1 बच्चेया रा अक्लमंद ऊणे ते तिना रे बाओ खे खुशी मिलोई,

पर मूर्ख बच्चेया रिया बजा ते तिना रिया माया खे दु:ख ओआ।

2 बेईमानिया ते कट्ठा कित्ते रे तअनो ते केसी खे कोई फायदा नि ऊँदा,

पर ईमानदारी माणूंए खे मौता ते बचाई सकोई।

3 तार्मिक माणूंए खे यहोवा पूखा नि मरने देंदा,

पर दुष्ट लोका री इच्छा से पूरी नि ऊणे देंदा।

4 जो काम करने ते आल़स करोआ, से गरीब ऊई जाओआ,

पर बऊत जादा मईणती रा काम करने ते गरीब माणूं बी अमीर ऊई जाओए।

5 जो पाऊ बाडणे रे बखते फसल कट्ठी करोआ, से बुद्धिया साथे काम करने वाल़ा ए,

पर जो पाऊ फसल बाडणे रे बखते बड़ी पारी नींजा रे पड़ी रओआ, से शरमा री बजा ओई।

6 तर्मिया माणूंआ खे बऊत आशीर्वाद मिलोए,

पर बुरेया लोका रे शब्द तिना रे उड़दंगो वाल़े सबाओ खे टकी देओए।

7 जेबे एक तर्मी माणूं मरी जाओआ, तेबे खरे लोक तेसखे याद करोए ओर खुश ओए,

पर जेबे बुरा माणूं मरोआ तेबे लोक तेसखे छोड़ ई पूली जाओए।

8 जो अक्लमंद ए, से सबी आज्ञा खे मानोआ,

पर जो बक-बक करोआ ओर मूर्ख ए, से आपणा ई नाश करी देओआ।

9 ईमानदार लोक तो सई-सलामत रणे,

पर बेईमान लोक पकड़े जाणे।*

10 जो माणूं सच्च बोलणे खे मूँ नि खोलदा से ओरी खे बी परेशानिया दे पाई देओआ;

पर जो मूर्ख माणूं बक-बक करोआ, से आपू खे बर्बाद करोआ।

11 एक खरे माणूंए रे मुंए ते जिन्दगिया रिया गल्ला निकल़ोईया,

पर दुष्टो रे मुंए रिया गल्ला तेसरे उड़दंगो रे सबाओ खे टकी देओईया।

12 बैर राखणे ते तो चगड़े ई पैदा ओए,

पर प्यारो साथे गल्ला करने ते सारे पाप टखी जाओए।*

13 समजदारा रिया गल्ला रे बुद्धि ओई,

पर उल्टिया-उल्टिया गल्ला करने वाल़े माणूंए खे सजा देणे री जरूरत ए।

14 अक्लमंद लोक जितणा ऊई सको तिथणा सीखदे रओए,

पर जेबे मूर्ख बोलोआ तेबे परेशानी ऊई जाओई।

15 जिंयाँ एक शईर तीजिरिया दवाला ते पक्का ओआ, तिंयाँ ई अमीर माणूंए रा पैसा तेसरी रक्षा करोआ,

पर गरीबिया रिया बजा ते गरीब माणूं नाश ऊई जाओए।

16 तर्मी मईणत करी की जिन्दगिया खे कमाओआ,

पर बुरेया लोका रे फायदे ते पाप ई बढ़ोआ।

17 शिक्षा पाँदे चलणा ई जिन्दगी ए,

पर जो माणूं चिड़कणे ते मूँ मोड़ोआ, से पटकदा ई जाओआ।

18 चूठ बोलणे वाल़े माणूंए रे मनो दे बैर रओआ,

ओर जो चूठिया गल्ला फैलाओआ, से मूर्खता रा काम करोआ।

19 बऊत गल्ला ऊणे रिया बजा ते पाप बी ओआ,

पर जो आपणे मुंए खे बंद राखोआ, से अक्ला वाल़ा माणूं गिणेया जाओआ।

20 तर्मिये रे वचन तो खरे चाँदिए जेड़े ए,

पर बुरेया लोका रा मन बऊत अल़्का ओआ।

21 तर्मिये रे वचनो ते बऊता रा पाल़न-पोषण ओआ,

पर मूर्ख लोक आपणियां ई मूर्खता री बजा ते मरी जाओए।

22 जो पैसा यहोवे रिया आशीषा ते मिलोआ,

तिदे से दु:ख नि मलांदा।

23 मूर्खो खे पाप करना एकी खेलो जेड़ा लगोआ,

पर समजदार माणूंआ खे बुद्धिया रिया गल्ला ते मजा आओआ।

24 दुष्ट माणूं जेते मुसीबता ते डरोआ, से ई तेस पाँदे पड़ी जाओई,

पर तर्मी जो कुछ सोचोआ से पूरा ऊई जाओआ।

25 प्रचण्ड अवा रे आऊणे ते दुष्ट माणूं नाश ऊई जाओए,

पर तर्मी सदा बणेया रा रओआ।

26 जिंयाँ दाँदा खे सिरका ओर आखी खे तुआँ बुरा लगोआ,

तिंयाँ ई आल़सी माणूं तिना माणूंआ खे बुरा लगोआ, जो तेसखे केथी कामो खे पेजोए ओर से नि करदा।

27 यहोवे रा डर मानणे ते माणूंए री उम्र बढ़ोई,

पर बुरा करने वाल़ेया लोका री जिन्दगी थोड़े ई दिना री ओई।

28 तर्मिया खे उम्मीद राखणे ते खुशी मिलोई,

पर बुरेया लोका री उम्मीद टूटी जाओई।

29 यहोवा ईमानदारिया ते चलणे वाल़े माणूंए रा उद्धार करोआ,

पर बुरे काम करने वाल़ेया खे से नाश करोआ।

30 तर्मी माणूं सदा बणेया दा रणा,

पर दुष्ट तरतिया पाँदे बसी नि सकणा।

31 तर्मिये रे मुंए ते बुद्धिया रिया गल्ला निकल़ोईया,

पर उल्ट फेरो री गल्ल बोलणे वाल़े री जीब रोकी देणी।

32 तर्मी ग्रहण योग्य गल्ला खे समजी की बोलोआ,

पर दुष्टो रे मुंए ते उल्ट फेरो रिया गल्ला निकल़ोईया।