1 ओ मेरे बच्चेयो, मेरिया गल्ला खे मानेया करो,

ओर मेरिया आज्ञा आपणे मनो दे राखणिया।

2 जे तुसे मेरिया आज्ञा खे मानेया करोगे तो तुसे जिऊँदे रणे,

ओर आपणियां आखी रिया पूतल़िया जेड़िया मेरिया शिक्षा खे किमती जाणेयो;

3 तिना खे छापा जेड़िया आपणियां गूठिया रे पईनी लओ;

ओर तिना खे आपणे दिलो री पट्टिया पाँदे लिखी लओ।

4 ओर बुद्धिया खे ये बोल, "तूँ मेरी बईण ए,"

ओर समजा खे आपणे टब्बरो री समजी की बुलाई लओ;

5 तेबे तूँ बगानी जवाणसा ते बचणा,

जो चिकणी चुपड़ी गल्ला करी की फसाओईया।

6 मैं एक दिन आपणे कअरो री दवारिया ते,

मतलब आपणे चरोखे ते चाँकी कि बारे देखेया,

7 तेबे मैं सीदे-सादे लोका री पीड़ा बीचे

एक नासमज जवान देखेया;

8 से तेसा सड़का रिये गया जो तेसा जवाणसा रे कअरो रे नेड़े रिये जाओ थी,

ओर से तेसा रे कअरो रिया बाटा रिये गया।

9 तेस बखते त्याड़ा छपी गा था ओर साँज ऊई गी थी,

बल्कि राती रा अन्दकूप न्हेरा ऊईगा रा था।

10 ओर मैं देखेया कि तेसखे बाटा रे एक जवाणस मिली,

जेसा रा पेष वेश्या जेड़ा था ओर से बऊत चलाक थी।

11 से जोरे कि गल्ला करने वाल़ी जवाणस थी, जो बरोद करो थी,

ओर से आपणे कअरे नि टीको थी;

12 कदी से सड़का रे, कदी चौको रे मिलो थी

ओर से हर मोड़ो पाँदे आपणे शकारो री ताका रे बैठी री रओ थी।

13 तेबे तेसे से जवान पकड़ी की चूम्मेया,

ओर बेशर्म ऊई की तेस जवानो खे बोलेया,

14 "मैं आज ई मेलबलि चढ़ाई राखी,

ओर आपणियां मान्नता आज ई पुरिया करी राखिया;

15 इजी बजा ते आऊँ तां साथे मिलणे खे निकल़ी,

आऊँ ताखे टोल़ू थी ओर तूँ माखे एबु मिली रा।

16 मैं आपणे बछौणे सजाई राखे,

तिजी पाँदे मिस्र देशो रे बेलबूटे री कढ़ाईया कित्ती री रेशमो री चादर बछयाई राखी;

17 मैं आपणे बछौणे पाँदे गन्धरस,

अगर ओर दाल़चीनी खुशबुदार चीजा छिड़की राखिया।

18 इजी री खातर एबे चल आसे प्यारो साथे प्यागा तक जिऊ बह्यीलाऊँए,

आसे आपू बीचले प्यारो ते एकी-दूजे खे खुश करिए।

19 कऊँकि मेरा लाड़ा कअरे नि ए,

से दूर देशो रे बऊत दिना री यात्रा रे जाई रा।

20 से आपू साथे बऊत पैसे लईगा रा ए;

ओर से दूई अफ़्तेया तक वापस नि आऊणा।"

21 एड़िया ई गल्ला बोली-बोली की तेसे जवाणसे से मर्द फसाईता रा;

ओर आपणियां मीठिया-मीठिया गल्ला करी की से आपणे वशो रे करिता रा।

22 से फटाफट तेसा पीछे चली पड़ेया,

जिंयाँ बल़द कसाई-खाने दे या बेड़िया पईने रे कोई मूर्ख मार खाणे खे जाओआ।

23 अन्तो रे तेस जवानो रा काल़जा तीरो साथे ऊजेया जाणा,

से तेसा चिड़िया जेड़ा ए जो फन्दे रिया तरफा खे तेज उडोई

ओर जाणदी नि कि तिदे मेरे प्राण चली जाणे।

24 एबे ओ मेरे बच्चेयो, सुणो,

ओर मेरिया गल्ला पाँदे त्यान देओ।

25 तेरा मन एड़िया जवाणसा रिया गल्ला कनारो खे नि फिरो,

ओर तेसा रिया बाटा रे पूली की पनि जाणा;

26 कऊँकि तेसे जवाणसे बऊत लोक काईते रे,

तेसा रे जरिये काये रे लोका री गिणती बऊत जादा ए।

27 जे तुसे एड़िया जवाणसा रे कअरे जाओए, तो तुसे मरेया रेया री दुनिया रिया बाटा दे जाओए।

ये बऊत ई जल्दी मौता रिया तरफा खे जाणे वाल़ी बाट ए।