नसीअता 15

1 सोबटा ज्वाब सुणने ते जल़न ठण्डी ओई,

पर कड़क शब्द सुणी की गुस्सा पड़की जाओआ।

2 अक्लमंद माणूंए रे मुंए ते ज्ञानो रिया गल्ला निकल़ोईया,

पर मूर्ख माणूं बुरिया ई गल्ला करोआ।

3 यहोवे रिया आखी सबी जगा रे लगी री रओईया,

सेयो खरे ओर बुरे दुँईं किस्मा रे माणूंआ खे देखदिया रओईया।

4 शान्ति देणे वाल़ी गल्ल जिन्दगिया जेड़ा ए,

पर उल्ट फेरो री गल्ला ते आत्मा बी दु:खी ओई।

5 मूर्ख पाऊ आपणे बाओ रिया शिक्षा रा तिरस्कार करोआ,

पर जो चिड़कणे खे मानोआ, से समजदार ऊई जाओआ।

6 तर्मी माणूंए रे कअरे बऊत तअन रओआ,

पर दुष्ट माणूं बुरा बखत आऊणे ते पईले ई तेसखे खोई देओआ।

7 अक्लमंद लोक गल्ला करने ते ज्ञानो खे फैलाओए,

पर मूर्खा रा जिऊ ठीक नि रंदा।

8 बुरे लोका रे बलिदान चढ़ाणे*15:8 प्रार्थना करना ते बी यहोवा खुश नि ऊँदा,

पर से सीदे मन वाल़े लोका री प्रार्थना ते खुश ओआ।

9 यहोवा बुरेया लोका रे कामा ते नफरत करोआ,

पर से तर्मो रिया गल्ला मानणे वाल़ेया ते प्यार करोआ।

10 जो माणूं गल़त काम करोए तिना खे कठण सजा मिलणी,

ओर जो चिड़कणे ते बैर राखोआ, से मरे रे माणूंए जेड़ा ए।

11 जेबे जो अधलोक ओर विनाशलोक दोनों यहोवे रे सामणे खुले रे रओए,

तो माणूंए रा मन तेसते कियाँ छिपी सकोआ।

12 मजाक करने वाल़ा माणूं चिड़कणे ते खुश नि ऊँदा,

ओर ना ई से अक्लमंद माणूंए गे सलाह लणे खे जाओआ।

13 माणूंआ रे खुश रणे ते तिना रे मुंए पाँदे खुशी छाई दी दिशोई,

पर तिना रे दु:खी रणे ते तिना रे मुंए पाँदे उदासी दिशोई।

14 समजदार माणूं जादा ते जादा सिखणा चाओए,

पर मूर्ख लोक मूर्खता रिया गल्ला ते ई खुश रओए।

15 गरीब माणूंआ री जिन्दगी दु:खो देई रओई,

पर जेस माणूंए रा मन खुश रओआ, से मानो हर रोज पाट्टी खाणे जाओआ।

16 अमीर ऊई कि मुश्किला दे पड़ने ते अच्छा ए,

कि गरीब रई कि यहोवे रा डर मानो।

17 प्यारो वाल़े कअरो रे साग पातो रा खाणा,

बैर राखणे वाल़े कअरो रे उत्तम खाणे ते खरा ए।

18 गुस्सा करने वाल़ा मर्द चगड़ा करोआ,

पर जो देरा ते गुस्सा करोआ, से चगड़े खे दबाई देओआ।

19 आल़सी माणूंए खे हर जगा मुश्किल ई ओई,

पर सच्चे माणूंआ खे कोई मुश्किल नि ऊँदी।

20 अक्लमंद पाऊए ते तेसरे माए-बाओ खुश ओए।

पर मूर्ख माणूं आपणे माए-बाओ खे तुच्छ जाणोआ।

21 जेस माणूं खे समज नि ऊँदी तेसखे मूर्खता ते खुशी ओई,

पर समजदार माणूं सीदी चाल चलोआ।

22 बिना सलाई ते कित्ती रिया इच्छा निष्फल ओईया,

पर बऊत सारे मन्त्रिया रिया सलाई ते कामयाबी मिलोई।

23 सई बखतो पाँदे सई ज्वाब देणे ते सब खुश ओए।

ओर मोके पाँदे बोली री गल्ल कितणी खरी ओई।

24 अक्लमंद माणूंए री जिन्दगिया री बाट ऊबो खे जाओई,

इजी बजा ते से अधलोको रे पड़ने ते बची जाओआ।

25 यहोवा कमण्डिया रा कअर टाल़ी देओआ,

पर बिदुआ रे कअरो खे बचाई की राखोआ।

26 बुरी साजिश करने वाल़ेया माणूंआ ते यहोवा नफरत करोआ,

पर शुद्ध मनो वाल़े रे वचन मनो खे अच्छे लगणे वाल़े ए।

27 तअनो रा लाल़ची माणूं आपणे कराने खे दु:ख देओआ,

पर तोखे रिया कमाईया ते नफरत करने वाल़ा माणूं जिऊँदा रओआ।

28 तर्मी जबाव देणे ते पईले मनो रे सोचोआ कि क्या जबाव देऊँ,

पर बुरेया लोका रे मुंए ते बुरिया गल्ला निकल़ोईया।

29 यहोवा बुरेया लोका ते दूर रओआ,

पर तर्मी माणूंआ री प्रार्थना पक्का सुणोआ।

30 आसदी ऊई सकल तुसा खे खुश करी देओई,

ओर अच्छी खबर तुसा खे खरा महसूस कराओई।

31 जो जीवन देणे वाल़िया गल्ला खे कान लगाई की सुणोआ,

से अक्लमंद माणूंआ साथे ठकाणा पाओआ।

32 जो माणूं खरिया शिक्षा खे सुणी-अणसुणी करोआ, से आपणे प्राणो खे तुच्छ जाणोआ,

पर जो बकणा सुणोआ, तेसखे बुद्धि मिलोई।

33 यहोवे रा आदर करने ते ज्ञानो रिया गल्ला सिखणे खे मिलोईया,

ओर महिमा ते पईले नम्रता ओई।