1 इस्राएलो रे राजा सुलैमानो रे जो दाऊदो रा पाऊ ए तेसरे जरिये लिखे दे समजा रे वचन:

2 इना वचना खे पढ़ने वाल़ेया खे समज ओर शिक्षा मिलो,

ओर सई-गल़त, सच्च ओर चूठो दे फर्क समजो,

3 इना वचना रे जरिये तुसा आपणे जीवनो दे अनुशासन ओर काबू पाणा सिखणा, आपणा जीवन जीऊणा ओर सेओ काम करने जो सई ओर न्याय रे ओ।

4 ताकि जो माणूं पोल़ा-पाल़ा ए समजौतिया रिया गल्ला खे पढ़ी की उशयार बणो,

ओर जवाना खे ज्ञान ओर विवेक मिलो;

5 ताकि अक्लमंद इना वचना खे सुणी की आपणी बिद्या बढ़ाओ

ओर समजदार माणूं अक्ला री शिक्षा पाओ,

6 जेतेरे जरिए माणूं नसीअत ओर उदारणा रा मतलब समजो,

ओर अक्लमंद माणूंए रिया गल्ला ओर तिना रिया गईरिया गल्ला खे समजो।

7 यहोवे रा आदर करना बुद्धिया रा मूल़ ए,

बुद्धि ओर शिक्षा खे मूर्ख लोक ई तुच्छ जाणोए।

8 ओ मेरे पाऊआ, आपणे बाओ रिया शिक्षा खे त्यानो साथे सुणेया,

ओर देखेया, आपणियां माया री दित्ती री शिक्षा खे छाडदा;

9 तिना री शिक्षा मानो तेरे सिरो रिया तँईं बांका मुकुट,

ओर तेरे गल़े खे माल़ा जेड़ी ऊणी।

10 ओ मेरे पाऊ, जे पापी लोक ताखे बईकाओ,

तो तूँ तिना रिया गल्ला खे नि मानेया।

11 जे सेयो ताखे एड़ा बोलो, "आसा साथे आईजा,

ताकि आसे अत्या करने रिया ताका रे जाऊँए,

आसे निर्दोष माणूंए पाँदे अमला करूँए;

12 आओ, आसे अधलोको जेड़ा तिना खे जिऊँदे ई निगल़ी जाऊँए,

ओर तिना खे कब्रा रे पड़े रे मरेया जेड़े बणाई देऊँए।

13 आसा तिना रिया नेका-प्रकारा रिया कीमती चीजा लड़ाईया दे लूटी लणियां,

ओर आसा आपणे कअर तिना री लूटा रे समानो साथे परी देणे;

14 इजी खे तूँ आसा साथे साजी ऊई जा,

आसा सबी जणेया से लूट आपू बीचे बांडी लणी।"

15 तो, ओ मेरे पाऊआ, तूँ तिना रे जे काम नि करेया,

बल्कि तिना रिया बाटा रे पैर पनि राखणा;

16 कऊँकि सेयो बुराई करने खेई दौड़ोए,

ओर अत्या करने खे फुर्ती करोए।*

17 जेबे पंछी देखणे लगी रा ओ तेबे जाल़ बछाणा बेकार ओआ;

18 ओर यो लोक तो आपणी ई अत्या करने रिया तँईं घात लगाई राखोए,

ओर आपणे ई प्राण लणे रिया ताका रे लूकी रओए।

19 सारे लाल़ची माणूंआ रा लोब ई तिना रिया मौता री बजा बणना;

तिना रे प्राण लाल़चो रिया बजा ते नाश ऊई जाणे।

20 बुद्धि सड़का दे जोरे की बोलोई;

ओर चौका बीचे प्रचार करोई;

21 से बजारा रिया पीड़ा बीचे जोरे की आका पाओई;

से शईरो रे प्रवेश द्वारो पाँदे खड़ी ऊई की इना गल्ला खे बोलोई,

22 "ओ शरीफ लोको, तुसा कदुए तक शरीफताईया साथे प्यार राखणा?

ओर ओ ज्ञानो रा मजाक ड्वाणे वाल़ेयो, तुसा कदुए तक ज्ञानो रा मजाक ड्वांदे रणा?

ओर ओ मूर्खो, तुसा कदुए तक ज्ञानो ते बैर राखणा?

23 सुणो जेबे आऊँ तुसा खे बकुँई, आऊँ तुसा खे अच्छी सलाह देऊँगी ओर आपणे ज्ञानो खे तुसा साथे बाँडुंगी"

24 मैं तो आका पाईया, पर तुसे मेरी गल्ल मानणे ते ना करिती,

ओर मैं तुसा खे बुलाणे खे आपणे आथ ईलाए, पर तुसा बीचा ते किने बी त्यान नि दित्तेया,

25 बल्कि तुसे मेरी सलाह अणसुणी करिती,

ओर मेरी डाँट-फटकारा री कीमत नि जाणी;

26 इजी री खातर तुसा री मुसीबता पाँदे मां बी आसणा,

ओर जेबे तुसा पाँदे डर आऊणा, तेबे मां मजाक उडाणा।

27 बल्कि तूफानो जेड़ा तुसा पाँदे डर आऊणा,

ओर मुसीबत तुसा पाँदे प्रचण्ड अवा जेड़ी आऊणी

ओर तुसे संकट ओर कष्टो रे फसणे,

तेबे मां तुसा रा मजाक ड्वाणा।

28 तेस बखते तिना आऊँ आपणियां मतादा खे बुलाणी, पर तेस बखते मां तिना री नि सुणनी।

तिना माखे टोल़ने री कोशिश तो करनी, पर आऊँ तिना खे मिलणी नि।

29 कऊँकि तिने ज्ञानो रिया गल्ला मानणे ते ना कित्ती,

ओर तिने यहोवे रा डर ना मानणे रा फैंसला कित्तेया।

30 तिने मेरी सलाह लणी नि चायी,

बल्कि तिने मेरा बोलणा-बकणा बेकार समजेया।

31 इजी री खातर तिना खे बुरेया कामा रा नतीजा पुगतणा पड़ना,

ओर जो तुसे करी राखेया, तिजी ते तुसा खे ई आफत ऊणी।

32 बिना जानकारीया ते माणूं मरी जाओए कऊँकि सेओ समजा खे नि मानदे,

मूर्ख माणूं बी बर्बाद ऊई जाओए कऊँकि सेओ बेफिक्र ऊई कि बैठे दे रओए।

33 पर जो माणूं मेरी गल्ल सुणोगा, से बिना डरे बसेया रा रणा,

ओर मुसीबता ते बेफिकर ऊई की सुखो रे रणा।