1 ओ मेरे पाऊ, मेरिया अक्ला रिया गल्ला पाँदे त्यान दे,

मेरिया गल्ला समजणे रिया तँईं आपणे कान लगा;

2 तेबे ताखे पता लगी जाणा कि ठीक बर्ताओ किंयाँ कित्तेया जाओआ,

ओर तेरे शब्दा ते पता लगी जाणा कि तुँ समजदार ए।

3 कऊँकि बगानी जवाणसा रे ओठा ते सईत टपकोआ;

ओर तेसा रिया गल्ला तेलो ते बी जादा चिकणिया ओईया;

4 पर तेसा रे प्यारो रा नतीजा नागदौणे जैरो जेड़ा कऊड़ा

ओर दो ताअर वाल़ी तलवारी जेड़ा पैना ओआ।

5 तेसा तुसे मरेया रिया दुनिया दे लई जाणे,

से बाट जेथो खे जाओई से मौता री बाट ए।

6 तेबेई तो से जिन्दगिया रे बारे दे नि सोचदी,

तेसा रा चाल-चलण ठीक नि ए,

पर तिजी रे बारे से आपू पनि जाणदी।

7 इजी री खातर एबे ओ मेरे बच्चेयो, मेरी सुणो,

मेरे मुंए ते निकल़िया रिया गल्ला सुणी की मूँ नि मोड़ो।

8 बगानी जवाणसा ते दूर ई रएयो,

ओर तेसा रे कअरो री देऊल़ी पाँदे आपणे कदम पनि राखेयो;

9 केथी एड़ा नि ओ कि तूँ आपणी महिमा खोई दे जो तेरा तेरेया लोका बीचे आ,

ओर आपणी जवानिया देई निर्दयी माणूंए रे आथे मरी जाए;

10 या एड़ा नि ओ कि बगाने तेरिया कमाईया साथे आपणा पेट परो,

ओर ईंयाँ तेरी मईणती री कमाई परदेशिया रे कअरे चली जाओ;

11 ओर तूँ आपणी जिन्दगिया रे आखरी बखतो रे

जेबे तेरे शरीरो री तागत खत्म ऊई जाओ ओर तूँ रोन्दा रई जाए,

12 तेबे ता एड़ा बोलणा, "मैं ये सबक कऊँ नि सिखेया?

ओर जिने आऊँ समजाया तेसरी मैं केड़ी बेज्जती कित्ती!

13 मैं आपणे गुरूआ री शिक्षा नि सुणी

ओर आपणे सिखाणे वाल़ेया रे उपदेशा पाँदे त्यान नि दित्तेया।

14 एबे आऊँ सभा ओर मण्डल़िया बीचे

हमेशा बुराईया रे जाई की पड़ेया।"

15 सिर्फ आपणे ई कुएँ रा पाणी पिया करना।

ओर प्यार सिर्फ आपणियां ई लाड़िया साथे करना।

16 जो ल्वाद तुसा खे बगानिया जवाणसा ते मिलणी,

तिजी ते तुसा खे नुकशाण ई ऊणा।

17 आपणियां लाड़िया साथे ई मिले दे रणा,

बगानिया जवाणसा साथे नि।

18 तूँ आपणियां जवानिया री लाड़िया साथे तन्य ओ,

जेसा साथे तैं जवानिया दे ब्या करी राखेया,

19 से तेरिया तँईं प्यारी ईरणी ओर बांकी सांभरनिया जेड़ी ठईरो,

तेसा रे स्तन हमेशा ताखे संतुष्ट राखो,

ओर तूँ तेसा रे प्यारो दे सदा डूबेया रा रओ।

20 ओ मेरे पाऊ, तुँ व्याभिचार करने वाल़ी जवाणसा पाँदे कऊँ मोईत ओ,

ओर बगानी जवाणस तेरिया छातिया साथे कऊँ लगो?

21 कऊँकि माणूंआ रे सारे चाल-चलणो पाँदे यहोवे री नजर रओई,

ओर से तिना रिया सारिया बाटा खे देखदा रओआ।

22 बुरा माणूं आपणे ई बुरेया कामा रे जाल़ो दे फसणा,

ओर आपणे ई पापो दे फसेया रा रणा।

23 से शिक्षा खे ना मानणे रिया बजा ते मरी जाणा,

ओर आपणियां मूर्खता रिया बजा ते ओरे-पोरे पटकदा रणा।