18 Dhayshe attida zereththaa nagara atto gi maariza ne mala Xoossi oonee? Neni mernaas hanqettaka; maaro gelizayssan ne ufayettaasa.

1 Abeet Xoossawu!

Ne mernaa siiqoza mala

tana maara;

ne qadheta daron

ta mooroza qucca.✝

2 Ta iitateththa ubbaa

taappe meecca;

ta nagarappeka tana geeshsha.

6 Abeet GODAWU!

Beniisofe diza ne qadheteththaanne

ne kiyateththa hassa7a.

7 Ta yelagateththa nagaranne

mooro hassa7oppa;

Abeet GODAWU!

Ne gita kiyateththa malanne

ne lo7eteththa keena tana qoppa;

1 Abeet GODAWU!

Tani ciimma

meto giddon dashe

neekko waassays.

2 Abeet Godawu!

Ta cenggurssa siya;

tani shoobbizayssa

ne hayththati ezgetto.

11 Abeet GODAWU!

Ne maaroteththaa

taappe haassofa;

ne siiqoynne ne tumateththay

tana ubba wode naago.

6 Ne kiyateththinne ne maaroteththay

ta de7o layththa ubbaan

tana kaallana;

tani GODAA keeththan mernaas daana.

13 Aaway ba naytas

qadhettiza mala

GODAY baas yayyizaytas qadhettees.

15 Gidikkoka iza kiyateththa imotay asa qoho mala gidenna; issaadey mooridayssan daro asay hayqqikokka Xoossa kiyateththaninne issi as Yesus Kirstoosa kiyateththan yida imotay darotas keehi dari imettides.

15 Histtiin ay ooththinoo? Woga garsan gidontta nuni Xoossa kiyateththa garsan diza gishshas nagara ooththinoo? Mulekka ooththanaas bessenna.

4,5 Gido attiin Xoossi keehi siiqida gishshas ba maaro daron nuni nu qoho daroteththaan hayqqidayta gidi dishin Kirstoosa baggara nuna ashshides; intte paxiday iza kiyateththanna.

9 Gido attiin Goday, «Ta wolqqay kumeth gidi qonccanay ne daabursan gidida gishshas ta kiyateththi nees gidana» gides; hessa gishshas Kirstoosa wolqqay ta bolla gidana mala ay wodeppeka bollara tani daaburshin he wode ufayssan ceeqettanaas dosays.

13 Ba nagara genththiza asi aacenna;

gido attiin paaxizaynne

nagara aggizay maarettana.

7 Iita asi ba oge,

qohizaykka ba qofa aggo;

GODAAKKO simmo.

Izikka iza maarana;

iza maaroteththay

daro gidida gishshas

izi nu Xoossako simmo.

18 Gido attiin GODAY inttes

kiya ooththanaas naagees;

inttena ba qadheteththa

bessanaas dendees;

GODAY tumu pirdiza

Xoossa gidida gishshas

ammanettidi iza naagizayti

anjjettidayta.

13 Hessa gishshas, ‹Intte biidi yarsho gidontta maaroteth dosays› giza qaalaa birsheth tamaarte. Nagaranchchata xeygana yadis attiin xillota xeyganaas yabeekke» gides.✝

21 He wode Phexroosi Yesusaakko shiiqidi, «Godoo! Ta ishay tana qohikko ta izas aappunto atto goo? Laappunto atto goo?» gides.✝

22 Yesusikka izas zaaridi, «Laappun tammuto laappun attiin laappunto xalla ga giikke;✝

14 «Intte inttena qohidaytas atto giikko intte salo Aawaykka inttes atto gaana.

31 Gido attiin ne maaroteththa

gitateththaafe dendidayssan

istta aggabeekka;

Ne kiyanne atto giza

Xoossaa gidida gishshas

istta dhayssabeekka.

5 Kiyateththan coo tal7iza asas,

ba ooso suureteththan ooththiza

asas de7oy injjetana.

17 Abeet GODAWU! Nu Xoossawu!

Ne kiyateththi nunara gido;

nu ooththiza ubbaa

nuus injjesa; ero!

Nu ooththiza ubbaa nuus injjesa.

16 Hessa gishshas nuni maaroteth ekkanaassinne nuna koshshiza wode nuna maaddiza iza kiyateth nu demmana mala gede iza maaroteththa algaakko ane ammanon shiiqos.

1 Hessa gishshas ta ishatoo! Intte asateththaa geeshshinne Xoos ufayssiza de7o yarsho ooththidi intte shiishshana mala ta inttena Xoossa qadhetan woossays; hessika wozinama asa mala intte Xoossas ooththiza ooso.

16 Xoossa Naa ammanizay wuri mernaa de7o demmanaappe attiin dhayontta mala Xoossi hayssa alameza daro siiqida gishshas ba mexi issi naaza immides.

29 Intte Kirstoosa ammanizayta xalla gidontta iza gishshas waaye ekkizayta gidana mala hayssi Xoossa kiyateththi inttes imettides.

1 GODAA Isra7eele Xoossaa Paaziga ba7aale bonchchanaas Isra7eele asay ubbaynne Yuhuda asay ubbay Yerusalaamen de7iza Xoossa Keeth yaana mala Hizqiyaasi kiittides; qasse Efreeme asaassinne Minaase asaas dabdaabbe xaafides. 2 Kawoy, halaqatinne, Yerusalaamen shiiqida asay ubbay Paaziga ba7aale nam7anththo aginan bonchchanaas qofa qachchida. 3 Qoodan guuththa qeeseti xalla bana geeshshida gishshassinne daro asikka Yerusalaamen shiiqontta gishshas asay Paaziga wodera koyro aginan bonchchanaas dandaybeenna.✝ 4 Kawozinne derezi he qofay lo7o gididayssa be7ides. 5 Kase wogaan azazettida mala Paaziga ba7aalezi daro wode daro asatan bonchchetti erontta gishshas Isra7eele GODAA Paaziga ba7aale Yerusalaamen bonchchanaas Bersaabeheppe biidi Daane gakkanaas diza Isra7eele asay ubbay yaana mala awajjanaas qofa qachchida.

6 Kawozinne iza shuumeti azaziin kiitettidayti Isra7eele deraasinne Yuhuda deraas ubbaas, «Isra7eele asawu! Asoore kawota kusheppe kessi ekkidi attida intteko Xoossi simmana mala intteka, GODAA Abrahaame, Yisaaqanne Yaaqoobe Xoossaako simmite! 7 Intte eriza mala istti qidhes kezanaashe gakkanaas bantta aawata GODAAS ammanettontta ixxida intte aawata malanne intte ishata mala gidopite. 8 Intte GODAAS azazettiteppe attiin kase intte aawata mala wozina muume gidopite! Izi mernaas dummasida Keeththaa haa yiite. Keehi yashshiza iza hanqoy inttefe simmana mala GODAAS haggazite. 9 Intte intte GODAAKKO simmiko GODAA intte Xoossay qadhettizaadenne maarizaade gidida gishshas intte ishatanne intte nayta di7i efidayta sinththan istti maaroteth demmidi ha biittaa simmana; intte izakko simmiko izi ba sinth intteko zaarana» giza dabdaabbe efida.

10 Kiitettidayti Efreeme biittanne Minaase biitta kanththidi Zaabiloone biitta gakkanaas katamappe katama bida; gido attiin he katamatan de7iza asati istta kadhidi istta bolla miiccidanne qilccida. 11 Gidikkoka Aaseere asatappe, Minaase asatappenne Zaabiloone asatappe guuththati banttana kawushshidi Yerusalaame yida. 12 Kawozinne iza shuumeti GODAA qaalay gida mala azazidayssa Yuhuda asay issi wozinan azazettana mala Xoossa kushey Yuhuda asaa bolla dees.

13 Nam7anththo aginan ukeththa ba7aale bonchchanaas keehi daro asay Yerusalaamen shiiqides. 14 Istti dendidi Yerusalaamen de7iza yarshizasohota denththidi exaane yarshizasohota ubbaa diggidi Qediroone Zulle efi olida.

15 Hessafe guye nam7anththo aginan tammanne oydanththo gallas Paaziga dors shukkida; bana geeshshontta qeesetinne Leweti yeellatidi bana geeshshida; histtidi xuugettiza yarsho Xoossa Keeththa ehida. 16 Hessafe guye Xoossaa as Muse wogaa mala Xoossa Keeththaa giddon bantta sohon sohon eqqida; histtidi qeeseti Leweta kusheppe ekkida suuththaa wuxxida.

17 He duulata giddon bana geeshshontta daro asati diza gishshas kase diza wogaa mala bana geeshshonttaytassinne bantta yarsho dorsa laaqqa Xoossas shiishshanaas dandayontta ubbatas Paaziga dorsaa Leweti shukkanaas bessees. 18 Efreeme, Minaase, Yisakoore, Zaabiloone qommotappe daro asati wogay azaziza mala bana geeshshonttayssa gidikkoka, Paaziga ba7aale gibira mida; hessa gishshas kawo Hizqiyaasi, 19 «Abeet asa ubbaas kiya GODAWU, hayti kase wogay giza mala bana geeshshonttayta gidikkoka istti GODAA bantta aawata Xoossaa koyanaas ba wozina giigsida asatas ne atto ga» giidi woossides. 20 GODAY Hizqiyaasa woosa siyidi isttas atto gides.

21 Yerusalaamen shiiqida Isra7eele asay ukeththa ba7aaleza gita ufayssan laappun gallas bonchchides; Lewetinne qeeseti yeththa miishshatan yexxishe gallas gallas GODAA galatida. 22 Hessafe guye Hizqiyaasi GODAA ooson akeekara diza Leweta ubbaa minththeththides.

Leweti ubbay banttas imettida gishshas issifeteththa yarsho yarshishe GODAA bantta aawata Xoossaa galatishe, mishenne uyishe ba7aaleza laappun gallas bonchchida. 23 Duulata shiiqida asay ubbay kaalliza laappun gallassatan ba7aaleza zaari bonchchanaas qofa qachchida; hessa gishshas asay ba7aaleza hara laappun gallas ufayettishe bonchchides. 24 Yuhuda Kawo Hizqiyaasi shiiqida deraas 1,000 korma boorata, 7,000 dorsatanne deyshata immides; qasse iza shuumeti 1,000 korma boorata, 10,000 dorsatanne deysh immida; keehippe daro qeesetikka banttana geeshshida. 25 Kumeththa Yuhuda asay, qeeseti, Leweti, Isra7eeleppe duulata yida asay ubbaynne kase Isra7eele biittafe yiidi Yuhuda biittan diza asay ubbay ufayettida. 26 Isra7eele kawo Dawite naa Solomoone kawoteththa wodeppe haa simmiin hach gakkanaas Yerusalaamen hayssa mala ba7aaley bonchchetti erontta gishshas Yerusalaamen asay keehippe ufayettides. 27 Hessafe guye qeesetinne Leweti dendi eqqidi deraa anjjida; Xoossay istti gizayssa siyides; istta woosaykka salo keeth Xoossako gakkides.

1 «Issi asi ba keeththaayo anjji yeddiin

iza baada hara azina gelikko,

kase anjji yeddidaadey

simmi izikko bizee?

izi biikko he biittaya

mule tunekkee?

Neni gidikko ne siiqiza

cora laggetara laymatadasa;

histtadakka ha7i neni

taakko simmana koyay?» gees.

2 «Ane dhoqqu gaada aykkoy baynda

zumbullata xeella;

neni laymas ichchonttasoy

hessan dizee?

Bonqqana bazzon uttida

panga mala

oge doonan uttada

ne laggeththota naagadasa;

histtada neni laymateththaninne

iitateththan biittayo tunisadasa.

3 Hessa gishshas puuseykka

puusontta mala digettides;

balgo iraykka bukkontta aggides;

ne gidikko hanno gakkanaas

laymateth aggabeekka;

neni yeellatonttaka ixxadasa.

4 Ha7i neni tana,

‹Ta aawawu,

taas naateteththa laggezoo!

5 Neni ubbato ta bolla hanqettanee?

Ne hanqoy mernaassee?› gadasa.

Ee neni hizgaasa;

gido attiin neni dandayda keena

iita miish ubbaa

ooththaasa» gees.

6 Kawo Iyosiyaasi kawotida layth GODAY taas, «Hanna ammanoy baynda Isra7eeley ooththidayssa neni be7adii? Iza dhoqqa zumbullata bolla kezada daashsha miththata garsan laymatadus.✝ 7 Iza hayssa ubbaa ooththadakka taakko simmana gaada qoppadis shin simmabeekku. Qasse ammanettontta izi michcho Yuhudaykka hessa beyadus. 8 Ammanoy baynda Isra7eele dereti laymatida gishshas anjjo waraqata imma yeddadis; Isra7eele michcho ammanettontta Yuhudaykka hayssa be7ashe yayyontta kezada laymatishin be7adis. 9 Ba kawushshateththan biitta tunisadus; miththarakka shuchcharakka laymatadus. 10 Hessan ubbaankka izi michchiya, ammanettontta Yuhuday coo simmidaa misatawusife attiin kumeththa wozinappe taakko simmabeekku» gides.

11 GODAY taas, «Ammanettontta Yuhudappe ammanoy baynda Isra7eeley xilla beettadus.

12 «Ba; baada pudeha baggas,

‹Hanne ammanoy baynda

Isra7eelee simma!

Tani maarotay

kumidaade gidida gishshas

nena iita ayfen xeellike;

mernaaskka hanqettike›

gees GODAY.

13 Gidikkonne neni,

‹GODAA ne Xoossaa bolla

makkallateththan,

ne bonchchoka allaga xoossatas

daashsha miththata garsan

aaththa imoninne

taas azazettontta ixon neni

mooranchcha gididayssa

xalla ammana›

gees GODAY» gides.

14 Qasseka GODAY,

«Intteno ammanettontta

asatoo, simmite;

tani inttes azina;

Tani intte giddofe

issi katamappe issaa,

issi qommofe nam7ata doorada

Xiyoone ehana.

15 «Hessafe guye tani ta wozina mala inttena erateththaninne akeekan heemmiza heenththanchchata inttes immana. 16 Qasseka GODAY intte qooday biitta bolla corattiza wode, ‹GODAA Caaqo Qaala Taabotaa› gi xeygekketa. Izi isttas qofettennanne akeekettenna, dhayennanne haray oosettenna. 17 He woden istti Yerusalaame, ‹GODAA araata› gi xeygana. Kawoteththa ubbaafe asay GODAA sunth bonchchanaas Yerusalaame shiiqana. Hessafe istti bantta iita wozina hanoteththaa kaallettenna. 18 He gallassatan Yuhuda asati Isra7eele asatara gayttidi pudeha bagga biittafe tani kase intte aawatas xinxxo histta immida biitta issife yaana» gees.

19 GODAY, «Tani nena

attuma nayta mala

wostta woththanaakko,

doorettida biittayonne

ay kawoteththika demmontta

lo7o biittayo

nena laatissana qoppadis.

Qasse tana, ‹Ta aawawu!› gaada

xeygana misatides;

tana kaallizasoppe

guye simmontta misatadasa;

20 Gido attiin Isra7eele asawu!

Intte ba azinaas

ammanettontta maccassa mala

taas ammanettibeekketa» gees.

21 Istti GODAA bantta Xoossaa balidi

bantta oge geellasida gishshas

Isra7eele deraa waasoy,

misha yeehoy aykkoy baynda

zumbullata bolla siyettees;

22 Istti, «Intteno ammanoy baynda

asatoo! Taakko simmite.

Intte ammanettana mala,

tani inttena paththana» gides.

Histtiin isttas,

«Ero, nuni neekko simmana.

Ays giikko neni GODAA

nu Xoossa.

23 Nuni zumbullata bollanne

zumata bolla eeqa xoossatas

goynoy tumappe nuus bala;

tumappe nuus Isra7eeletas

atoteththi GODAA nu Xoossaafe.

24 Nuni yelagateththafe doommiin

nu aawati daaburi

demmida ayfeta,

istta dorsatanne meheta,

istta macca naytanne

attuma nayta

tuna xoossati mi dhayssida.

25 Nuni yelagateththafe doommidi

hach gakkanaas,

nunikka nu aawatikka

GODAA nu Xoossa bolla

nagara ooththidos;

GODAAS nu Xoossaas

azazettibeekko;

hessa gishshas ane nuni yeellateth

gullunttidi ichchoos;

qasse kawushshateththi nuna

afala mala kammo» geettes.