Misericórdia

18 ओ यहोवा, तेरे जेड़ा कोई परमेशर नि ए; तूँ तिना लोका रे पापा खे माफ करेया जो बची गे दे ए, मतलब तेरे लोक। तूँ सदा गुस्से दे नि रंदा; तूँ आसा खे ये दखाणे दे बऊत खुश रओआ कि तूँ आसा ते सच्चा प्यार करेया।

पाप माफ करने रिया तँईं प्रार्थना

1 ओ परमेशर, आपणे गईरे प्यारो रिया बजा ते मां पाँदे दया कर।

तेरी बड़ी दया रिया बजा ते मेरे पापो खे मटयाई दे।*

2 माखे ठीक-टंगो रे तोई की मेरे बुरे काम दूर कर

ओर मेरे पापो ते छुड़ाई की माखे शुद्ध कर!

6 ओ प्रभु, आपणी दया ओर करूणा खे याद कर;

कऊँकि तूँ तिना खे जुगो-जुगो ते प्रकट करदा आई रा।

7 ओ प्रभु, आपणी पलाईया रिया बजा ते

मेरी जवानिया रे पाप ओर पाप याद नि कर;

आपणी करूणा रेई मुताबिक तूँ माखे याद कर।

करूणा करने वाल़ा परमेशर

1 ओ यहोवा, मैं बऊत पारी मुसीबता रे बखते ताखे आका पाईया!

2 ओ प्रभु, मेरी पुकार सुण!

तेरे कान मेरे मतादा रिया तँईं पुकारने रिया तरफा खे त्यानो साथे लगे रे रओ!

11 ओ प्रभु, तूँ आपणी बड़ी दया मां पाँदा ते नि टाया,

तेरी करूणा ओर सच्चाईया ते लगातार मेरी रक्षा ऊँदी रओ!

6 पक्का पलाई ओर करूणा जिन्दगी पर मां साथे बणी री रणी

ओर मां प्रभुए रे कअरे जुगो-जुगो तक रणा।

13 जेड़ी दया बाओ आपणे बाल़का पाँदे करोआ,

प्रभु बी आपणे पग्ता पाँदे तेड़ी ई दया करोआ।

15 पर आदमो रे पाप और परमेशरो री दया ते परी री कृपा रे बऊत बड़ा फर्क ए। कऊँकि जेबे एक माणूंए रे पापो री बजअ ते बऊत सारे माणूं मरे। तिंयाँ ई परमेशरो री कृपा और धार्मिकता रा तोफा जो तिने आसा खे यीशु मसीह रे जरिए दित्तेया बऊत सारे लोका रा पाप माफ करने खे बऊत बड़ा दान ए।

धार्मिकता रे दास

15 तो क्या ऊआ? क्या आसे इजी री खातर पाप करिए कि आसे बिधानो रे अधीन निए, बल्कि कृपा रे अधीन ए? कदी पनि।

4 पर परमेशरे जो दया रा धनी ए, आपणे तेस बड़े प्यारो री बजअ ते, जेतेते तिने आसा साथे प्यार कित्तेया। 5 जेबे आसे पापो री बजअ ते मरे रे थे, तो आसे मसीह साथे जिऊँदे कित्ते। परमेशरो री कृपा तेई तुसा रा उद्धार ऊई रा।

9 प्रभुए माखे बोलेया, "मेरी कृपा ताखे बऊत ए; कऊँकि मेरी सामर्थ कमजोरिया रे बऊत अच्छा काम करोई।" इजी री खातर आऊँ बड़ी खुशिया साथे आपणी कमजोरिया पाँदे कमण्ड करूँगा ताकि मसीह री सामर्थ मां पाँदे छांएं करदी रओ।

13 जो माणूं आपणे पाप लकोआ, तेसरा काम सफल नि ऊँदा,

पर जो तिना खे मानी लओआ ओर छाडी बी देओआ,

तेस पाँदे दया करी जाणी।*

7 दुष्ट आपणा चाल-चलण ओर बुरे काम करने वाल़े आपणे सोच-बिचार छाडी की यहोवे रिया तरफा खे ई फिरो, तेस तिना पाँदे दया करनी, से म्हारे परमेशरो रिया तरफा खे फिरो ओर तेस तेसखे पूरी तरअ ते माफ करना।

परमेशरो रा आपणे लोका पाँदे अनुग्रह

18 तेबे बी परमेशर इजी रिया तँईं देरी करोआ ताकि तुसा पाँदे अनुग्रह करो ओर इजी री खातर से ऊच्चे उठणा ताकि तुसा पाँदे दया करो, कऊँकि परमेशर यहोवा न्यायी परमेशर ए; सेयो माणूं कितणे तन्य ए जो तेस पाँदे उम्मीद लगाई राखोए।

13 तो तुसे जाओ और इजी रा मतलब जाणी लओ कि, ‘आऊँ बलिदान नि, पर दया चाऊँआ।’ कऊँकि आऊँ तर्मिया खे नि, पर पापिया खे बुलाणे आयी रा।"

नरगुणे दासो रा उदारण

21 तेबे पतरसे नेड़े आयी की यीशुए खे बोलेया, "ओ प्रभु! जे मेरा विश्वासी पाई पाप ई करदा रओ, तो आऊँ कितणी बार तेसखे माफ करुँ? क्या सात बार तक?" 22 यीशुए तेसखे बोलेया, "आऊँ तुसा खे ये नि बोलदा कि सात बार, बल्कि सात बारा रे सत्तर गुणे तक माफ करो।

14 "तेबेई तो जे तुसे लोका रे पाप माफ करोगे, तो तुसा रे स्वर्गिय पिते बी तुसा रे पाप माफ करने।

31 तेबे बी तैं जो बड़ा दयालु ए, तिना रा अन्त नि कित्तेया ओर ना सेयो त्यागे, कऊँकि तूँ अनुग्रह करने वाल़ा ओर दयालु परमेशर ए।

5 जो माणूं ओरी पाँदे दया करोआ ओर त्वार देओआ,

ओर ईमानदारिया साथे आपणे हरेक काम करोआ, तेसरा कल्याण ओआ।

17 म्हारे प्रभु परमेशरो री दया आसा पाँदे ओ,

जो काम आसे करूँए तिजी खे सफल कर,

जरूर प्रभु, तूँ म्हारे आथो रे काम सफल कर।

16 इजी री खातर आओ, आसे ईम्मत बानी की परमेशरो रे नेड़े चलूँए, जो कृपा ते परी रा। तेबे परमेशरो आसा पाँदे दया और कृपा दखाणी और जो जरूरता रे बखते म्हारी मताद करो।

परमेशरो री सेवा री जिन्दगी

1 इजी री खातर ओ साथी विश्वासियो! आऊँ तुसा खे परमेशरो री दया याद कराई की बिनती करूँआ कि आपणे आपू खे जिऊँदा और पवित्र और परमेशरो खे अच्छा लगदा ऊआ बलिदान करी की चढ़ाओ। परमेशरो री सेवा करने रा येई सच्चा तरीका ए।

16 "कऊँकि परमेशरे दुनिया रे लोका ते एड़ा प्यार कित्तेया कि तिने आपणा एकलौता पुत्र देईता, ताकि जो कोई तेस पाँदे विश्वास करो, से नाश नि ओ, पर अनन्त जीवन पाओ।

29 कऊँकि मसीह री बजअ ते तुसा पाँदे ये कृपा ऊई कि ना बस तेस पाँदे ई विश्वास करो, पर तेसरिया तँईं दु:ख बी सईन करो,

हिजकिय्याहो रे जरीये फसह रा त्‍योआर मनाणे री त्‍यारी

1 तेबे हिजकिय्याहे सारे इस्राएल ओर यहूदा रे लोका खे सन्देसा पेजेया ओर एप्रैम ओर मनश्शे रे गोत्रा खे ये लिखी की चिट्ठी पेजी कि तुसे यरूशलेम शईरो दे यहोवे रे मन्दरो दे इस्राएलो रे परमेशर यहोवे खे फसह रा त्योआर मनाणे खे आओ। 2 राजा ओर तेसरे परदान ओर यरूशलेम शईरो री मण्डल़िए सला करी राखी थी कि फसह रा त्योआर दूजे मीन्ने मनाणा। 3 सेयो तेस त्योआरो खे तेस बखते इजी बजा ते नि मनाई सको थे, कऊँकि थोड़े जे ई पुरोईते आपू-आपू खे पवित्र करी राखेया था ओर प्रजा रे लोक यरूशलेम शईरो रे कट्ठे नि ऊई रे थे। 4 ये गल्ल राजा ओर सारी मण्डल़िया खे ठीक लगी। 5 इजी री खातर तिने इस्राएलो रे सारे देशो दे, बेर्शेबा शईरो ते लई की दानो रिया जगा तक एक सन्देश पेजेया, कि यरूशलेम शईरो दे इस्राएलो रे परमेशर यहोवे रिया तँईं फसह रा त्योआर मनाणे खे आओ, कऊँकि तिने इतणी बड़ी संख्या रे फसह ईंयाँ नि मनाया था जेड़ा लिखी राखेया। 6 तेबे डाकिये राजा ओर तेसरे परदाना ते पर्चिया लई की, राजे री आज्ञा रे मुताबिक सारे इस्राएलो ओर यहूदा रे कूमे ओर ये बोलदे गये, "ओ इस्राएलियो! अब्राहम, इसहाक ओर इस्राएलो रे परमेशर यहोवे रिया तरफा खे फिरो, ताकि से अश्शूरो रे राजे रे आथो ते बची रे तुसा लोका रिया तरफा खे फिरो। 7 ओर आपणे बुजुर्गा ओर पाईया जेड़े नि बणो, जिने आपणे बुजुर्गा रे परमेशर यहोवे साथे विश्वासघात कित्तेया था ओर तिने से बेज्जतिया जोगा करी ता था, जेड़ा कि तुसे आपू देखणे लगी रे। 8 एबे आपणे बुजुर्गा जेड़ी हठ नि करो, बल्कि यहोवे रे वशो दे ऊई की तेसरी तेसा पवित्र जगा रे आओ, जो तिने सदा खे पवित्र करी राखी ओर आपणे परमेशर यहोवे री आराधना करो, ताकि तेसरा पड़केया रा गुस्‍सा तुसा पाँदा ते दूर ऊई जाओ। 9 जे तुसे यहोवे रिया तरफा खे फिरोगे, तो जो तुसा रे पाईया खे ओर बच्चेया खे बन्दी बणाई की लईगे रे, तिना तुसा रे पाईया ओर बच्चेया पाँदे दया करनी ओर सेयो एते देशो रे वापस आई सकोए, कऊँकि तुसा रा यहोवा परमेशर अनुग्रह करने वाल़ा ओर दयालु ए, ओर जे तुसे तेसरी तरफा खे फिरोगे तो तेस आपणा मूँ तुसा ते नि मोड़ना।" 10 ईंयाँ डाकिये एप्रैम ओर मनश्शे रे देशो रे शईरो-शईरो रे ऊँदे ऊए जबूलूनो तक गये, पर तिने तिना रिया आसिया लगाईया ओर तिना रा मजाक उडाया। 11 तेबे बी आशेर, मनश्शे ओर जबूलूनो बीचा ते कुछ लोक दीन ऊई की यरूशलेम शईरो खे आए। 12 यहूदा दे बी परमेशरो री एड़ी सामर्थ ऊई, कि सेयो एक मन ऊई की, जो आज्ञा राजा ओर परदाने यहोवे रे वचनो रे मुताबिक दित्ती थी, तेतेखे मानणे खे त्यार ऊए।

फसह रे त्‍योआरो रा मनाया जाणा

13 ईंयाँ जादा लोक यरूशलेम शईरो रे इजी खे कट्ठे ऊए, ताकि दूजे मीन्ने रे बिना सजेड़े री रोटिया रा त्योआर मनाओ ओर बऊत बड़ी सभा कट्ठी ऊई गी। 14 तेबे तिने उठी की यरूशलेम शईरो रिया बेदिया ओर तूप बाल़ने रिया सब जगा चकी की किद्रोन नाल़े रे सेटी तिया। 15 तेबे दूजे मीन्ने रे चौदुए दिने तिने फसह रे डांगर बलि कित्ते, तेबे पुरोईत ओर लेविये शर्मिंदा ऊए ओर आपू खे पवित्र करी की होमबलिया चढ़ाणे खे यहोवे रे मन्दरो रे ली आए। 16 सेयो आपणे नियमो रे मुताबिक, मतलब परमेशरो रे दास मूसे रे बिधानो रे मुताबिक, आपणी-आपणी जगा रे खड़े ऊए ओर पुरोईते होमबलिया रा खून लेविया रे आथो ते लई की छिड़की ता। 17 कऊँकि सभा रे बऊत एड़े थे जिने आपू खे पवित्र नि करी राखेया था, इजी री खातर सबी अशुद्ध लोका रे फसह रे डांगरा खे बलि करने रा अक्क लेविया खे दित्तेया, ताकि तिना खे यहोवे रिया तँईं पवित्र करो। 18 बऊत सारे लोके, मतलब एप्रैम, मनश्शे, इस्साकार ओर जबूलूना बीचा ते कई एड़े थे जो शुद्ध नि ऊई रे थे, तेबे बी सेयो फसह रे डांगरा रा मास लिखी री बिधिया रे खलाफ खाओ थे, कऊँकि हिजकिय्याहे तिना रिया तँईं ये प्रार्थना कित्ती थी कि यहोवा जो पला ए, से तिना सबी रे पाप टखी देयो। 19 जिने परमेशरो री, मतलब आपणे बुजुर्गा रे परमेशर यहोवे खे टोल़ने दे आपणा मन लगाई राखेया, चाए सेयो पवित्र जगा री बिधिया रे मुताबिक शुद्ध पनि ओ। 20 ओर यहोवे हिजकिय्याह री ये प्रार्थना सुणी की लोक ठीक कित्ते। 21 जो इस्राएली यरूशलेम शईरो रे आजीर थे, सेयो सात दिना तक बिना सजेड़े री रोटिया रा त्योआर बड़ी खुशिया साथे मनांदे रये ओर हर रोज लेविये ओर पुरोईत ऊच्ची आवाजा रे यहोवे खे बाजे बजांदे ऊए स्तुति करदे रये। 22 जितणे लेवी लोक यहोवे रा पजन समजा साथे करो थे, तिना खे हिजकिय्याहे शान्तिया रे वचन बोले। ईंयाँ सेयो मेलबलि चढ़ाई की ओर आपणे बुजुर्गा रे परमेशर यहोवे सामणे आपणे पापो खे मानदे रये ओर तेस ठराए रे त्योआरो रे साता दिना तक खांदे रये।

फसह रा त्योआर दूजी बार मनाया जाणा

23 तेबे सारी सभा रे लोके सलाह् कित्ती कि आसा सात दिन ओर त्योआर मनाणा, तेबे तिने सात दिन ओर खुशिया साथे त्योआर मनाया। 24 कऊँकि यहूदा रे हिजकिय्याह राजे सभा खे 1,000 बाच्छू ओर 7,000 पेडा-बाकरिया देईतिया ओर परदाने सभा खे 1,000 बाच्छू ओर 10,000 पेडा-बाकरिया दित्तिया ओर बऊत सारे पुरोईते आपू खे पवित्र कित्तेया। 25 तेबे पुरोईत ओर लेविया समेत यहूदा री सारी सभा, ओर इस्राएलो ते आए रे लोका री सभा ओर इस्राएलो रे देशो ते आए रे ओर यहूदा रे रणे वाल़े परदेशी, इने सबी खुशिया मनाईया। 26 ईंयाँ यरूशलेम शईरो दे बऊत खुशिया ऊईया, कऊँकि दाऊदो रे पाऊ इस्राएलो रे राजा सुलैमानो रे दिना ते एड़ी गल्ल यरूशलेम शईरो रे नि ऊई थी। 27 अन्तो रे लेवी पुरोईते खड़े ऊई की प्रजा खे आशीर्वाद दित्तेया ओर तिना री सुणी ओर तिना री प्रार्थना तेसरे पवित्र धामो तक, मतलब स्वर्गो तक पऊँची।

आपणा धर्म त्यागणे री मजदूरी

1 यहोवा इस्राएलिया ते बोलोआ, "मूसे बिधानो री कताबा दे लिखी राखेया, जे कोई आपणी लाड़िया खे तलाक देई देयो ओर से तेसगे ते जाई की केसी दूजे मर्दो साथे ब्या करी लो, तो क्या तेसा रा पईला लाड़ा तेसा गे फेर जाणा? क्या से देश बऊत अशुद्ध नि ऊई जाणा? यहोवे री ये बाणी ए कि तुसा गे ओर बी चूठे देवता ए, जेड़े कि तुसे बऊत सारे प्रेमिया साथे एकी वेश्या जेड़े रई चुके रे ओ। क्या तुसा एबे मेरी तरफा खे फिरना?"* 2 ओ इस्राएलियो, "हर पाह्ड़िया री चूँडिया पाँदे बणे दे मन्दरा खे देखो। क्या कोई एड़ी जगा ए जेती तुसे दूजे देवतेया री पूजा करी की आपू खे अशुद्ध नि करी राखेया ओ? तूँ बाटा दे एड़ी बैठी जेड़ा कोई अरबी माणूं शकार करने खे सुनसाण जगा दे घात लगाई की बैठी रा। तैं सारा देश चूठे देवतेया री मूर्तिया री पूजा करी की जेड़े परोसा तोड़ने वाल़ा व्याभिचार ओर दुष्टता साथे अशुद्ध करी ता रा। 3 इजी बजा ते बर्खा रोकी ती ओर पिछली बरसात नि ऊँदी; तेबे बी तेरा माथा वेश्या जेड़ा ए, तूँ शर्मिंदा ऊणा ई नि चाँदी।" 4 क्या तां एबे माखे आका पायी की बोलणा, "ओ मेरे बाओ, तूँ ई मेरे बचपनो रा साथी ए? 5 तुसे ये बी बोलेया, परमेशर सदा मां पाँदे रोष नि रणा। परमेशरो रा गुस्सा सदा बणेया दा नि रणा। यहूदा, तू ये सब बोलोई, पर तू तितणे ई पाप करोई जितणे तू करी सकोई।"

इस्राएल ओर यहूदा खे पश्चाताप करना पड़ना

6 एक दिन यहूदा प्रदेशो रे योशिय्याह राजे रे दिना दे यहोवे मांगे ईंयाँ बी बोलेया, "क्या तैं देखी राखेया कि पटकणे वाल़े इस्राएलो रे लोके क्या करी राखेया? तिने सारे ऊच्चे पाह्ड़ा पाँदे ओर सारे अरे डाल़ा निठे जाई-जाई की व्याभिचार करी राखेया।" 7 तेबे मैं सोचेया कि जेबे इस्राएली इना सारे कामा करी चुकोगे, तेबे मेरी तरफा खे फिरी जाणे, पर सेयो नि फिरे ओर तेसरी तोखा देणे वाल़ी बईण यहूदा रे राज्य रे लोके ये सब कुछ देखेया। 8 फेर मैं देखेया, जेबे मैं पटकणे वाल़ी इस्राएलो खे तेसारे व्याभिचार करने रिया बजा ते छाडी की तेसा खे फारगती कागज देईता; तेबे तेसारी तोखा देणे वाल़ी बईण यहूदा नि डरी बल्कि से बी चूठे देवतेया री पूजा करी की आपणियां बईणी जेड़ी व्याभिचार करने वाल़ी ऊईगी। 9 तिना रे बेशर्म व्याभिचारी ऊणे रिया बजा ते देश बी अशुद्ध ऊईगा, तिने पात्थर ओर डाल़ा री पूजा करी की व्याभिचार कित्तेया। 10 इतणा ऊणे ते बाद बी तेसारी तोखा करने वाल़ी बईण यहूदा पूरे मनो ते मेरी तरफा खे नि फिरी, पर कपटो साथे, यहोवे री येई बाणी ए। 11 यहोवे माखे बोलेया, "पटकणे वाल़े इस्राएलो रे लोक, यहूदा रे लोका ते निर्दोष निकल़ी रे। 12 तूँ जाई की इस्राएलो रे उत्तर दिशा दे ये प्रचार कर कि यहोवा ईंयाँ बोलोआ कि ओ इस्राएलो रे पटकणे वाल़े लोको वापस आओ, मां तुसा पाँदे रोष नि करना, कऊँकि यहोवे री ये बाणी ए, आऊँ दया करने वाल़ा ए, मां सदा रोष नि करना। 13 बस आपणे इना पापा खे मानी लो कि तुसे आपणे परमेशर यहोवे ते फिरी गे ओर सारे अरे डाल़ा निठे ओरे-पोरे गये ओर पराये देवतेया री पूजा कित्ती ओर मेरी गल्ला नि मानियां, यहोवे री येई बाणी ए। 14 ओ पटकणे वाल़े लोको मांगे वापस आओ, आऊँ तुसा रा स्वामी ए, यहोवे री येई बाणी ए। जे तुसे वापस आओगे, तो तुसा रे हर शईरो बीचा ते एक ओर हर कुलो बीचा ते दूई खे लई की मां सिय्योनो रे पऊँचाई देणे। 15 मां तुसा खे आपणे मनो साथे मेल खाणे वाल़े गवाल़े देणे, जिना ज्ञान ओर बुद्धिया साथे तुसे चराणे। 16 तिना दिना रे जेबे तुसे एस देशो रे बढ़ोगे ओर फलो-फूलोगे, तेबे तुसा रे लोका फेर एड़ा नि बोलणा कि यहोवे री वाचा रा सन्दूक। यहोवे री ये बी बाणी ए। तिना रा विचार बी तेसरे मनो रे नि आऊणा, ना लोका तिजी रे ना रणे ते फिकर करनी ओर ना तिजी री मरम्मत ऊणी। 17 तेस बखते यरूशलेम शईरो खे यहोवे रा सिंहासन बोलेया जाणा ओर सारिया जातिया मेरे नाओं री खातर तेस यरूशलेम शईरो दे स्तुति करने रिया तँईं कट्ठिया ऊणिया, सेयो फेर आपणे बुरे मनो पाँदे नि चलणे। 18 तिना दिना रे यहूदा रा कराना इस्राएलो रे कराने साथे चलेया करना ओर सेयो दोनो मिली की उत्तर दिशा ते एस देशो रे आऊणे, जो मैं तिना रे बुजुर्गा खे तिना रा इस्सा करी की देई राखेया था।"