasowela muntolongo. 5 Mupaizi Mupati abe Nkutanyina boonse inga bazumina amebo kuteeti zyendilimukwaamba zyenconzyo. Ndakatambula magwalo kuzwa kuli mbabo aakalembelwa bazyalwama bomu Damasikasi aalikundizumizya kuyaanga bantu aaba mumaceni okubeeta ku Jelusalemu kuno kuteegwa bazoopegwe cisubulo. Mpoonyina ndakanyamuka kwiinka ku Damasikasi.

6 "Nindalimumusinzo afwiifwi okusika ku Damasikasi musikati, kwaka mweka mumuni kuzwa kujulu okundimunika. 7 Mpoonyina ndakawida ansi okumvwa jwi kaliteeti kulindime, ‘Saulu! Saulu! Ino undipenzezya nzi?’ 8 Mpoonyina ndakabuzya kuteeti, ‘Ino ndiweni, o Mwami?’ Mpoonyina we wakanditaba kuteeti ‘Ndime Jesu woku Nazaleta, ngopenzya.’ 9 Iino bamaalumi mbindali ambabo bakuubona mumuni kono jwi lyooyo wali kundaamboozya taakwe nibakalimvwa. 10 Ndakabuzya kuteeti, ‘Ino ndicite buti o Mwami?’ Mpoonyina wakataba kuteeti, ‘Nyamuka wiinke ku Damasikasi, okuya uyoambilwa cayanda Leza kuteeti umucitile.’ 11 Ndakoofwaala kaambo komumuni wakandimunika, mpoonyina aabo mbindalaabo bakandijata kujanza okunditola ku Damasikasi.

12 "Omuya mutaindi kwali mwaalumi wezina lya Ananiyasi wakalikapede kweendelena o Mulawo wa Leza. Walikulemekwa loko aba Majuda balikukala mwateni. 13 Wakeza okwiima afwiifwi andime okwaamba kuteeti, ‘Omuzyalwama Saulu, kobona ape!’ Mpoonyaawo ndakatalika kubona ape ndakabona Ananiyasi kaimvwi. 14 Mpoonyina wakandaambila kuteeti, ‘Leza wabasikale besu wakusala kuteegwa uzibe luyando lwakwe okubona Mululami* wakwe okumumvwa kaamboola ejwi lyakwe, 15 kaambo uyooba kamboni wakwe kubantu boonse kuli zyoonse ziwabona okumvwa. 16 Ino ulindila nzi? Nyamuka ubbabbatizigwe kuteegwa zibi zyako zisanzigwe kwiindila mukukomba.’

17 "Kuzwaawo, ndakapilukila ku Jelusalemu. Iino nindalikukomba mulabba lye Ngʼanda ya Leza ndakabona cilengaano. 18 Ndakabona Mwami wangu kandaambila kuteeti, ‘Fwambaana, zwa mu Jelusalemu kaambo bantu boomuno tabakoobutambula bukamboni bwako kujatikizya ndime.’ 19 Mpoonyina ndakamutaba kuteeti, ‘Mwami wangu, balizi kabotu-kabotu kuteeti ndalikwiinkaanga mucikombelo ecikombelo kuyaanga okuuma bantu balikusyoma mulindiwe. 20 ✝ Ape kamboni wako Sitivini naakajaigwa ndakaliimvwi ambali ape ndakazumizya kujaigwa kwakwe okubamba zizwaato zyabasikumujaya.’ 21 Mpoonyina Mwami wangu wakandaambila kuteeti, ‘Koya, ndiyookutuma kule kuli Bamasi.’"

22 Bantu bakaswilila Paulu zyaalikwaamba kusikila waamba namu, mpoonyina bakatalika koongoolola atala amajwi aabo kabateeti, "Mutamuleki, amumujaye! Teelede kupona!" 23 Bali koongolola kumwi kabasowaila zizwato zyabo ansi okufusaila muse mujulu. 24 Mpoonyina mweendelezi mupati wabasilumamba be Ciloma wakalailila basilumamba kuteeti bamupilusye kukala basilumamba ape bavuntoozye mulandu wakwe kwiinda mukumuuma entatula kuteegwa mweendelezi mupati azibe mbunga ciyalikumoongolweda namu Paulu. 25 Kono nibakamwaangilila maanza kucisamu* kuteegwa bamuume, Paulu wakaambila umwi mweendelezi wabasilumamba wali afwiifwi kuteeti, "Ino cilimumulawo kulindinwe kuuma muna Loma watakazekesegwa kabotu okujanwa omulandu na?"

26 Mpoonyina Mweendelezi wabasilumamba naakamvwa namu, wakainkila mweendelezi wabasilumamba mupati okumucenjezya kuteeti, "Ino niinzi comuyanda kucita? Ooyu mwaalumi muna Loma!"

27 Mpoonyina mweendelezi wabasilumamba mupati wakainka kuli Paulu okumubuzya kuteeti, "Ndaambile, uli muna Loma na?"

Paulu wakamutaba kuteeti "Iyi."

28 Mpoonyina mweendelezi wabasilumamba mupati wakaamba kuteeti, "Mebo ndakaba namu kwiindila mukubbadela mulwi-wa mali."

Kono we Paulu wakateeti, "Mebo ndili muna Loma kukuzyalwa."

29 Mpoonyinaawo bamaalumi balikuyanda kubuzya Paulu mibuzyo bakapiluka musule. Awe mweendelezi mupati wabasilumamba be Ciloma wakayoowa naakaziba kuteeti ngwaakaanzya wali muna Loma.

30 Mweendelezi mupati wabasilumamba wakayandisisya kuziba ceni-ceni Majuda cibali kutamizya Paulu. Mpoonyina buzuba bwakacilila, wakalaila kuteeti Paulu alukululwe okuteeti bapaizi basilutwe abenkunta boonse baswaangane o Paulu. Mpoonyina wakabweza Paulu okumwiimika kunembo lyabo.