1 छल करने वाल़ेया ते यहोवा नफरत करोआ जो कम तोलोए,

पर से पूरा नापणे वाल़ेया ते खुश ओआ।

2 जेबे कमण्ड ओआ, तेबे बेज्जती बी ओई,

पर बुद्धिमान लोक सब्रखोर ओए।

3 सीदेया लोका रा चलणा ई तिना रा आगे बढ़ना ए,

पर विश्वासघाती आपणियां बुरिया चाला ते नाश ऊई जाओए।

4 जेस दिने परमेशर गुस्से ओआ, तेस दिने पैसा बी कामे नि आऊँदा,

पर ईमानदारी मौता ते बी बचाओई।

5 ईमानदारिया ते खरे माणूंए री जिंदगी आसान ऊई जाओई,

पर दुष्टा रा नाश तिना रिया बुराईया रिया बजा ते ऊई जाणा।

6 सीदे लोका रा बचाव तिना रिया तार्मिकता रिया बजा ते ओआ,

पर विश्वासघाती लोक आपणे ई लाल़चो रिया बजा ते फसोए।

7 जेबे दुष्ट माणूं मरोआ, तेबे तेसरी आशा टूटी जाओई,

ओर पापिए रा परोसा टुटी जाओआ।

8 तर्मी मुसीबता ते तो छूटी जाओआ,

पर दुष्ट तेसा ई मुसीबता रे पड़ी जाओआ।

9 जो यहोवे खे नि मानदा, से आपणे पड़ोसिये खे आपणे मुंए रिया गल्ला ते बिगाड़ोआ,

पर तर्मी लोक ज्ञानो रे जरिए बची जाओए।

10 जेबे तर्मिया रा कल्याण ओआ, तेबे शईरो रे लोक खुश ओए,

पर जेबे दुष्ट नाश ओए, तेबे शईरो दे जयजयकार ओई।

11 तर्मी लोका रे आशीर्वादो ते शईरो री बढ़ोतरी ओई,

पर बुरेया लोका री गल्ला ते से टाल़ेया जाओआ।

12 से मूर्ख माणूं ए, जो आपणे पड़ोसिये खे तुच्छ जाणोआ,

पर समजदार माणूं चुपचाप रओआ।

13 जो आपणे पड़ोसिये री चुगली करदा रओआ, से पेतो रिया गल्ला बताओआ,

पर परोसा करने जोगा माणूं गल्ल लकोई राखोआ।

14 जेते देशो दे अक्लमंद परदान नि ऊँदा, तेथो री प्रजा मुसीबता रे पड़ी जाओई,

पर सई सलाह देणे वाल़ेया रिया बजा ते तेते शईरो रा बचाव ओआ।

15 जो परदेशिये री जिम्मेबारी लओआ, तेसखे बऊत दु:ख ओआ,

पर जो जिम्मेवारिया ते नफरत करोआ, से डरदा नि।

16 दया करने वाल़ी जवाणस मान-मर्यादा नि खोंदी,

ओर हुड़दंगी लोक पैसे खे नि खोंदे।

17 दया करने वाल़ा माणूं आपणा ई पला करोआ,

पर जो क्रूर ए, से आपणे ई शरीरो खे दु:ख देओआ।

18 दुष्ट माणूंआ खे सच्चो खे ई कुछ पनि मिलदा,

पर सई काम करने वाल़ेया खे पक्का फल मिलोआ।

19 जिने किने बी सई काम करने रा मन बणाई ला रा ए से जिऊँदा रणा,

पर जो बुराईया रा पीछा करोआ, से मरी जाणा।

20 यहोवा तिना ते नफरत करोआ जो मनो रे टेडे ए,

पर जिना रा चाल-चलण तर्मो रा ए, से तिना ते खुश रओआ।

21 आऊँ मजबूतिया साथे बोलूँआ, बुरा माणूं निर्दोष नि ठईरना,

पर तर्मिये रा कुल बचाया जाणा।

22 जो सुन्दर जवाणस समज नि राखदी,

से नाको रे सूईने रा बाल़ू पईनी की सूंरिया जेड़ी ए।

23 तर्मिये री इच्छा तो बस पलाईया री ई ओई,

पर बुरेया लोका री उम्मीदा रा फल परमेशरो रा गुस्सा ई ओआ।

24 एड़े ए, जो बखेरी देओए, तेबे बी तिना री बढ़ोतरी ओई;

ओर एड़े बीए जो सामर्था ते कम देओए ओर इजी ते तिना खे कमी ई ओई।*

25 खुले दिलो ते देणे वाल़ा माणूं खरा ओआ,

ओर जो ओरी रा पला करोआ, तेसरा बी पला ई ऊणा।

26 जो माणूं जरूरती से जादा नज्जो खे आपू गे लकोई की राखोआ, तेसखे लोक स्राप देओए,

पर जो तिजी खे बेची देओआ, तेसखे आशीर्वाद दित्तेया जाओआ।

27 जो जिऊए ते पलाई करोआ, से ओरी री खुशी टोल़ोआ,

पर जो दूजे दे बुराईया खे टोल़ोआ, तेस पाँदे ई बुराई आई जाओई।

28 जो आपणे पैसे पाँदे परोसा राखोआ, से सूकेया पत्तेया जेड़ा गिरी जाओआ,

पर तर्मी माणूं नये पत्ते जेड़े लईरांदे रओए।

29 जो माणूं आपणे कराने खे तोड़ी की दु:ख देओआ, तेसरे इस्से दे कुछ नि आऊणा,

ओर मूर्ख माणूं अक्लमंदो रा दास ऊई जाओआ।

30 तर्मिये रा फल जिन्दगिया रा डाल़ ओआ,

ओर अक्लमंद माणूं, ओरी माणूंआ रा मन जीती लओआ।

31 देख, तर्मी माणूंए खे तरतिया पाँदे आशीष मिलणी,

तो पक्का ए कि दुष्ट ओर पापिया खे बी तिना रे पापो री सजा मिलणी।*