1 बऊत जादा मसाला मिला ऊआ अंगूरा का रस पीणे ते माणूंआ बीचे लड़ाई-चगड़ा ऊई जाओआ,

नशे दे रणा अक्लमंदी नि ए।

2 राजे रा गुस्सा जवान शेरो रे गरजणे जेड़ा खतरनाक ए;

जो तेसखे गुस्सा दिलाओआ, से आपणे प्राणो रा पापी ओआ।

3 लड़ाई-चगड़े ते पीछे आटणा, मर्दो री महिमा ठईरोई;

पर सारे मूर्ख लोक लड़ने खे त्यार रओए।

4 आल़सी माणूं ठीक बखतो पाँदे ठण्डी रिया बजा ते अल़ नि बांदा;

इजी री खातर बडाईया रे बखते तेसखे मांगणे ते बी कुछ नि मिलदा।

5 माणूंए रे मनो रे बऊत योजना तो ओईया,

तेबे बी समजदार माणूं तिजी खे निकयाल़ी देओआ।

6 बऊत सारे माणूं आपणी कृपा रा टंडोरा पिटोए;

पर सच्चा माणूं मिलणा बऊत ई कठण ए।

7 तर्मी जो खराईया ते चलदा रओआ,

तेसते बाद तेसरे बाल-बच्चे भाग्यशाली ओए।

8 राजा जो न्याय री गद्दिया पाँदे बैठेया करोआ,

से आपणी नजरा तेई सारी बुराईया खे जाणी लओआ।

9 कोई नि बोली सकदा कि मैं आपणा मन शुद्ध करिता रा;

या आऊँ पापो ते शुद्ध ऊईगा रा?

10 यहोवा एड़ेया माणूंआ ते नफरत करोआ जो गल़त बट्टेया रा ओर गल़त नापो रा इस्तेमाल करोए।

11 बच्चे बी आपणे कामो रे जरिये ये दखाओए कि आसे बी केड़े माणूं ए,

तुसे दसी सकोए कि सेओ सच्चे ओर पले कि नई।

12 सुणने खे जो कान ओर देखणे खे जो आखी आ,

सेयो दोनो यहोवे बणाई राखिया।

13 जादा नि सऊंदे रणा, नई तो गरीब ऊई जाणा;

आखी खोल तेबे तूँ रोटिया साथे रज्जणा।

14 मोले लणे रे बखते ग्राह्क बोलदे रओए कि ये बऊत किमती ए,

पर जेबे चली जाओए, तेबे से जाईकी कमण्ड करोए ओर बोलोए कि आसे से सस्ता खरीदेया ए।

15 माणूंए गे सूईना ओर बऊत कीमती रत्न तो अए;

पर ज्ञानो रिया गल्ला ई कीमती मणि ठईरी रिया।

16 केसी पाखले माणूंए रिया तँईं जमानत देणे वाल़े रे टाल्ले लई लओ,

ओर पराए रिया खातर जो जिम्मेबार ऊईरा, तेसते रईनो रिया चीजा लई लओ।

17 चोरी करी की लयाई री रोटी माणूंए खे मीठी लगोई,

पर बादो ते तेसरा मूँ रोड़िया साथे परे जेड़ा बणी जाओआ।

18 सब इच्छा सलाई तेई स्थिर ओईया,

ओर युद्ध करने ते पईले योजना बणाई लणी चाईयो।

19 जो चुगली करदा फिरोआ से पेत बताई देओआ,

इजी री खातर बकवास करने वाल़े साथे मेल जोल नि राखणा चाईयो।

20 जो आपणे माए-बाओ खे कोसोआ, तो से छोड़ ई मरी जाणा,

ओर तेसरा जीवन एक एड़े दिऊए जेड़ा खत्म ऊई जाणा जो न्हेरे दे बिजी जाओआ।

21 जितणिया सानिया दे तुसा खे जायदात मिलणी,

तिदे तुसा खे कुछ बी आशीष नि ऊणी।

22 ईंयाँ नि बोल, "मां बुराईया रा बदला लणा,"

बल्कि यहोवे पाँदे परोसा राख, तेस तूँ छुड़ाणा।*

23 नकली बट्टेया ते यहोवा नफरत करोआ,

ओर तोखे री ताकड़ी ठीक नि ए।

24 कुछ ऊणे ते पईले कोई बी माणूं जाणी नि सकदा कि क्या ऊणे वाल़ा ए?

क्ऊँकि माणूंए री बाट यहोवे रिया तरफा तेई ठईराई जाओई।

25 परमेशरो ते वादा करने ते पईले त्यानो साथे सोचणा,

ऊई सकोआ कि तुसे लोक से काम नि करी सको जो करने रा वादा कित्तेया था।

26 अक्लमंद राजा बुरा करने वाल़ेया लोका रा पता लगाओआ,

ओर तिना खे बिना दया ते सख्त सजा देओआ।

27 माणूंए री आत्मा यहोवे रा दिऊआ ए, तीजी ते से मनो रिया सबी गल्ला खे टोल़ोआ।*

28 राजे री रक्षा कृपा ओर सच्चाईया रिया बजा ते ओई,

ओर न्याय करने ते तेसरी गद्दी बणी री रओई।

29 जवान माणूंआ री तागत तिना री शान ए,

पर स्याणेया री शोभा तिना रे सफेद बाल़ ए।

30 कई बार म्हारे जीवनो खे बदलणे रिया तँईं एक काओ रा ऊणा जरूरी ओआ।

ओर मार खाणे ते मन साफ ऊई जाओआ।