18 हे यहोवा, तेरो ज़ेरो एरहो परमेशर कोड़िए ज़ै पाप माफ़ केरे, ते अपने हिस्सेरे बच़ोरे लोकां केरे पाप माफ़ केरते? तै अपनो क्रोध हमेशारे लेई न रख्खे, किजोकि तै दयाई सेइं प्यार केरते।

1 हे परमेशर, अपनि दयारे मुताबिक मीं पुड़ अनुग्रह केर;

अपने बड़े दयारे मुताबिक मेरे पाप माफ़ केर।✝

2 मीं रोड़ेच़ारे धोइतां मेरो कसूर साफ केर,

ते मेरो पाप छुटेइतां मीं शुद्ध केर!

6 हे यहोवा, अपनि दया ते करुणारे कम्मन याद केर;

किजोकि तैना त हमेशा करां भोतां एवरेन।

7 हे यहोवा, अपने भलैइयरे वजाई सेइं

मेरे जुवैनरे पापन ते मेरे बुरे कम्मन याद न केर;

अपनि करुणारे मुताबिक तू मीं याद केर।

1 हे यहोवा, मीं तू मुसीबतरे डुग्घे समुन्दरे मरां याद कियो!

2 हे प्रभु, मेरी शुन!

तेरे कन्न मेरे बिनतरे पासे ध्याने सेइं लगोरे रान!

11 हे यहोवा, तू भी मीं पुड़ेरां अपनि बड़ी दया न हटा।

तेरे करुणा ते सच़्च़े सेइं लगातार

मेरी हिफाज़त भोती राए!

6 पक्‍की भलियाई ते करुणा सैरी उमरी

मीं सेइं साथी-साथी राहेली;

ते अवं हमेशा यहोवारे घरे मां रेइलो।

13 ज़ेन्च़रे बाजी अपने बच्‍चन पुड़ तरस खाते,

तेन्च़रे यहोवा तैन पुड़ तरस खाते, ज़ैना तैसेरो डर मनतन।

15 पन परमेशरेरू वरदान आदमेरे पापेरू ज़ेरू नईं, इन सच़्च़े कि एक्‍की मैन्हु यानी आदमेरे पापेरे वजाई सेइं बड़े लोक मरे। पन परमेशरेरे अनुग्रह त कने तैसेरू वरदान बड़े लोकां केरे लेई महाने ज़ैन एक्‍की मैन्हु यानी यीशु मसीहेरे अनुग्रहे सेइं एइते।

15 त कुन भोव कि अस एल्हेरेलेइ पाप केरम, कि असां मूसेरे कानूनेरे अधीन नईं बल्के अनुग्रहेरे? नईं, कधे नईं।

4 पन परमेशर ज़ै बड़ो दया केरनेबालोए; अपने तैस बड़े प्यारे सेइं, ज़ैस सेइं तैने असन सेइं प्यार कियो। 5 ज़ैखन अस पापां केरे वजाई सेइं मर्रे लोकां केरे ज़ेरे थिये, तैनी असन ज़िन्दगी दित्ती ज़ैखन तैनी मसीह मुड़दन मरां ज़ींतो कियो, परमेशरेरे अनुग्रहे सेइं तुसन मुक्ति मैल्होरीए।

9 ते तैने मीं सेइं ज़ोवं, "मेरो अनुग्रह तेरे लेई सुधोए; किजोकि मेरी शक्ति कमज़ोरी मां सिद्ध भोतीए।" एल्हेरेलेइ अवं एपनी कमज़ोरी पुड़ घमण्ड केरेलो, कि मसीहेरी सामर्थ मीं पुड़ एंइती राए।

13 ज़ै अपने पाप छ़ुपेइतां रखते, तैसेरू कम कामयाब न भोए,

पन ज़ै तैन्न मन्ते ते शारते भी,

तैस पुड़ महरबानी की गाली।

7 दुष्ट अपनि बत छ़ेडी दे, अनर्थ केरनेबालो अपनि सोच-विचार छ़ेडतां यहोवारे पासे फिरे, तै तैस पुड़ दया केरेलो, तै इश्शे परमेशरेरे पासे फिरे ते तै तैस पूरे तरीके सेइं माफ़ केरेलो।

18 फिर भी यहोवा एल्हेरेलेइ च़िर लाते, कि तै तुसन पुड़ अनुग्रह केरे, ते एल्हेरेलेइ उच्‍चे केरेलो कि तुसन पुड़ दया केरे। किजोकि यहोवा न्याय केरनेबालो परमेशरे; धन आन तैना ज़ैना तैसेरे इंतज़ारे मां रहतन।

13 फिर भी तुस गेइतां एस गल्‍लरो मतलब कढा, "अवं बलिदान नईं बल्के दया पसंद केरताईं, किजोकि अवं धर्मी लोकन नईं बल्के पापी लोकन कुजाने एवरोईं।"

21 तैखन पतरसे यीशु कां एइतां पुछ़ू, "प्रभु अगर कोई तीं पुड़ विश्वास केरनेबालो, मीं सेइं बुराई केरतो राए, त अवं केत्रे बार तैस माफ़ केरि? कुन सत बार?" 22 यीशुए जुवाब दित्तो, "अवं तीं सेइं इन न ज़ोईं सत बार, बल्के सत्तेरे सत्तर बार माफ़ करां (यानी लगातार माफ़ केरतू रानू)।

14 "एल्हेरेलेइ अगर तुस लोकां केरे पाप माफ़ केरेले, त तुश्शो सुर्गेरो बाजी भी तुश्शे पाप माफ़ केरेलो।

31 फिर भी तीं ज़ै बड़ो महरबानस, तैन केरो नाश न कियो ते न तैना शारे, किजोकि तू बड़ो महरबान ते दया केरनेबालो परमेशरस।

5 ज़ै मैन्हु दया केरते ते ओधार देते,

ते ईमानदैरी सेइं अपना कम्मां केरते, तैसेरू कल्याण भोते।

17 इश्शे परमेशर यहोवारी कृपा असन पुड़ भोए,

तू इश्शे हथ्थां केरू कम इश्शे लेई मज़बूत केर,

इश्शे हथ्थां केरां कम्मां मज़बूत केर।

16 एल्हेरेलेइ एज्जा असां दिलेरी सेइं, अनुग्रह देनेबाले परमेशरेरे तखतेरे सामने च़लम, ताके तै असन पुड़ अनुग्रह ते दया केरे ते ज़रूरतरे मौके तै इश्शे मद्दत केरे।

1 एल्हेरेलेइ हे ढ्लाव ते बेइनव, अवं तुसन कां परमेशरेरी दया याद केरताईं बिनती केरतां ज़ोताईं, कि अपनि ज़िन्दगी पवित्र, ते ज़ेरू परमेशरे पसंद एइते, बलिदान केरतां च़ाढ़ा; ईए परमेशरेरी आराधना केरनेरो सही तरीकोए।

16 "किजोकि परमेशरे दुनियारे लोकन सेइं एत्रो प्यार कियो कि तैनी अपनु एकलौतू मट्ठू दित्तू, ताके ज़ै कोई तैस पुड़ विश्वास केरे, तै नाश न भोए, बल्के हमेशारी ज़िन्दगी हासिल केरे।

29 किजोकि मसीहेरे वजाई सेइं तुसन पुड़ ई अनुग्रह भोव कि न सिर्फ तैस पुड़ विश्वास केरा पन तैसेरेलेइ दुख भी झ़ैल्‍लां।

1 फिरी हिजकिय्याह राज़े सारे इस्राएले मां ते यहूदा मां ई समाद भेज़ो, ते एप्रैमे ते मनश्शे कां इस इरादे सेइं चिट्ठी लिखतां भेज़ी, कि तुस यरूशलेम नगरे मां यहोवारे भवने मां इस्राएलेरे परमेशर यहोवारे लेई तिहार मनानेरे लेई एज्जा। 2 राज़े ते तैसेरे हाकिमेईं ते यरूशलेमेरे लोकेईं सलाह कियोरी तिहार दूइयोवं महीने मां मनाम। 3 तैना तैस मौके एस वजाई सेइं न मनेई सखते थिये, किजोकि थोड़े ज़ेरे याजकेईं अपनो आप पवित्र कियोरो थियो, ते लोक यरूशलेम नगरे मां अकोट्ठे न थिये भोवरे। 4 ऐह गल राज़े ते तैसेरे लोकन रोड़ी लगी। 5 तैखन तैनेईं ऐह गल कानूनेरे किताबरे मुताबिक ठहराई, कि बेर्शेबा नगरे करां लेइतां दान नगरेरे सारे इस्राएली लोकन मां ई प्रचार कियो गाए, कि यरूशलेमे मां इस्राएलेरे परमेशर यहोवारे लेई फ़सह तिहार मनाने एज्जा। किजोकि तैनेईं एत्री तैधादी मां पेइलू एन्च़रे न थियूं मनवरू ज़ेन्च़रे कि लिखेरूए। 6 एल्हेरेलेइ राज़ेरे दूत तैसेरे हाकिमन करां चिट्ठी नेइतां राज़ेरे हुक्मेरे मुताबिक सारे इस्राएले ते यहूदा मां हंठते फिरे, ते इन ज़ोते जे, "हे इस्राएली लोकव! अब्राहम, इसहाक, ते इस्राएलेरे परमेशर यहोवारे पासे फिरा, कि तै अश्शूरेरे राज़ेरे हथ्थे करां बच़ोरे तुश्शे लोकां केरे पासे फिरे। 7 ते अपने दादे-पड़दादां ते अपने इस्राएली भियालां केरे ज़ेरे न बना, ज़ैनेईं अपने दादे-पड़दादां केरे परमेशर यहोवा सेइं धोखो कियोरो थियो, ते तैनी तैना हैरान भोनेरी वजा बनाए, ज़ेन्च़रे कि तुस एप्पु हेरने लगोरेथ। 8 हुनी तुस अपने दादे-पड़दादां केरि ज़ेरि ज़िद न केरा, बल्के यहोवारे अधीन भोइतां तैसेरी तैस पवित्र ठारी मां एज्जा ज़ै तैनी हमेशारे लेई पवित्र कियोरीए, ते अपने परमेशर यहोवारी आराधना केरा, कि तैसेरो भड़कोरो क्रोध तुसन पुड़ेरां दूर भोइ गाए। 9 अगर तुस यहोवारे पासे फिरेले त ज़ैनेईं तुश्शे भियाल ते बाल-बच्‍चे गुलाम बनेइतां नेवरेन, तैना तैन पुड़ दया केरेले, ते तैना इस मुल्खे मां वापस एज्जेले किजोकि तुश्शो परमेशर यहोवा अनुग्रह ते दया केरनेबालोए, ते अगर तुस तैसेरे पासे फिरेले त तै तुसन कबूल केरेलो।"

10 एन्च़रां सेइं राज़ेरे दूत एप्रैम ते मनश्शेरे प्रादेशन मां नगरे-नगरे हंठते च़लते जबूलून प्रदेशे तगर जे। पन तैनेईं तैन केरो मज़ाक बनाव, ते तैन पुड़ हसने लग्गे। 11 फिर भी आशेर, मनश्शे ते जबूलून गोट्लन मरां किछ लोक दीन भोइतां यरूशलेम नगरे जो आए। 12 यहूदा मां भी परमेशरेरी एत्री शक्ति भोइ, कि तैना अक मन भोइतां, ज़ै हुक्म हिजकिय्याह राज़े ते हाकिमेईं यहोवारे वचनेरे मुताबिक दित्तोरो थियो, तैस मन्नेरे लेई तियार भोए।

13 एन्च़रां सेइं बड़े लोक यरूशलेम नगरे मां एल्हेरेलेइ अकोट्ठे भोए, कि दूइयोवं महीने मां अखमीरी रोट्टरू तिहार मनाम।✝ 14 तैन सारे लोकेईं उठतां, यरूशलेमेरी देबतां केरि वेदी ते गुग्गल बालनेरी सैरी ठारां छ़ुइतां किद्रोनेरे नाले मां शैरी। 15 तैखन दूइयोवं महीनेरे च़ेवधोवं दिहाड़े तैनेईं फ़सह तिहारेरे लेई जानबर बलि किये, तैखन याजक ते लेवी शरमिन्दे भोए ते तैनेईं अपनो आप शुद्ध केरतां होमबलि केरनेरे लेई जानबर यहोवारे भवने मां आने। 16 तैना अपने नियमेरे मुताबिक, मतलब परमेशरेरे दास मूसेरे कानूनेरे मुताबिक, अपने-अपने जगाई पुड़ खड़े भोए, ते याजकेईं बलिदानां केरो खून लेवी केरे हथ्थे मरां नेइतां छ़िड़को।✝ 17 किजोकि सभाई मां किछ एरे लोक थिये ज़ैनेईं अपनो-आप शुद्ध न थियो कियोरो। एल्हेरेलेइ सारे अशुद्ध लोकां केरे फ़सह तिहारेरे जानबर बलि केरनेरो अधिकार लेवी लोकन दित्तो जेव, कि तैन यहोवारे लेई शुद्ध केरन। 18 एप्रैम, मनश्शे, इस्साकार ते जबूलून गोट्लन मरां बड़े लोकेईं अपनो आप शुद्ध न थियो कियोरो। फिर भी तैना फ़सह तिहारेरे जानबरेरू मास लिखोरी विधरे खलाफ खाते थिये। किजोकि हिजकिय्याहे तैन केरे लेई ई प्राथना कियोरी थी, "यहोवा ज़ै भलोए, तै तैन सेभी केरे पाप ढेक्‍की दे। 19 ज़ैनेईं अपने पूर्वजां केरे परमेशर यहोवारी तलाशी मां अपनो मन लेवरोए, चाहे तैना पवित्र ठारारी विधरे मुताबिक शुद्ध न भी भोन।" 20 ते यहोवा हिजकिय्याहेरी ई प्राथना शुन्तां लोक बझ़ाए। 21 ज़ैना इस्राएली यरूशलेम नगरे मां हाज़र थिये, तैना सत दिहाड़न तगर अखमीरी रोट्टरू तिहार बड़े आनन्दे सेइं मनाते राए। ते रोज़ लेवी ते याजक बड़े ज़ोरे सेइं बाज़े बज़ेइतां यहोवारी आराधना केरते राए। 22 ज़ेत्रे लेवी यहोवारी सेवा समझ़दैरी सेइं केरते थिये, तैन केरि हिजकिय्याह राज़े हिम्मत बधाई। एन्च़रां सेइं तैना मेलबलि च़ैढ़तां अपने पूर्वजां केरे परमेशर यहोवारे सामने इकरार केरते राए, ते तैना पेइले दिहाड़े करां लेइतां तिहारेरे सत दिहाड़न तगर खाते राए।

23 तैखन सैरी सभारे लोकेईं सलाह की, कि अस होरे सत दिहाड़े फ़सह तिहार मनाम। ते तैनेईं होरे सत दिहाड़े फ़सह तिहार मनाव। 24 किजोकि यहूदारे राज़े हिजकिय्याह, लोकन 1000 बछ़ड़ां ते 7000 गब्बां दित्तोरां थियां, ते हाकिमेईं लोकन 1000 बछ़ड़ां ते 10000 गब्बां दित्तोरां थियां, ते बड़े याजकेईं अपनो आप शुद्ध कियोरो थियो। 25 तैखन याजक ते लेवी लोकन समेत यहूदारी सारी सभा, ते इस्राएले मरां एवरे लोकां केरि सभा, ते इस्राएलेरे मुल्खे मरां एवरे लोक, ते यहूदा प्रदेशे मां रानेबाले परदेशी, एन सेभेइं खुशी मनाई। 26 एन्च़रां सेइं यरूशलेम नगरे मां बड़ी खुशी मनाई जेई, किजोकि दाऊदेरे मट्ठे इस्राएलेरे राज़े सुलैमानेरे राज़ केरनेरे दिहाड़न करां एरी गल यरूशलेम नगरे मां न थी भोवरी। 27 आखरी मां लेवी याजकेईं खड़े भोइतां लोकन आशिर्वाद दित्तो, ते तैन केरि तै प्राथना सुर्गे तगर पुज़्ज़ी जेई, ते परमेशरे तैन केरि शुनी।

1 "तैना ज़ोतन, ‘अगर कोई एपनी कौन्शी शारे, ते तै तैस करां च़ली गाए ते होरि मड़देरी भोइ गाए, त तै पेइलो कुन तैस कां फिरी गालो?’ कुन तै मुल्ख बड़ो अशुद्ध न भोइ गालो? यहोवा एन ज़ोते कि तीं बड़े प्यार केरनेबालन सेइं व्यभिचार कियोरोए, कुन तू हुनी मेरे पासे फिरेली?✝ 2 पहैड़ी केरे पासे तक! एरी कौ ज़ेरि ठारे ज़ैड़ी तीं कुकर्म न कियोरो भोए? बत्तन मां तू एरी बिश्शी ज़ेन्च़रे अक अरबी लूटरो जंगले मां बिश्शो। तीं मुल्ख अपने व्यभिचार ते दुष्टता सेइं अशुद्ध कियोरोए। 3 एल्हेरेलेइ झ़ड़ी रोकी जेई ते बरसांतरे वक्ते मां झ़ड़ी न भोए, फिरी भी तेरू तुत्तर वेश्यारू ज़ेरूए, तीं कोई शर्म नईं। 4 कुन तू हुनी मीं उच्‍ची आवाज़ी सेइं ज़ोली, ‘मेरे बाजी, तूए मेरी जुवानेरो साथी आस? 5 कुन तै हमेशा क्रोधे रालो? कुन तेरो क्रोध ठंडो न भोल्हो?’ तीं एरू ज़ोवरू त आहे, पन तीं बड़ां बुरां कम्मां कियां।"

6 फिरी योशिय्याह राज़ेरे राज़ केरनेरे वक्ते मां यहोवा मीं सेइं एन भी ज़ोवं, "कुन तीं लाव कि भटकने बाली इस्राएले कुन कियूं? तैसां सब उच्‍चे पहाड़न पुड़ ते सब सब्ज़ बुट्टन हैठ गेइतां व्यभिचार* कियोरोए। 7 तैखन मीं सोचू, ज़ैखन इना सब कम्मां तैसां केरि छ़डे तैखन तै मेरे पासे फिरेली; पन तै न फिरी, ते तैसेरी धोखेबाज़ बेइन यहूदा इन हेरू। 8 फिरी मीं लाव, ज़ैखन मीं भटकने बाली इस्राएल तैसेरे व्यभिचार केरनेरे वजाई सेइं शारी ते तैस फारख्ती दित्ती; फिरी भी तैसेरी धोखेबाज़ बेइन यहूदा न डरी, बल्के गेइतां तै भी व्यभिचार केरनेबाली बनी। 9 तैसेरे बेशर्म व्यभिचार* केरनेबाली भोनेरे वजाई सेइं मुल्ख अशुद्ध भोव, तैसां घोड़ ते लेकड़री मूरती केरि पूज़ा केरतां व्यभिचार कियो। 10 एत्रू भोने पुड़ भी तैसारी धोखेबाज़ बेइन यहूदा पूरे मने सेइं मेरे पासे न फिरी, पन कपटे सेइं, यहोवा एन ज़ोते।"

11 यहोवा मीं सेइं इन भी ज़ोवं, "भटकने बाली इस्राएल, धोखेबाज़ यहूदा करां घट दोषी निसोरीए। 12 तू गेइतां इस्राएलेरे उत्तरेरे पासे इना गल्‍लां प्रचार केर, यहोवा एन ज़ोते, हे भटकने बाली इस्राएल वापस एई, अवं तीं पुड़ क्रोधेरी नज़र न केरेलो; किजोकि यहोवा एन ज़ोते, अवं दया केरनेबालो आईं; अवं हमेशा क्रोधे न रेइलो। 13 सिर्फ अपनो ई अधर्म मन्न कि तू अपने परमेशर यहोवा करां दूर भोइ ते सब सब्ज़ बुट्टन हैठ इरां उरां होरन कां जेई, ते मेरी गल्‍लां न मेन्नी, यहोवा एन ज़ोते।

14 "हे भटकने बाले बच्‍चव, मीं कां वापस एज्जा, किजोकि अवं तुश्शो मालिक आई; यहोवा एन ज़ोते। तुश्शे हर एक्‍की नगरे मरां अक, ते हर एक्‍की कुले मरां दूई नेइतां अवं सिय्योने मां पुज़ालो।

15 "अवं तुसन अपने मनेरे मेर्ज़रे मुताबिक पुहालां केरे ज़ेरे प्रधान देइलो, ज़ैना ज्ञान ते अक्ली सेइं तुसन च़ारेले। 16 ते तैन दिहाड़न मां ज़ैखन तुस एस मुल्खे मां बद्धथ, ते च़ेवरे पासन फैलथ, तैखन लोक फिरी एरू न ज़ोले, यहोवारे करारेरो सन्दूख; यहोवा एन ज़ोते। तैसेरो खियाल भी तैन केरे मने मां न एज्जेलो, न लोक तैसेरे न राने सेइं फिक्र केरेले; ते न तैसेरी मरम्मत भोल्ही। 17 तैस मौके यरूशलेमे जो यहोवारो तखत ज़ोले, ते सब कौमां तैस्से यरूशलेमे मां मेरे नंव्वेरे खातर अकोट्ठी भोल्ही, ते तैना फिरी अपने बुरे मनेरे ज़िद्दी पुड़ न च़लेली। 18 तैन दिहाड़न मां यहूदारो घरानो इस्राएलेरे घराने सेइं साथी च़लेलो ते तैना दूईये मिलतां उत्तरेरे मुल्खे मरां एस मुल्खे मां एज्जेले ज़ै मीं तैन केरे दादे-पड़दादन तैन केरो हिस्सो केरतां दित्तोरो थियो।"