1 Qasseka Xoossi Iyoobes,

2 «Iyoobee! Asi Ubbaa

Dandayza Xoossara marshettidi

laththana nees misatizee?

Tanara Xoossara marshettizay

nena gidida gishshas

ane taas zaara» gides.

3 Iyoobi zaaridi,

4 «Godoo! Tani aykko maaddontta

laafa asa,

hannife guye ta kushen

ta doona gordada;

co7u guussafe attiin

nees ta zaarana zaaroy

taas deenna.

5 Tani issito gaanayssa gadis;

gido attiin taas

zaariza miishshi baawa;

hayssafe guye ubbaaka

ta haasaykke» gides.

6 Hessafe guye GODAY

gote carko giddon gididi

Iyoobes hizgides,

7 «Ane adde gidikko dendada gixeta;

ta oychchizayssa taas zaara.

8 Tana pirda geellasizaade kessada

nena xillo as kessanaas dafettay?

9 Xoossa wolqqa mala

mino wolqqay nees dizee?

Xoossa qaala gunththa mala

ne qaalay guummanawu

dandayzee?

10 Hessa mala gidikko

ane ne bonchchoninne

ne gitateththan denda!

Ne teemateththinne

gitateththa may7a.

11 Otoranchchata beyada kawushsha;

ne hanqoza istta bolla guussa.

12 Ane lo7eththa xeellada

otoranchchata ubbaa yeellachcha;

iita ooththizayta

istti dizason heen dhayssa.

13 Istta ubbaa moogo may7on xaaxada

issi bolla duufon mooga.

14 Hessafe guye neni

ne wolqqan xoonizayssa

tani nees markkattana.

15 «Tani nena medhdhidayssaththo

Horiqe geetettiza

do7a medhdhadis;

izikka boora mala maata mees.Horiqe

16 Izas xeessan diza wolqqa beya;

izas ulo giddon diza

shaya minoteththa xeella.

17 Izas goynay

Libaanoose ziga miththa mala

sitti gidayssa;

izas gedaa xaphotikka

minonne ordeta.

18 Iza meqeththatikka xarqimalanne

birata marco mala minota.

19 Ta medhdhida medheta

ubbaafe wolqqama;

taappe attiin iza xoonanay

haray deenna.

20 Wora do7ati ubbay kaa7iza zumay,

izas miza miish mokisees.

21 Kuway diza miththa garsan,

maqqa giddoninne

haaththi dizaso

care giddon ichchees.

22 Kuway diza miththati

iza bantta kuwan genththeettes;

shaafa doonan dicciza miththati

iza kammeettes.

23 Shaafa haaththa kixas

izi dagammenna;

Yordaanoose shaafay

keehi kumidi goggiinkka

izi yayyenna.

24 Iza ayfeta toyssidi

iza oykkana asi dizee?

iza siidhekka dafon qachchidi

iza oykkanaas dandayzay oonee?