1 यहोवे री ये बाणी ए, "लाणत ए मेरे बिद्रोह करने वाल़ेया बच्चेया खे जो योजना तो करोए पर मेरी तरफा ते नि, वाचा तो बानोए पर मेरी आत्मा रे सिखाए दे नि ओर ईंयाँ आपणे सिरो पाँदे पापो पाँदे पाप चढ़ांदे रओए।* 2 सेयो मांते बिना पूछे मिस्र देशो खे जाओए, ताकि सेयो मिस्र देशो दे आसरा लई सको ओर मिस्रो रा राजा फिरौन तिना री रक्षा करो। 3 इजी बजा ते मिस्रो रे फिरौनो रे आसरे री जगा तुसा री शर्मा रा ओर मिस्रो दे आसरा लणा तुसा री निन्दा री बजा ऊणा। 4 यहूदा रे राजे रे जरीये पेजे दे हाकिम सोअन शईरो दे तो आई रे ओर तेथो रे दूत एबे हानेस शईरो दे पऊँची रे। 5 सेयो सारे एक एड़ी जातिया रिया बजा ते शर्मिंदा ऊणे, जेते कि तिना रा कोई फायदा नि ऊणा, जो मताद ओर फायदे रे बदले शर्म ओर बेज्जतिया री बजा ऊणी।" 6 यशायाह खे ये वचन दक्खणा रे बणो रे जानवरा रे बारे दे मिलेया: सेयो आपणी तअन-सम्पत्ति जवान गह्देया पाँदे ओर आपणे खजाने ऊँटा रे पाँदे लादी की, मुसीबत ओर कष्टो रे देशो रिये ऊई की, जेती शेर ओर शेरनी, नाग ओर उडणे वाल़े तेज विषो वाल़े साप रओए, तिना लोका गे जाणे लगी रे, जिना ते तिना खे कोई फायदा नि ऊणा। 7 मिस्र देशो री मताद करने रे वादे बेकार ए! इजी री खातर आऊँ तेसखे राहाब बोलूँआ।*

8 यहोवे यशायाह खे बोलेया, "एबे जाई की इना गल्ला खे तिना सामणे पात्थरा पाँदे खण ओर कताबा दे लिख कि आऊणे वाल़े बखतो खे, बल्कि सदा खे गवाई बणी दी रओ। 9 कऊँकि यहूदा रे लोक बगावत करने वाल़े लोक ओर चूठ बोलणे वाल़े ए, जो परमेशरो री शिक्षा खे नि सुणना चांदे।" 10 सेयो दर्शण देखणे वाल़ेया खे बोलोए, "दर्शण नि देखो" ओर नबिया खे बोलोए, "आसा खे ठीक भविष्यबाणी नि करो, आसा गे मीठिया-मीठिया गल्ला बोलो, तोखा देणे वाल़ी भविष्यबाणी करो। 11 बाटा ते मुड़ो, बाटा ते अटो ओर इस्राएलो रे पवित्र परमेशरो खे आसा सामणे ते दूर करो।" 12 इजी बजा ए इस्राएलो रा पवित्र परमेशर ईंयाँ बोलोआ, "तुसे लोक जो मेरिया इना गल्ला खे बेकार जाणोए ओर अन्देर ओर बुराईया पाँदे परोसा करी की तिना पाँदे ई त्यान लगाओए, 13 इजी बजा ते तुसा रा ये पाप तुसा खे एड़ा ऊणा जेड़ा कि कोई केसी ऊच्ची दवाला दे खीड़ आई री ओ ओर से टल़ने वाल़ी ओ ओर से टुटी की अचाणक टल़ीगी ओ। 14 तुसे कुम्हारो रे तिना पांडेया जेड़े ऊई जाणे जो फूटी की चूर-चूर ऊई जाओए ओर तिना रा एक बी टुकड़ा इतणा बड़ा नि रँदा जेते दे आग लई सको या अऊदो ते पाणी निकयाल़ी सको।" 15 परमेशर यहोवा, इस्राएलो रा पवित्र ईंयाँ बोलोआ, "जे तुसे मां नेड़े वापस आई जाओ ओर चुपचाप मां पाँदे परोसा करो तेबे तुसे बची जाणे। तुसा रा मां पाँदे परोसा राखणे दे उद्धार ए, शान्त रणे दे ओर परोसा राखणे दे तुसा री वीरता ए। पर तुसे एड़ा नि कित्तेया।" 16 तुसे बोलेया, "ना, आसा तो कोड़ेया पाँदे बैठी की नठणा," इजी री खातर तुसे नठणे; ओर ये बी बोलेया, "आसा एड़े कोड़ेया पाँदे नठणा जो बऊत तेज नठोए," इजी री खातर तुसा रा पीछा करने वाल़े तुसा रे दुश्मण तुसा ते बी तेज ऊणे। 17 एकी दुश्मण सिपाईए री तमकिया तेई तुसा रे एक ह्जार सिपाई नठणे ओर पाँजा सिपाईया री तमकिया ते तुसे एड़े नठणे कि अन्तो दे तुसे पाह्ड़ो री चूँडिया रे डण्डे या चूँडिया पाँदले चण्डे जेड़े रयी जाणे जिना खे नशाणिया रिया तँईं लगाओए।

18 तेबे बी परमेशर इजी रिया तँईं देरी करोआ ताकि तुसा पाँदे अनुग्रह करो ओर इजी री खातर से ऊच्चे उठणा ताकि तुसा पाँदे दया करो, कऊँकि परमेशर यहोवा न्यायी परमेशर ए; सेयो माणूं कितणे तन्य ए जो तेस पाँदे उम्मीद लगाई राखोए। 19 ओ सिय्योनो रे लोको, तुसे यरूशलेम शईरो दे बसे दे रओ, तुसे फेर कदी नि रोणे, तेस तुसा रे मतादा खे रोणे खे सुणदे ई तुसा पाँदे जरूर दया करनी, तेस सुणदे ई तुसा री मानणी। 20 चाए परमेशर यहोवा तुसा खे मुसीबता री रोटी ओर दु:खो रा पाणी बी देयोगा, तेबे बी तुसा रे सिखाणे वाल़े फेर नि लूको ओर तुसा आपणियां आखी साथे आपणे सिखाणे वाल़े देखदे रणे। 21 जेबे तुसे कदी दाँणे या खूँजे कनारे मुड़ने लगो, तेबे यहोवे रा ये वचन तुसा रे कानो दे पड़ना, "बाट येई ए, एते पाँदे ई चलो।" 22 तेबे तुसा से चाँदी जेते साथे तुसा रिया मूर्तिया मढ़ी राखिया ओर से सूईना जेते साथे तुसा री कअड़ी रिया मूर्तिया सजी रिया, अशुद्ध करनिया, तुसा सेयो फटे-पुराणे टाल्ले जेड़िया सेटी देणियां ओर बोलणा, "आसा खे तुसा री जरूरत नि ए।" 23 तेबे तेस तुसा रिया तँईं पाणी बरसाणा ताकि तुसे डोरू बायी सको, जेतेरिया बजा ते जमीना दे नज्ज बढ़िया ओर बऊत पजणा। तेस बखते तुसा रे डांगरा खे लाम्बा-चौड़ा मदान चरने खे मिलणा। 24 तेबे बल़द ओर गह्दे जो तुसा रे डोरू बाणे रे कामे आऊणे, तिना सूप ओर छाजो साथे फड़ाके रा स्वाद चारा खाणा। 25 तिना दिना दे यहूदा रे दुश्मणा खे दित्ती दी सजा पाँदे जेबे गुम्मट टल़ने, तेबे सारे ऊच्चे-ऊच्चे पाह्ड़ो ओर पाह्ड़िया पाँदे नाल़िया ओर सूबल़ा मिलणिया। 26 तेस बखते परमेशरो आपणी प्रजा रा जख़्म बानणा ओर जेती तिना रे बूड़ी रणी से ठीक करनी, तेबे चाँदो रा प्रयासा सूरजो जेड़ा ओर सूरजो रा प्रयासा सातगुणा ऊई जाणा, मतलब अफ़्ते रा प्रयासा एकी दिनो दे ऊणा।

27 देखो, यहोवा आपू दूरा ते चली की आऊणे लगी रा, तेसरा रोष पड़की गा रा ओर तुएँ रा बादल़ उठणे लगी रा, तेसरे ओठ रोषो रिया बजा ते फड़फड़ाणे लगी रे ओर तेसरी जीब आगी री लूपिया जेड़ी ए। 28 तेसरा साआ तेसा बाढ़ा जेड़ा ए जो गल़े तक पऊँचोई, तेस सारी जातिया नाशो रे सूपो साथे फड़ाकणियां ओर देश-देशो रे लोका खे फड़ाकणे खे तिना रे जबड़ेया दे लगाम लगाणी। 29 तेबे तुसा पवित्र त्योआरो री राती जेड़ा गीत गाणा ओर जेड़ा लोक यहोवे रे पाह्ड़ो* रिया तरफा खे मिलणे खे, जो इस्राएलो री चट्टान ए, बँसरी बजांदे ऊए जाओए, तेड़ी ई तुसा रे मनो दे खुशी ऊणी। 30 ओर यहोवे आपणी प्रतापी बाणी सुनाणी ओर आपणा रोष पड़कांदा ओर आगी री लूपिया साथे स्वा करदा ऊआ ओर प्रचण्ड तूफान ओर बऊत बर्खा ओर ओल़ेया साथे आपणियां बाँई री तागत दखाणी।* 31 अश्शूर यहोवे री आवाजा री शक्तिया साथे नाश ऊई जाणा, तेस तेसदे सोठे साथे बाणी। 32 जेबे-जेबे यहोवे तेसखे सजा देणी, तेबे साथे-साथे बीणा ओर डफली बजणी ओर तेस आथ बढ़ाई की से लगातार खत्म करदे रणा। 33 बऊत दिना ते तोपेत* त्यार करी राखेया, से सीरिया रे राजे खेई ठराई राखेया, से लाम्बा-चौड़ा ओर डूगा बी बणाई राखेया, तेथो री चिता दे आग ओर बऊत सारे लकड़ू ए, यहोवे रे साओ बल़ी री गन्धको री खाड्डा जेड़ा से सुलगाणी।