1 Temaane dere as Elfaazey hizgides;

2 «Tumu era asi

carko mala kushen oykettontta

miish haasayi erizee?

Iza ulon qohiza qofay

daanaas bessizee?

3 Era asi aykko

go7ontta qaalataninne

go7ay baynda haasayan

marshettizee?

4 Neni Xoossas yayyizayssa aggadasa;

Xoossas bessiza

goynnozakka diggaasa.

5 Ne qohanchcha gididayssi

ne haasayan erettees;

gido attiin

cinccateththa haasayan

kammanaas baaxetaasa.

6 Ne bolla pirdizay

ne doonappe attiin

tana gidikke;

ne haasayay nenateththaa qonccisees.

7 «Asappe sinththan

yelettiday nenee?

Zumati medhettanaappe

sinththan ne yelettadii?

8 Tumu Xoossa xuura siyadii?

Asa erateth erizay

nena xalla nees misatizee?

9 Nuni erizayssafe dumma miish

ne erizayssi aazee?

Nu erizayssafe nees qonccida

dumma miishshi aazee?

10 Yeletan ne aawappe cimmiza

hu7ey pulumida cimati

qofan nunara deettes.

11 Nu baggara nees yootettiza

Xoossafe imettida minththeththoy

nees gidennee?

12 Nena ne wozinay

ays haraso efizee?

Ays hanqon dereqa xeellay?

13 Hayssaththo ooson Xoossa bolla

ne ayana denththeththadasa.

Hayssa mala hanqo qaala

haasayanawu gakkadasa.

14 «Asi geesh gidanaas dandayzee?

Asho may7iday

xillanaas dandayzee?

15 Xoossay ba kiitanchchata bolla

ammanettenna;

saloykka iza sinththan

geesh gidenna.

16 Moorettidaynne tuniday

nagarakka haaththa mala

uyiza asi ay mala iitaa?✝

17,18 «Istta aawati qottontta

isttas ooththidayssa,

eranchchati qonccisidayssa,

tanikka pilggidayssa

ta nena erisays;

ta nees yootays.

19 Biittaya isttas xalla imettadus;

imaththatikka istta giddon

walakettibeettenna.

20 As waayisishe de7iza iita asi

ba layththa kumeththan

waayettishe daana.

21 Daganththiza giiris izi

ba hayththan siyana;

ubbaa miishshi saro misatidi

izas beettiza wode

iza dhayssiza miishshi

iza bolla yaana.

22 Izas qaaday

mashshan hayqo gidida gishshas,

dhumappe attana hidotay

izas deenna.

23 Kafos wora attida kaththa mala

izi wora attana;

izi dhayana dhuma gallassay

izaakko matidayssa izi erees.

24 Metoynne ceecey iza yashshana;

olas giigettida kawo mala

iza bolla minnana.

25 Hayssi hananay Xoossa bolla

ba kushe denththida gishshassa;

Ubbaa Dandayza Xoossa bolla

xalida gishshassa.

26 Izi ba ordenne

mino gondalle ekkidi

Xoossara eqettana kezides.

27 «Iza ayfey moodhen goozettides;

iza xeessayka ordides.

28 Hayssi ha addezi

mulera kundidi

dhayda katamatan,

laalettanaas matida

kayssa keeththata giddon dees.

29 Duretenna; iza haaroykka

daro wode gam7enna;

biitta bollaka aakkenna.

30 Dhumappe atti baanawu

dandayenna;

tama lacoy haggata

melissidayssa malanne

ciishshatikka carkon

qokkida miththa mala gidana.

31 Hada miishshan ammanettishe

bana barkka baleththofo;

hessankka izi go7ay bayndayssa

gidi attana.

32 Izi wodey gakkontta dishin

uththay meliza malanne

haggatikka cililontta

miththa mala hanana.

33 Izi buron kaxxontta dishe

ayfezi qoqofettiza

woyne miththa malanne

ciishshay qoqofettiza

wogara miththa mala gidana.

34 Xoossa Xoossateththa erontta asatas

zereththi de7enna;

gubbon oosettida keeththatikka

taman dippi gi xuugettana.

35 Hayssa mala asati

gene miish qoppeettes;

metokka medhdheettes;

istta wozinaykka

baleththon kumides.»