1 ओ मेरे बच्चेयो, मेरिया शिक्षा खे नि पूलेयो,

आपणे दिलो दे मेरिया आज्ञा खे याद राखेयो;

2 कऊँकि एड़ा करने ते तेरी उम्र बढ़नी,

ओर तूँ जादा शान्तिया साथे रणा।

3 दया ओर सच्चाई तांते लग नि ओ,

बल्कि सेयो आपणे गल़े रे आरो जेड़िया बनाणियां,

ओर आपणे दिलो री पट्टिया पाँदे लिखी देणियां।*

4 जे तू एड़ा करे तो तां परमेशर ओर माणूं दुँईं री दया पाणी,

तूँ बऊत अक्लमंद ऊणा।*

5 तैं आपणियां समजा रा साअरा नि लणा,

बल्कि पूरे मनो ते यहोवे पाँदे परोसा राखणा।

6 तुसे जो कुछ बी करोए तिदे यहोवे खे याद राखो,

ओर तेस तुसा खे सई बाट दखाणी।

7 तैं आपू खे आपणियां नजरा रे अक्लमंद नि समजणा,

यहोवे रा डर मानणा, ओर बुराईया ते लग रणा।*

8 जे तू एड़ा करेगा, तो ये एक अच्छी दवा रे जेड़ा ऊणा,

तेरे काओ ठीक ऊणे ओर तेरिया दर्दा खत्म ऊणिया।

9 आपणी तअन-दौलता ते यहोवे री महिमा करनी,

ओर तैं आपणियां जमीना री फसला रा पईला फल़ देई कि यहोवे रा आदर करना।

10 जे तू एड़ा करे तो तेरे पण्डार नज्जे की परे दे रणे,

ओर तेरे रसकुण्डो दे नया अंगूरा रा रस बह्यींदा रणा।

11 ओ मेरे पाऊ, यहोवे री शिक्षा ते मूँ नि फेरना,

ओर जेबे से ताखे बको, तेबे तैं बुरा नि मानणा,

12 कऊँकि यहोवा जेसते प्यार करोआ, तेसखे बकोआ,

जेड़ा कि बाओ, तेस माठे खे जेसखे से जादा प्यार करोआ।*

13 भाग्यशाली ए से माणूं जो यहोवे रिया आशिषा ते बुद्धि ओर समजा खे पाओआ,

14 कऊँकि बुद्धिया खे पाणा चाँदिए खे पाणे ते बढ़ी की ए,

ओर तिजी रा फाईदा शुद्ध सूईने रे फाईदे ते बी खरा ए।

15 बुद्धि मूँगे ते बी जादा कीमती ए

ओर जितणिया चीजा री तूँ इच्छा करेया, तिना बीचे कोई बी बुद्धिया जेड़ी नि ठईरनी।

16 तेसरे दाँणे आथो रे लाम्बी उम्र,

ओर तेसरे खूँजे आथो रे तअन-दौलत ओर महिमा ए।

17 बुद्धि तेरिया जिंदगिया खे सुखी बणाई सकोई,

ओर ताखे सई तरआ ते सम्बाल़ी की शान्तिया साथे राखोई।

18 जो माणूं बुद्धिया खे ग्रईण करी लओए, तिना खे से जिन्दगी देणे वाल़ी बणोई,

ओर जो तिजी रे मुताबिक हांडोए सेयो बऊत ई भाग्यशाली ओए।

19 यहोवे आपणियां समजा साथे तरतिया री निऊँ पाई,

ओर सर्ग आपणे ज्ञानो ते सई जगा दे राखेया।

20 तेसरिया ई समजदारिया ते डूगे समुद्र फूटी की निकल़े,

ओर सर्गो ते पाल़ा पड़ोआ।

21 ओ मेरे पाऊआ, तूँ खरी बुद्धि ओर विवेक आपू गे राख,

इना खे आपणियां नजरा रे सामणे ते जाणे नि देआ,

22 तेबे इना ते ताखे अनन्तकालो री जिन्दगी मिलणी,

ओर यो ताखे तेरे गल़े रे आरो जेड़िया बणनियां।

23 तेबे तूँ आपणियां जिन्दगिया रिया बाटा रे बिना डरे ऊई की चलणा,

ओर ना तेरे पैरा रे किजी चीजा ते ठोकर लगणी।

24 जेबे तूँ लेटणा, तेबे ताखे डर नि लगणा,

ओर तूँ सुखो रिया नींजा साथे सऊणा।

25 अचाणक आऊणे वाल़े डरो ते नि डरना,

ओर ना तेबे कबराणा, जेबे बुरेया लोका पाँदे मुसीबत आओ;

26 कऊँकि यहोवे ताखे साअरा देआ करना,

ओर तेरे पैर फन्दे रे फसणे ते बचाई देणे।

27 जे तांदे पला करने री तागत ए तो

तिना रा पला जरूर करना, जो पलाई करने जोगे ओ।

28 जे तांगे आपणे पड़ोसिये खे देणे खे कुछ अए,

तो तेसखे ये नि बोलणा कि जा काल आया, आऊँ ताखे काल देऊँगा।*

29 आपणे पड़ोसिये रे खलाफ बुरा करने रे बारे दे नि सोचणा,

कऊँकि से तां पाँदे परोसा करी की तेरे पड़ोसो दे रओआ।

30 जिने माणूंए तां साथे बुरा बर्ताव नि करी राखेया ओ,

तेस साथे बिना मतलबो रा मकद्दमा खड़ा नि करना।

31 हुड़दंग मचाणे वाल़े माणूंए रे बारे ईर्ष्या नि करनी,

ना ई तेस जेड़ी चाल चलणा;

32 कऊँकि यहोवा बुरे माणूंआ ते नफरत करोआ,

पर से आपणा पेत तर्मी लोका पाँदे खोलोआ।

33 दुष्ट लोका रे कअरे यहोवे रा स्राप

ओर तर्मिया रे कअरो पाँदे तेसरी आशीष ओई।

34 दूजेया रा मजाक ड्वाणे वाल़ेया रा यहोवा पक्का मजाक ड्वाओआ,

पर नम्र ओर खरेया लोका पाँदे यहोवा दया करोआ।*

35 अक्लमंद माणूंए रा तो मान-सम्मान बढ़दा रणा,

पर मूर्खा री हर जगा बेज्जती ई ऊँदी रणी।