1 Iyoobi hizgi zaarides;

2 «Intte tana

awude gakkanaas waayisandetii?

Awude gakkanaas yo7on

taas meqeth menththandetii?

3 Hekko intte tana tammuto cayeeta;

tana kawushshishekka

yeellatekketa.

4 Tumukka tani balettidaa gidikko

ta balay tana xalla qohana.

5 Tumu intte inttena dhoqqisidi

ta kawushshateththaa inttes

marshe miish ooththeeta.

6 Gidikkoka hayssa ubbaa metoza

ta bolla gaththidaynne,

gite giddo tana yeggiday

Xoossa gididayssa

intte erana mala ta koyays.

7 Ta qohettadis gaada woossiin

tana siyiza as demmabeekke;

ta qaala dhoqqu ooththada

magannikokka

suure pirda demmabeekke.

8 Xoossi taas ogeza gordida gishshas

aadhdhanaasoy deenna;

ta baanaasozakka

dhuman gordides.

9 Ta bonchchoza ta hu7eppe qaaridi

tana kawushshides.

10 Ta asateththa Ubbasora

qoxereththidi

mulera laallides;

taas diza hidota

xaphoppe shodettidi kundiza

miththa mala ooththides.

11 Xoossi tana hanqettidi gita meto

ta bolla gaththides;

baas morkke mala tana qoodides.

12 Tana dhayssanaas

ba oosanchchata kiittides;

taas dunkaaneza yuuyi aadhdhidi

tana giddoththida.

13 «Xoossi ta ishati

taappe haakkana mala

ooththides;

tana eriza asati ubbay tana

asa dere as kessida.

14 Ta dabboti taappe haakkida;

ta laggetikka tana balida.

15 Tani tason imaththateth

mokka ekkidayti

ubbay tana balida;

ta garadeti

tana imaththa mala qoodida;

allaga malakka xeellida.

16 Tani ta oosanchchaza xeygishin

izi taas koyenna;

«tana maaddarkkii»

ga ta waassishinkka

ero geenna.

17 Ta machcha taappe ke7iza

peenoza shaatettadus;

ta ishatikka hararettida.

18 Qeeri naytikka tana kadheettes;

tana be7iza wode

ta bolla qilcceettes.

19 Taas mata laggetikka

tana shaatettida;

ta siiqoti ta bolla

morkke gidi dendida.

20 Taas ashozi wuriin

galbazi meqeththara oykettides;

tana shiishshiin attadis.

21 «Ta siiqotoo! Xoossa kushey

tana shocida gishshas

ane zay taas mishettite!

Taas qadhettite!

22 Xoossi tana gooddoyssa mala

intteka tana aazas gooddeetii?

Hayssa gakkanaas intte tana

waayisidayssi gidennee?

23 Hayssa gakkanaas

ta haasayda qaala akeekizaynne

maxaafan xaafiza asi dizaakko

tana ay mala ufayssaneeshin!

24 Iskirtoninne irsaasen xaafettidi

woykko shuchcha bolla

woocetti uttidi

mernaas daana mala

ooththidaakko

ay mala tana ufayssandeeshin!

25 Gido attiin tana ashshizayssi

paxa de7iza mala

wurseththa woden

tana wozzanaas

biitta bolla izi eqqanayssa

tani erays.

26 Taas galbazi meetetti wurikkoka

tani ta asateththafe shaakettada

tani Xoossaa beyanayssa erays.

27 Hara as gidontta

izakka tani ta hu7en

ta ayfera beyana;

ta wozinayakka he gallassayo

keehi laamotees.

28 «Ta siiqotoo!

Tana walassidi waayisanaas

‹Hayssa metoza izi barkka

baas ehides› gidi haasayeeta.

29 Xoossa hanqoy mashshan

qaxxayeteththan

gaththiza gishshas mashshay

inttena montta mala naagettite.

Xoossa pirday dizayssaka erite.»