1 «Wolqqama uushoppe dendoyssan

ta wozinay kokkorides;

Yashshateththafe dendoyssan

piri baana gakkides.

2 Iza doonappe ke7iza qaala siyite;

Dada mala guummiza

giirissa qaala siyite.

3 Saloppe garsan wolqqanththi

wolqqamees;

biitta gaxa gakkanawu kiittees.

4 Hessafe guye wolqqama

ba giirissa sissees;

yashissiza ba giirissa

dada mala guunththees;

Wolqqanththa poo7oykka

zaari zaari beettees;

ba yashissiza giirissan guummees;

Izi ba giirissa sissiza wode

wolqqanththa diggenna.

5 Xoossa giirissa gunththay

malalisiza gita guunth

guummees;

nuni eranawu dandayontta

gita miishshata ooththees.

6 Biitta bolla shachchi

wodhdhana mala ooththees;

wolqqama iraykka

bukkana mala azazees.

7 Izi medhdhida asati

iza ooso erana mala;

ubbaa asay bantta oosoza

ooththontta mala teqqees.

8 He wode wora do7ati,

baqatidi bantta qoteteththaso

geleettes;

bantta gongolozan qoteteettes.

9 Wolqqama carkoy

pudehappe dendees;

moociza carkoy pudehappe yees.

10 Xoossa peenoy haaththa moocisees;

izappe shach medhdhees.

11 Shaaray haaththa

tookkana mala ooththees;

ba giddon wolqqanththi

wolqqamana mala ooththees.

12 Goda kaaleththon shaarati

biitta yuushon yuuyeettes;

banttana maaddiza

azazotakka poleettes.

13 Xoossi ira bukisizay

biittaa irxxisanaas,

asata qaxxayanaas

woykko ba siiqo qonccisanaassa.

14 Iyoobee! Neni takki gaada siya;

Xoossi ooththiza

malalisiza oosota

wozinan woththada akeeka.

15 Xoossi shaara wostti azazizaakko,

wolqqanththaka

wostti wolqqanththizaakko

neni eray?

16 Shaara salo bolla

wostti woththidaakko,

malalisiza ubbaa eriza Xoossa

oosoza ne eray?

17 Saloy xarqimala misatiza wode,

wolqqama bazzo carkoy

biitta bolla carkiza wode

neni homben seerana.

18 Xoossi salo seerida

mastoote mala micciko,

neni iza matan uttada

maaddanawu dandayay?

19 «Nuus eray pace gidida gishshas

nuni ay giidi

Xoossas zaaranaakko

neni nuna ane tamaarsa.

20 Xoossara haasayana

gaada oychchike;

ta iza oychchada aazas

izi tana dhayssana mala

denththeththoo?

21 Carkoy shaara saloppe

qucci geeshshiza wode,

oonikka xolqiza arshe

tishshi histti

xeellanaas dandayenna.

22 Pudehappe worqqa mala

xolqiza poo7oy yaana;

Xoossi malalisiza

teeman qonccana.

23 Ubbaa Dandayza Xoossay

nu qofappe bolla;

iza wolqqay gita;

izikka tumu pirdizaade.

24 Bantta qofan,

‹Nuni aadho eranchchata› gizayta

izi kadhees;

hessa gishshas asay wuri

izas yayyees.»