1 Na7imaane dere as Zoofaarey

hizgi zaarides;

2 «Iyoobee! Tana yiillo qofay

ne bolla zaaro

immana mala sugides;

hessa gishshassa

ta haasayanawu eesotiday.

3 Tani tana kawushshiza seera siyays;

ta akeekiza akeekazi

tana nees

zaaro imma imma gees.

4 «Asi biitta bolla

beettoosofe doommidi

kaseppe hayssa mala

gidoyssa ne eray?

5 Iita asa ceeqeteththi

guuththa wodessa;

Xoossa kaddiza asatas diza

ufayssay qiphida ayfey

xeellana gakkanaassa.

6 Iita asi aykkoka otorettidi

salo gakkikokka,

iza hu7ey shaara gakki

bochchiinkka,

7 izi ba sheeshsha uteththa mala

mulera pitettana;

kase iza beyishe diza asatikka,

‹Izi awan dizee gaanee?›

8 Agumo mala tim7i gi

dhayza gishshas beettenna;

omarsa elunththa mala

izi dhayana.

9 Izi dizasoppe eeshora

dhayza gishshas,

issito iza be7ida as

nam7anththo zaari beyenna.

10 Iza nayti aadashidi

istta aaway manqotappe

genera bonqqida

miishsha zaarana.

11 Wolqqan kumida yelagateththa

asateththay guuththa

wodeppe guye biitta gidana.

12 «Iitateththi iza doonan

kaththa mala ay mal7ikkoka

ba inxarsan izi laacci xeellikokka,

13 wurontta mala doonan

coommishe gam7ikokka,

14 Iza ulo giddon

camon laamettana;

izas shooshsha

marze mala gidana.

15 Iita asi ba mida miishsha

un7etti zaarana;

ulo giddon dizayssaka

Xoossi iza cooshshana.

16 Iita asi mizayssi wuri

izas shooshsha

marze mala gidana;

shooshsha marze mala gididi

iza wodhana.

17 Wogara zaytey di7o mala goggishin

eessinne maaththi shaafa

haaththa mala goggishin

izi be7ontta hayqqana.

18 Izi ba daaburda daabura ayfe

zaareththi gede immana attiin

ba hu7es meenna.

Zal7idi izi shiishshida

de7ozankka ufayettenna.

19 Hayssika hanzayssi

izi manqota un7eththida

gishshassinne

ba ooththontta keeththa

genen ekkida gishshassa.

20 «Iza hirgeteththazi

izas shemppo dhayssides;

izi shiishshida haaroykka

iza ashshanawu dandayenna.

21 Iza haaroy wuri

qucetti wuriza gishshas

izas doonan gelththanaazikka

attenna.

22 Aykokka izi dure as gidiinkka;

iza yiilloy gakkana;

daro metoykka izara gayttana.

23 Izi ta maada kallana gishin

Xoossi wolqqama hanqo

iza bolla yeggana;

ba hanqozakka iza bolla gussana.

24 Izi birata mashshafe attiko

xarqimala wondafen cadettana.

25 Wondafezikka zokkaara

kanththi ke7ana;

xoxolqu giza xeerazi izas

tireza duusereththidi aadhdhana;

wolqqama hirgan

iza wozinay dagammana.

26 Izi shiishshida haarozi

ubbay girdi gida

dhuma giddon dhayana;

asi oyththontta tamay xuuggana;

izason attiza miish ubbaa

dippi histtana.

27 Izi ooththida nagara

saloy qonccisana;

sa7ayakka izas

morkke gidada dendana.

28 Xoossas hanqo gallas

iza soon diza haaroy wuri

di7on qucetti dhayana.

29 Xoossi makkallanchchatas

woththida qaaday,

iita asati ekkana waagay hayssa.»