1 Iyoobi hizgi zaarides;

2 «Ee! Tani hayssa

tumu gididayssa erays;

gido attiin asi Xoossa sinththan

waani xillo gidanaas dandayzee?✝

3 Izarakka ooni marshettanaas

dandayzee?

Izi issi shii oyshota

oychchizaa gidikko

isttafe issinokka zaaranaas

dandayzaadey deenna.

4 Xoossi eranchchanne wolqqama;

oonee izara eqettidi xoonettonttay?

5 Akeekontta zumata kokkorsana;

ba hanqozankka

shirechchi yeggana.

6 Xoossi biitta dizasoppe kokkorsana;

biitta tuussatakka qaaseththana.

7 Awa arshey mokkontta mala

ooththanawu dandayees;

Xoolinttetikka

poo7isontta mala

ooththana.

8 Oonikka maaddontta dishin

salota micciday iza;

izi abba dambala bolla hemettees.

9 Zardo, Ooriyoninne

Piliyaadise geetettiza Xoolintteta,

qasseka duge baggara diza

daro Xoolintteta,

salo bolla medhdhi

woththiday Xoossa.✝

10 Izi ooththiza malalisiza miishshata

nuni pilggidi

akeekanawu dandayokko;

izi poliza makkalla miishshata

nuni qoodanawu dandayokko.

11 «Xoossi ta matara aadhdhikokka

ta demmike;

haa taakko shiiqikkoka

shaakkada erikke.

12 Izi ba koyidayssa ekkiko

oonikka iza diggenna;

‹Ays hayssaththo ooththay?› giidi

iza oychchanaas xalizay deenna.

13 Xoossay ba hanqozappe

guye simmenna;

Era7aabe geetettiza

abba giddo do7ata

maaddizaytikka

iza toho garsan gulbatana.

14 «Histtiin tani izas zaaro

waana immana dandayazinaa?

Izara marshettanaas

ay qaala ta demmanee?

15 Geesh gida ta beettidaakkoka;

ta bolla pirdizaadey

tana maarana mala

woossana attiin

izas zaaro immanaas xalikke.

16 Ta iza sunththa xeygikko

izi zaaro taas immizaa gidikkoka

ta magana izi siyana gaada

ta ammanettike.

17 Izi tana gote carkon liiqisana;

aykko gaasoykka baynda

taas madunththaa ha darsana.

18 Shempo ta zaarana wodey

gakkanaaska

taas shemppo immenna;

ta shemppon waaye kunththides.

19 Taas diza wolqqan

ta izara baaxetana gontta mala

wolqqan izara eqettidi

dandayanay deenna;

ta mootettada iza

laththana gontta mala

iza pirdiza asataakko

shiishshanaas

dandayza asi deenna.

20 Tani geeshshinne xillokoshin

ta haasayay tana

qohanchcha kessees;

ta haasayza haasayati ubbay

ta bolla pirdeettes.

21 «Aykkoka tani

borey bayndaade gidikkoka

ta gishshas qoppike;

ta shemppoyokka harassetays.

22 Xoossi xillozanne qohanchchazakka

dhayssiza gishshas

aykko dummateththika deenna

ta giday hessa gishshassa.

23 Asi iita meton wurshin

izi geeshsha asa meto qidhees.

24 Biittay iita asata kushen

aadhdhi imettishin

izi pirdiza asata ayfe goozees;

hayssa ooththiday Xoossa

gidontta aggiko haray oonee?

25 «Ta layththati woxxizaytappe

haa aadhdhi eesoteettes;

aykko ufayssika

ta demmontta aadhdheettes.

26 Isttika sookke gizayssafe oosettida

wogolo mala eesoteettes;

baqqi ekkiza golle kafo mala

eesoteettes.

27 Tani ta zuuzunththaa balana;

‹Ta sinththaaka kareththo aggada

ane poo7isa bessays› giikko,

28 Xoossi tana geesh ooththidi

qoodonttayssa tani eriza gishshas

metoynne waayey

ta bolla gakkana gaada yayyays.

29 Histtiin ta qohanchcha

geetetta qoodettidaa gidikko

taas hada daaburay aazassee?

30 Tani ta asateththa

saamunan meeccizaa gidikko,

ta kushezakka

keeha geeshshizaa gidikko,

31 ha ubbaa ooththiinkka

neni duge iita ciimman tana olana;

ta may7otikka tana shaatettana.

32 Izi ta mala as gidontta gishshas,

pirdiza asataakko biidi

pirdettoos gaanawu dandaykke.

33 Nu bolla ba kusheza

gaththi woththidi

pirdi nuna shaakkiza asi

nu giddon dizaakko,

34 iza teemateththi

tana hirgisontta mala

Xoossi ba guufeza

ta bollafe denththidaakko,

35 tani izas yayyontta

haasayanakkoshin;

ha7i gidikko ta diza hanon dashe

haasayana dandaykke.