1 माणूं आपणे मनो दे बऊत योजना बणाओआ,

पर यहोवा से आ जो ये पक्का करोआ कि क्या ऊणा चाईयो।

2 माणूंए रा सारा चाल-चलण तेसरिया आपणी नजरा रे पवित्र ठईरोआ,

पर यहोवा माणूंए रे मनो खे परखोआ।

3 आपणे सारे कामा खे यहोवे गे देई दे,

इजी ते तेरिया इच्छा पुरिया ऊणिया।

4 यहोवे हर एक चीज खास मकसदो साथे बणाई राखी,

बल्कि दुष्ट बी मुसीबत पुगतणे खे बणाई राखेया।*

5 जिना रे मनो रे कमण्ड ओआ, तिना सबी ते यहोवा नफरत करोआ,

आऊँ पक्का ऊई की बोलूँआ कि एड़ेया लोका खे तेस पक्का सजा देणी।

6 पापो रा प्राश्चित कृपा ओर सच्चाईया साथे ओआ,

ओर यहोवे रा आदर करने ते माणूं बुराई करने ते बची जाओआ।

7 जेबे यहोवा केसी माणूंए रे चाल-चलणो ते खुश ओआ,

तेबे से तेसरे दुश्मणा खे बी तेसरे दोस्त बणाई देओआ।

8 अन्याय रे जरिये कमाए रे तन्नो रे बड़े फायदे ते,

न्याय ते थोड़ा जा तन्न मिलणा खरा ए।

9 माणूं आपणी योजना बणाओए,

पर यहोवा पक्का करोआ कि आसा केई जाणा।

10 राजे रे मुंए ते देववाणी निकल़ोई,

इजी खे तेसते पूली की बी अन्याय नि ऊँदा।

11 यहोवा चाओआ कि माणूं केसी बी चीजा रा बजन करने दे ईमानदार रओ,

ओर से चाओआ कि माणूं ईमानदारिया ते नापो। माणूं हर कामो दे ईमानदार ऊणे चाईयो।

12 बुरे काम करना राजेया खे घृणित लगोआ,

कऊँकि तिना री गद्दी न्याय, तर्मो साथे ई बणी दी रओई।

13 एक राजा सच्च सुणने ते खुश ओआ,

ओर जो लोक सच्च बोलोए राजा तिना ते प्यार करोआ।

14 जेबे राजा बऊत गुस्से रे ऊई जाओ तो पक्का केसी री मौत ऊई सकोई,

पर अक्लमंद माणूं आपणियां गल्ला ते तेसरे गुस्से खे ठण्डा करोआ।

15 जेबे राजा खुश ओआ तो तेबे से केसी खे बी जीवनदान देई सकोआ,

ये बादल़ो जेड़ा ओआ जो बसन्त ऋतुआ री बरखा देओआ।

16 बुद्धिया रा मिलणा शुद्ध सूईने खे मिलणे ते खरा ए,

ओर समजदार बणना चाँदिए रे मिलणे ते बऊत खरा ए।

17 तर्मी लोक बुरिया बाटा ते दूर रओए,

ओर इजी रे बारे दे सोचोए कि सेओ कुण जिया बाटा दे चलणे लगी रे।

18 माणूं नाशो ते पईले गर्व ओर ठोकर खाणे ते पईले कमण्ड करोआ।

19 कमण्डिया साथे लूट बांडणे ते, गरीब लोका साथे नम्र सबाओ ते रणा खरा ए।

20 जो माणूं वचन सुणने खे मन लगाओआ, तेसरा कल्याण ओआ,

ओर जो यहोवे पाँदे परोसा राखोआ, से तअन्य ओआ।

21 जेसरे मनो रे बुद्धि ए, तेसखे समजदार बोलेया जाओआ,

ओर मीठा बोलणे ते ज्ञान बढ़ोआ।

22 जेसगे बुद्धि ए, तेसखे से जिन्दगिया रे बराबर ए,

पर मूर्खा खे शिक्षा देणा मूर्खता ईए।

23 अक्लमंद माणूंए रे मुंए दे बी अक्ला रिया गल्ला रओईया,

ओर तेसरिया गल्ला रे शिक्षा रओई।

24 मनो खे अच्छे लगणे वाल़े वचन, सईतो जेड़े प्राणो खे मिठे लगोए,

ओर आड्डिया खे मजबूत करी देओए।

25 एड़ी बी बाट ए, जो माणूंआ खे सीदी लगोई,

पर तेतेरे अन्तो रे मौत ई मिलोई।

26 एक मजदुरो री पूख तेसते ओर मईणत कराओई,

कऊँकि से आपणी पूख मिटाणा चाओआ।

27 अधर्मी माणूं बुराई करने रे बारे दे सोचदा रओआ,

ओर तेसरिये गल्ले की आग लगी जाओई।

28 बुरा माणूं बऊत चगड़े करोआ,

ओर चूगली करने वाल़ा पक्के दोस्ता बीचे बी फूट पाई देओआ।

29 उड़दंगी माणूं आपणे पड़ोसिया खे बईकाई देओआ,

ओर तेसखे गल़त बाटा रिये लई चलोआ।

30 माणूं आखी ते साअरे करी की दूजेया रा नुकसान करने रे बारे दे सोचोआ,

ओर ओठ चबाणे वाल़ा बुराई करोआ।

31 सफेद बाल़ तर्मी माणूंए रा मुकुट ए,

सेयो तर्मो रिया बाटा दे चलणे ते मिलोआ।

32 देरा ते गुस्सा करना वीरता ए,

ओर आपणे मनो खे वशो रे राखणा शईरो खे जीतणे ते खरा ए।

33 न्याय करने रिया तँईं चिट्ठी पाई तो जाओई,

पर तिजी रा निकल़ना यहोवे रिया तरफा ते ओआ।*