1 Temaane dere as Elfaazey

hizgi zaarides;

2 «Asi Xoossa go7anawu dandayzee?

Haray attoshin

era as gidikkoka

go7azi izaadesafe attiin

Xoossas gidenna.

3 Ne xilloteththi Ubbaa Dandayza

Xoossaa ay go7anee?

Wosoy baynda ne de7ozi

iza ay maaddanee?✝

4 Histtiin ne bolla izi pirdidaynne

hayssaththo nena hanqiday

neni Xoos yayyiza gishshassee?

5 Hayssi ubbay nena gakkiday

ne iitateththi darida

gishshassinne

ne nagaray zaway bayndayssa

gidida gishshas gidennee?

6 Issi gaasoykka baynda

ne ishatappe oyso ekkadasa;

qasse istta may7o qaara ekkada

istta kallo ashshadasa.

7 Gafidinne saamettidi daaburdayta

kaththinne haath diggadasa.

8 Ne gadaadenne wolqqama

as gidada

izan diza bonchcho

as gidikkoka,

9 Neni am7e maccassata

mela kushe yeddadasa;

yi7o naytikka

bana ayssana de7oza dhayssadasa.

10 Hayssa gaason

nena oykkana woximadey

nena yuuyi aadhdhides;

ne ezgontta

metoy nena daganththana.

11 Nena Xeeloy metana gakkanaas

nees dhumides;

di7o haaththika nena meeccides.

12 «Xoossay dhoqqa salon

dizayssa gidennee?

Xoolintteti aykkoka

dhoqqasohon diikkoka

izi isttafe bollara diidi

istta xeellees.

13 Neni gidikko, ‹Xoossi ay erizee?

Girdi gida dhuman

izi waani nu bolla

pirdanawu dandayzee?

14 Salo bollan izi simerettishin

dhippi gida shaaray

iza kammiza gishshas

izi beyanawu dandayenna› gaasa.

15 «Nagaranchchati simerettiza

beni ogeza ne kaallay?

16 Isttika wodey gakkontta

sinththara boshan shocettida;

di7onkka meecettidi

xaphora dhayda.

17 Isttika Ubbaa Dandayza Xoossa,

‹Nuuppe ne haakka;

ne nuus ay ooththanaas

dandayay?› gida.

18 Gidikkoka istta keeththa

dureteththan

kunththiday Xoossa.

Hessa gishshas tani

iita asata qofa ekkike.

19 «Kiya asati iita asati

qaxxayettishin

be7idi ufayetteettes;

suure asati istta bolla qilcceettes,

20 ‹Tunkka nu morkketi dhayda;

istta haarozi kumeth

taman xuugettides.›

21 «Hessa gishshas Iyoobe

nenateththaa Xoossas haarisa;

izarakka ne saron da;

ne hayssa ooththiko

lo7o miish demmana.

22 Xoossi nees immiza timirtaa ekka;

iza qaalakka ne wozinan woththa.

23 Nenateththaa ne Ubbaa

Dandayza Xoossaako

ne zaaridaakko,

ne kase mala hanana;

ne sooppe iita ooso digga.

24 Worqqa gudullan ola;

ofire worqqa

shaafa shuchcha mala

wora ola.

25 He wode Ubbaa Dandayza

Xoossay nees

worqqanne muuruta bira gidana.

26 He wode Ubbaa Dandayza Xoossaan

neni ufayettana;

izan ammanettada ne daana.

27 Ne izakko woossiza wode

izi ne woosaa siyana;

ne adinettidayssa izas gaththana.

28 Ne qofay ubbay nees polettana;

nees oge ubbay poo7o gidana.

29 Xoossi otoranchchata kawushshana;

ashketa gidikko izi ashshana.

30 Nenikka suure wozinay

dizaade gidikko

Xoossi iita ubbaafe nena naagana;

ne kushetikka qoho oosoppe

geesh gidikko

Xoossi nena ashshi ekkana.»