1 Temaane dere as Elfaazey hizgi zaarides;

2 «Iyoobee! Issi asi ne bolla

wolqqaththi haasaykko

izaade ne dandayan ezganee?

Haasayanaappe attiin

ooni agganee?

3 Neni daro asata tamaarsadasa;

daaburda qesetakka minththadasa.

4 Kase ne qaalati dhuphettizayta

maaddeetteskoshin;

neni kokkoriza gulbatetakka

minththaasakkoshin.

5 Ha7i gidikko metoy

ne bolla gakkida gishshas

hidotay bayndaade gidadasa;

metoykka ne bolla

minnida gishshas

hidota qanxxadasa.

6 Xoossaas ne yayyiza yashshay

ammanththizaaz gidennee?

Ne suure ogetikka

nees hidotata deettennee?

7 Xillo as gidi dishin

iza metoy gakkidaadey,

suure as gidi dishe

tim7i gi dhaydaadey,

diikko ane qoppa.

8 Tani akeekida mala,

iitateth goyidi meto zerizayti

heytantti ba ooththooro

shiishshana.

9 Istti Xoossa peenon dhayana;

iza hanqo dambalan

istti dippi gi dhayana.

10 Iitati gaammo mala xaaggana;

ba qaala dhoqqu ooththidi

waassana;

Xoossi gidikko isttas

achchaa menththereththana.

11 Gaammoy shankkatidi

mizaaz dhayda wode

hayqqiza mala isttika hayqqana;

gaammo maratikka laalettiza mala

istta naytikka laalettana;

12 Gallassafe issi gallas xuura gidida

kiitay taakko yides;

hessa he kiitaza saasukeththan

ta siyadis.

13 Asay omars wolqqama dhisko

seerida wode,

tana iita agumoy agunththides.✝

14 Baboynne kokkorsi tana oykkiin,

taas meqeththati ubbay

kokkorana mala ooththides.

15 Ayanay ta sinththara aadhdhides;

dagamappe dendidayssan

ta hasay eqqides.

16 Heenkka issi miishshi

eqqi dizayssa beyadis;

tishshi ooththa xeelladis shin

izi aazakko shaakka

eranawu dandayabeekke.

Hessafe guye co7u gidasohoppe

hizgiza qaala siyadis,

17 ‹Xoossa sinththan xillo gidi

beettanaas dandayza asi dizee?

woykko bana medhdhidayssa

sinththan

geeshsha asi beettanee?

18 Xoossi baas ooththizaytan

ammanettontta aggiko,

ba kiitanchchata bollaka

izi mooro miish

demmizaaz gidikko,

19 histtiin haradhdhoy

montta dishin laalettiza

istta yochchay biittafe gidida

urqqafe oosettida keeththa giddon

dizayta bolla

waani ammanettanee?*

20 Maaladoppenne omarsafe giddon

istti meqerettana;

erettontta dishin

istti mernaaskka dhayana.

21 Tole dhishkey

shodettichchida

dunkaane mala

istti erateththi baynda hayqqana.›