18 Gwa, Nguluwi, whaani yawele kota hegwe?

Hegwe kwangugalechela gehile ga wanhu wa hegwe wasigale,

ne kulola nongwa za hewo.

Ng'halazi ya hegwe hailingikala mazuwa gose,

ila kwangusangalala ng'hatu kutulajila igano lya kwimilila lya hegwe.

1 Gwa Nguluwi, mbonele isungu,

kwa winji wa igano lya hegwe lya kwimilila.

Kwa winji wa isungu lya hegwe,

wuse gehile ga heni.

2 Uhovuje ng'hatu nongwa ya heni,

welize gehile ga heni.

6 Gwa Mkulu Nguluwi, ukumbuchile isungu na igano lya kwimilila lya hegwe,

viwele navyali kulawa katali.

7 Uleche kukumbuchila gehile ga usongolo wa heni,

ung'humbuche kwa kiwhana na igano lya kwimilila lya hegwe,

gwa Mkulu Nguluwi, kwa chiwalo cha kunoga kwa hegwe.

1 Kulawa kuli magazo ga heni,

ndangukulilila, gwa Mkulu Nguluwi.

2 Gwa Mkulu, uhuliche lizi lya heni,

uwiche goya ikutu lya hegwe uhulichize kulanda kwa heni kwa isungu.

11 Gwa Mkulu Nguluwi, uleche kuleka kumha heni isungu lya hegwe.

Igano lya hegwe lya kwimilila na kukundigwa kwa hegwe vinyamile mazuwa gose.

6 Kwa kukomya, kunoga kwa hegwe na igano lya kwimilila lya hegwe vyowa hamwe na heni,

kuli mazuwa geng'ha ga ukomu wa heni,

nani ndochikala kuli ng'handa ya Mkulu Nguluwi mazuwa gose.

13 Kota vila mhaza vyoyalingumonela isungu mwanage,

ndo Mkulu Nguluwi vyoyalinguwonela isungu wanhu walingumdumba.

15 Ila wihe wa Adamu hauwhanile na utambichizo wa Nguluwi. Mina, hanga gehile ga munhu yumwe nagambuza kubagama kwa wanhu weng'ha, kwa isungu lya munhu yumwe, yawele ndo Yesu Kilistu, Nguluwi nakawonjezela weng'ha utambichizo na ndolendole za heye.

15 Lelo, tulonje choni? Ndaze, tudite gehile kwa vila hatulingulongozwa na malajizo ila twangulongozwa na kunoga kwa heye? Ne hado!

4 Ila Nguluwi nayali na isungu ng'hatu. Nakatugana kwa igano lyohambe liwazigwe. 5 Lelo hanga natwali tuwele tubagame kwa chiwalo cha gehile, nakatudita tuwe wakomu hamwe na Kilistu. Kwa kunoga kwa Nguluwi namwe namloholigwa.

9 Ila nakandonjela, "Isungu lya heni lyanguhega kwa hegwe, kwa vila ludali lwa heni lwangwenezwa ng'hatu kuli ung'hochele." Lelo ndochitogola kuwala ung'hochele wa heni leka ludali lwake Kilistu uwe mgati mwa heni.

13 Yalinguvisa nongwa za heye, mbuli za heye haziweza kuluta goya,

ila yalingulonga gehile ga heye na kugaleka, kolechelwa.

7 Wehile waleche nzila za hewo zihile,

wawele na gehile wagaleche majesa ga hewo gehile,

wamhiluchile Mkulu Nguluwi leka yawonele isungu,

wamlutile Nguluwi wa hetwe, kwa vila kowalechela hewo.

18 Mkulu Nguluwi kangubeteza kuwalajila hemwe isungu,

nakewika goya kuwalechela kwa vila mazuwa gose kanguditaga gawele ga hachi.

Nawatambichizwa wala weng'ha walingitumbila kwa heye.

13 Lelo mkelanguse ulonzi awu, ‘Ndangugana isungu, haiwele nhambiko.’ Heni suyile kuwachema wanhu wala watanganiche, leka wawele na gehile."

21 Hamba Petili kamlutila Yesu, kamuuza, "Mkulu, ndaze, mng'holozangu wone yanditile vibi, ndimleche lwa kalinga? Mala saba?" 22 Yesu nakamwidichila, "Silingulonga mala saba hela," Ila makumi saba mala saba.

14 "Mina lomuwosela wanhu gehile gowaditile, Mhaza wa hemwe yawele kilanga, kowosela hemwe gehile gomditile kahi.

31 Ila kwa isungu lya hegwe likulu, huwalechile wadumigwe ne kuwasemwa,

kwa vila hegwe ndo Nguluwi uwele na kunoga na isungu.

5 Ganojile gomuyila munhu yula yawele na isungu na yalingwazika ne kugana mzidi,

yalingudita mbuli za heye kwa hachi.

17 Uganililo wa hegwe, gwa Mkulu, Nguluwi wa hetwe,

chotulingudita uchiwiche chiwe goya,

ena, uchiwiche goya chila chotulingudita.

16 Lelo, tuchihejelele ne kudumba chigoda cha undewa cha Nguluwi yawele yanojile, tubochele isungu lya heye na kunoga kwa Nguluwi, leka vitutanze kuli mhela hotugana.

1 Ahyo, wang'holozangu, kwa vila Nguluwi kana isungu lukami, ndangukulandani kwa nhumbula yeng'ha, mumlavile Nguluwi lukuli lwa hemwe kota nhambiko iling'homu, yelile na ilingunojeza. Aku ndo kumfugamila Nguluwi.

16 Kwa vila Nguluwi nakaigana isi mbaka nakamlavya Mwanage wa udewele, leka chila yomkunda yaleche kwajilila, ila yawe na ukomu wa mazuwa gose.

29 Kwa vila hemwe nampegwa igano na Nguluwi kwa chiwalo cha kumkolela mijito Kilistu, haiwele kumkunda hela ila kahi kwa kugazigwa kwa chiwalo cha heye.

1 Mndewa Hesekiya nakawahilichila usenga wanhu weng'ha wa Isilaeli na wa Yuda, kahi nakawandichila baluwa wenyeng'haye wa Efulaimu na Manase, yowalalika weng'ha woye kuli ng'handa ya Mkulu Nguluwi ako Yelusalemu, leka wehanze hamwe kuli mnvina ya Pasaka kwa chiwalo cha Mkulu Nguluwi, Nguluwi wa Isilaeli. 2 Mndewa na vilongozi wa heye na wanhu weng'ha wa muji wa Yelusalemu nawamula kuidita mnvina ayo ya Pasaka kuli mwezi wa keli, 3 honhu ha mwezi wa mwaluko kota vyowawele wodita aho hamwande, kwa vila watambika wawele nawali naweyeliza nawali wachefu na wanhu nawali wang'hali kikungajiza ako Yelusalemu. 4 Mbuli ayi nayoneka kota ya goya kwa mndewa hamwe na wanhu weng'ha wawele nawali wekungajize hala. 5 Chila munhu kulawa Beeli-sheba ubanzi wa kusini mbaka Dani ubanzi wa kasikazini nawalalikwa kuya kuli mnvina ayo ya Pasaka ya Mkulu Nguluwi, Nguluwi wa Isilaeli. Wanhu wenji hali hewo hawanawahika kuidita mnvina kota ayo kwa kiwhana na gala malajizo vyogandichigwe. 6 Kwa malajizo ga mndewa, wasenga nawaluta kuli isi ya Isilaeli na Yuda wawele na baluwa kulawa kwa mndewa na kulawa kwa vilongozi wa heye. Baluwa azo nazilonga hino, "Hemwe wanhu wa Isilaeli, mumhiluchile Mkulu Nguluwi, Nguluwi wa Abulahamu na Isaka na Yakubu, leka naye yawahiluchile hemwe msigale, muwele namsulupuka kulawa mmoko mwa wandewa wa Ashulu. 7 Mleche kuwa kota wasekulu wa hemwe na wang'holozenu, wawele hawawele wa kukundigwa kwa Mkulu Nguluwi, Nguluwi wa wasekulu wa hewo, ahyo nakawagaza kwa kuwadita wawe chinhu cha kuzudiza kota vyomlingona. 8 Mleche kuwa na nhumbula zigagadale kota wasekulu wa hemwe, ila mumhulichize Mkulu Nguluwi. Mlute kuli ng'handa ya Nguluwi iwele nakayeliza mazuwa gose, mumfugamile Mkulu Nguluwi, Nguluwi wa hemwe, leka yaleche kuwazudila. 9 Wone mumhiluchile Mkulu Nguluwi, wala wang'holozenu na wana wa hemwe wawele nawaholigwa leka wawe wapogozi, wokonelwa isungu na wala wawele nawawahola, nawo wowalechela leka wahiluche kuli isi ayi, kwa vila Mkulu Nguluwi, Nguluwi wa hemwe, kanoga na kana isungu, naye kowabochela wone momhiluchila."

10 Lelo wasenga awo nawaluta kuli muji umwe mbaka uyage kuli nhanzi za Efulaimu na Manase, nawafika mbaka kuli nhanzi ya Sebuluni, ila wanhu nawawaseka na kuwabeza. 11 Ila, wanhu wachefu hali nhanzi za Asheli na Manase na Sebuluni nawanyenyetela, nawaluta Yelusalemu. 12 Ludali lwa Nguluwi nalwali lukola mijito kuli isi ya Yuda, kuwakangaza nhumbula wanhu wa Yuda leka kuhulichiza malajizo ga mndewa na wakulu wa heye, kota ulonzi wa Mkulu Nguluwi vyoulajize.

13 Wanhu wenji lukami nawaluta kuli muji wa Yelusalemu kuli mwezi wa keli, leka kusangalala hamwe kuli mnvina ya mibumunda jilihela usaso. 14 Nawaluka mijito ja kusa honhu ha kulavila nhambiko heng'ha ha milungu hawele Yelusalemu na honhu hanji heng'ha howawele wofunyhizila ubani, nawavihola vinhu vyake na kuluta kuvitoza kuli Ibindi lya Kidiloni. 15 Zuwa lya kumi na zine lya mwezi awo, nawalidumula singo ing'holo lya Pasaka. Watambika na Walawi nawona soni, ahyo naweyeliza na kigala nhambiko za kulakazwa kuli ng'handa ya Mkulu Nguluwi. 16 Nawaluka mijito ja hewo kuli ng'handa ya Nguluwi kota vyogalonjigwe kuli malajizo ga Musa, munhu wa Nguluwi. Walawi nawawapa watambika danda ya nhambiko, nawo nawamizila hali honhu ha kulavila nhambiko. 17 Kwa vila wanhu wenji wawele nawekungajiza hala nawali wang'hali kiyeliza, naiwalapa Walawi kujidumula singo ming'holo jinji ja Pasaka kwa chiwalo cha wala wanhu wawele hawawele welile, leka kujiwika chiuyeng'ha hali Mkulu Nguluwi. 18 Wanhu wenji hali wala wawele nawalawa Efulaimu na Manase na Isakali na Sebuluni, nawali wang'hali kiyeliza, ila nawalya hamwe mnvina ya Pasaka, hanga nayali haiganigwe. Ahyo mndewa Hesekiya nakawalandila yolonga, "Mkulu Nguluwi uwele unojile, umlechele chila yumwe 19 yawele kokupala hegwe Mkulu Nguluwi, Nguluwi wa wasekulu wa heye, kwa nhumbula ya heye yeng'ha, hanga hawele yelile kota vyogalingugana malajizo ga honhu helile." 20 Mkulu Nguluwi, nakakunda kulanda kwa Hesekiya, nakawalechela wanhu awo. 21 Waisilaeli wawele nawali kuli muji wa Yelusalemu, nawadita mnvina ya mibumunda jilihela usaso kwa mhela wa mazuwa saba. Walawi na watambika nawali wokwimba chila zuwa wawele na vinhu vya kwimbila vya kumtogola Mkulu Nguluwi. 22 Mndewa Hesekiya nakalonga na kuwakangaza nhumbula Walawi weng'ha, wawele nawamkolela mijito Mkulu Nguluwi kwa uwanzi ng'hatu. Ahyo wanhu nawalya chilyo cha mnvina kwa mhela wa mazuwa saba na kulavya nhambiko za kikala goya na kulonga malumbo kwa Mkulu Nguluwi, Nguluwi wa wasekulu wa hewo. 23 Hamba nhing'hano yeng'ha naikunda kulutilila na mnvina kwa mhela wa mazuwa saba mzidi, ahyo kwa mazuwa saba ganji nawalutilila kuidita mnvina ayo kwa kusangalala. 24 Mndewa Hesekiya wa Yuda, nakalavya mibuguma elufu imwe (1,000) na ming'holo na mhene elufu saba (7,000) kwa chiwalo cha wala wanhu wawele nawali wekungajize. Vilongozi nawo nawalavya mibuguma elufu imwe (1,000) na ming'holo na mhene elufu kumi (10,000). Watambika wenji nawali weyelize. 25 Wanhu weng'ha kulawa Yuda na Isilaeli na watambika na Walawi na wajenzi walingikala Yuda na Isilaeli, nawasangalala. 26 Nakwali na usangalalo ng'hatu kuli Yelusalemu, kwa vila kulawa mhela wa ulongozi wa mndewa Solomoni, mwana wa Daudi, mndewa wa Isilaeli, mbuli kota yino hainalawila kuli Yelusalemu. 27 Hamba, watambika na Walawi nawema na kuwatambichiza wanhu, Nguluwi nakawahulika kwa vila kulanda kwa hewo nakufika mbaka kilanga, haluga ha heye helile.