1 Iyoobi hizgi zaarides;

2 «Tumukka intte keehi eranchchata;

intte hayqqishinkka erateththi

inttenara issife hayqqana

misatees.

3 Gido attiin taaska intteyssa mala

akeekay dees;

tani inttefe

ay miishshankka guuxxike;

intte haasaydayssa

asi ubbay erees.

4 «Ta Xoossa xeygiin

taas izi zaarida wodey dees;

ha7i tani ta laggetas

qidhes gidadis;

mooroy baynda xillo

tani asa ubbaas qidhes attadis.

5 Metoy iza bolla gakkontta asa

matan metotida asa meto

leqqanayssi kawushsha miishsha;

gido attiin kundanaas

gandigarzaade sugi yeggeeta.

6 Ba eeqa xoossata goynnizayti,

kaysotinne xoossa kaddida

asatikka saron deettes.

7 «Gidikkoka medosata oychcha;

istti nena tamaarsana;

salo kafota oychcha;

istti nees yootana.

8 Woykko biittays yoota;

izakka nena tamaarsana;

abba giddo moletikka

nees yootana.

9 Hayssa ubbaa giddofe Xoossa kushey

hayssa ooththidayssa

eronttay oonee?

10 Shemppora paxa diza

medheteththi ubbaynne

issi issi asa shemppoy

Xoossa maata giddon dees.

11 Inxarsi kaththa qaana

shaakki erizayssa mala,

hayththika haasaya qommota

shaakki erees.

12 Erateththay cimateththan,

akeekaykka layththa

adussateththan beetteettes.

13 «Xoossas gidikko

aadho erateththinne

wolqqay dees;

zoreynne akeekay

iza matappe beetteettes.

14 Xoossi laallidayssa

oonikka zaari keexxanawu

dandayenna;

Xoossi qachchidayssa

oonikka birshanawu dandayenna.

15 Xoossi ira diggiko kosha gidana;

ira bukisikko

qasse biittay haron meecettana.

16 Xoossi minonne xoonizaade;

balettizaadeynne

baleththizaadey,

nam7atikka iza godateththa

garsanna.

17 Izi zorizayta

erateth diggana;

dere kaaleththizayta

izi eeya ooththana.

18 Izi kawota kawoteththa

araataappe woththana;

qasho asa mala dancco birshisana.

19 Qeesetappe istta qeeseteththaa

woththi ekkidi istta gooddana;

godateththa bolla dizayta

istta godateththafe diggana.

20 Ammanettida asata co7u ooththana;

cimatappeka akeeka diggana.

21 Gita asata yeellachchana;

wolqqamata wolqqa diggana.

22 Dhumason qotettida

xuura qonccisana;

sakkanna dhuma

poo7on laammana.

23 Kawotakka gitasana;

zaaridikka dhayssana;

kawoteththaaka darsana;

zaaridikka laallana.

24 Kaaleththizaytas akeekay

paccana malanne

ogey baynda bazzo biittan

toylattana mala izi ooththana.

25 Poo7oy baynda dhumason

istti dhuphettana malanne

maththottida asa mala

istti gadigadana mala ooththana.