1 ओ मेरे बच्चेयो, आपणे बाओ रिया शिक्षा खे त्यानो साथे सुणो,

ओर मन लगाई की समजो।

2 कऊँकि मैं तुसा खे खरी शिक्षा देई राखी;

मेरिया शिक्षा खे नि पुलणा।

3 सुणो, आऊँ बी आपणे बाओ रा छोटा पाऊ था,

ओर माया रा कल्ला छोटा प्यारा पाऊ था,

4 ओर मेरा बाओ माखे ये बोली की सिखांदा रओ था,

"तेरा मन मेरिया गल्ला पाँदे लगेया रा रओ;

तूँ मेरिया आज्ञा खे मानदा ऊआ आपणा जीवन बितांदा रओ।

5 बुद्धिया खे प्राप्त कर, समजा खे बी प्राप्त कर;

सेयो पूलणिया नि, ना मेरिया गल्ला मानणियां छाडणिया।

6 बुद्धिया खे नि छाड तेसा तेरी रक्षा करनी;

तेसा साथे प्यार राख तेसा तेरा पईरा देणा।

7 बुद्धि महान् ए इजी री खातर तिजी खे पाणे री कोशिश कर;

पर समजा खे हर किमती पाँदे आसिल करी लओ।

8 बुद्धिया ते प्रेम राख, तेसा तूँ बढ़ाणा;

जेबे तूँ तेसा साथे लिपटी जाए, तेबे तेसा तेरी इज्जत बढ़ाणी।

9 तेसा तेरे सिरो रे शोभा वाल़े गईणे बानणे;

ओर ताखे सुन्दर मुकुट देणा।"

10 ओ मेरे बच्चेयो, मेरिया गल्ला सुणी की मानया करो,

तेबे तुसे बऊत साला तक जिऊँदे रणे।

11 मैं ताखे बुद्धिया साथे चलणा बताई राखेया;

ओर सच्चाईया रिया बाटा रे चलाई राखेया।

12 जिदे चलणे रे ताखे कोई रोक-टोक नि ऊणी,

ओर चाए तूँ दौड़े, तेबे बी तांदे किजी ते बी ठोकर नि लगणी।

13 जो कुछ बी मैं ताखे सखाई राखेया, तिजी खे हमेशा याद राख;

इना दे बणेया रा रओ, कऊँकि येई तेरिया जिन्दगिया रा मकसद आ।

14 दुष्ट लोका रिया बाटा रे पैर पनि राखणा,

ओर ना ई बुरेया लोका रिया बाटा रे चलणा।

15 तिजी खे छाडी दे, तिजी ते दूर ई रणा,

तिजी ते दूर ई रई की आगे निकल़ी जा।

16 कऊँकि बुरे लोक जे केसी री बुराई नि करो,

तो तिना खे नींज नि आऊँदी ओर जदुए तक सेयो केसी खे नुकशाण नि पऊँचाओ,

तदुए तक तिना खे चैन नि मिलदा।

17 बुराई ओर उड़दंग तिना खे खाणे-पीणे जेड़ा ए।

18 पर तर्मिया री चाल मानो प्यागा रे प्रयासे जेड़ी ए,

जेतेरी चमक त्याड़िया तक जादा-जादा बढ़दी रओई।

19 बुरेया लोका री बाट अन्दकूप न्हेरा ए;

सेयो नि जाणदे कि सेयो किजी साथे ठोकर खाओए।

20 ओ मेरे बच्चेयो, मेरिया गल्ला त्यानो साथे सुण,

ओर आपणा कान मेरिया गल्ला पाँदे लगा।

21 इना खे आपणी आखी ते दूर नि ऊणे दे,

बल्कि आपणे मनो रे सम्बाल़ी की राख।

22 कऊँकि जिना खे सेयो मिलोईया, सेयो तिना रे जिऊँदे रणे रा,

ओर तिना रे सारे शरीरो रे ठीक ऊणे री बजा ओईया।

23 सबी ते जादा आपणे मनो री रक्षा कर,

कऊँकि जिन्दगिया रा मूल़ स्रोत सेईए।

24 टेडिया गल्ला तेरे मुंए ते नि निकल़ो,

ओर चालबाजिया री गल्ल बोलणी तांते दूर रओ।

25 तेरिया आखी सामणे रिया तरफा खे ई लगी रिया रओ,

ओर तेरिया आखी रिया पलका आगो खे ई खुलिया रओ।

26 जो बी तुसे करो, त्यानो साथे सोची की करो,

तो जो बी तुसा करना से सब सफल ऊणा।*

27 ना तो दाँणी तरफा के मुड़ना, ओर ना ई खूँजी तरफा खे;

आपणे पैर बुराईया री बाटा पाँदे चलणे ते टाई लओ।