1 Iyoobikka ba haasaya

sinththawu gujjidi hizgides;

2 «Suure pirda diggidi

ta shemppoyo

addafe camo ooththida;

Ubbaa Dandayza De7o Xoossa

sunththan caaqqays;

3 Xoossi tana

shemppora woththida

wodey gakkanaas,

4 ubbaaka iita qaalay

ta doonappe ke7enna;

ta inxarsankka wordo haasaykke.

5 Intte haasaydayssi wuri

likke gaada mulekka ekkike;

ta hayqqanaashe gakkanaas

suureteththan minna

eqqanayssa aggike.

6 Tani ta xilloteththan

minna eqqana attiin

xilloteththa aggike;

shemppora paxa diza

layththa ubbaan

ta wozinay ha miishshan sidhenna.

7 «Nagaranchchata bolla

pirdettiza mala

ta morkketa bolla pirdetto;

tana ixxizayta bollaka

gene asata bolla

pirdettiza mala pirdetto.

8 Xoossi istta shemppoyo

istta ashoppe shaakkidi

istta layththa qanxxida wode

Xoossa kaddida asatas

ay hidotay daandee?

9 Metoy istta bolla yiza wode

Xoossi istta waasoza siyandee?

10 Ubbaa Dandayza Xoossan

istti ufayettandettoo?

Woden wodenkka

Xoossa sunththa xeygandettoo?

11 «Xoossa wolqqay ay mala gitakko

ta inttena tamaarsana;

Ubbaa Dandayza Xoossay

qoppi woththoyssa

ta inttefe qottike.

12 Inttenikka hayssa ubbaa ereeta;

histtiin hayssa hada miish

ays haasayeetii?

13 «Hekko Ubbaa Dandayza Xoossay

iita asinne genanchchati

ekkana laatay

hayssafe kaallizayssa.

14 Iza nayti tiripikkoka olan wurana;

iza zereththatikka

kaththi dhayiin koshattana.

15 Hessafe attidayti hargen wurana;

am7etikka isttas yeekkettenna.

16 Iita asi bira

biitta mala shiishshanawu,

may7oka mana biitta mala

dooranawu dandayees.

17 Gido attiin iita asi shiishshida

may7oza xillo asi may7ana;

izi shiishshida biraakka

geeshshati gishetti ekkana.

18 Izi keexxiza keeththatikka

achcharo keeththa malanne

kath naagizaadey aqiza

gaabba mala laalettana.

19 Iita asi wurseththa wode

dure gididi ichchees;

izi beeggiza wode gidikko

iza aqotay ubbay dhaydes.

20 Dagamay iza bolla di7o mala

qoppontta dishin gakkana;

giddoththika gote carkoy

iza denththi efana.

21 Arshey mokkizaso bagga carkoy

izasoppe iza pitti dhayssana.

22 Izi baqatidi atti baanaas

baaxetikkoka

carkozi qadheteththi baynda

iza bolla gede minnana.

23 Carkozi iza bolla kushe baqqides;

izi dizasoppe wayqeththan

pixiri yeggides.