1 Iyoobikka ba haasaya

sinth gujjidi hizgides;

2 «Taas ha7i de7ozi

kase Xoossi tana

naagiza wodeza mala gididaakko

tana ay mala ufayssandeeshaa!

3 He wode dhuma giddora ta bishin

Xoossi taas poo7isishin

tani poo7on hemettaysikoshin.

4 Xoossa maadoy ta keeththaa

kase naateteththa wode

naagizayssaththo

ha7ikka naagidaakko

aazee dizay?

5 Ubbaa Dandayza Xoossay

tanara diza gishshas

ta nayti ubbay

ta yuushon deetteskoshin.

6 Tani toho maaththan

meecettanaashe gakkanaas

daro maath demmayskoshin;

wogara miththati

mela biittankka tokettidi

di7o mala goggiza daro zayte

taas immeetteskoshin.

7 Katama penge achchan diza

dubbusha baada

duulatan ta uttiza wode,

8 naateththa nayti tana be7idi,

bonchchos ta sinththafe

issi bagga geettesishin;

cimatikka ta bonchcho gishshas

ba uttidasohoppe

dendi eqqeettesishin.

9 Haasayshe diza dere kaaleththizayti

tana be7idi bantta kushetan

ba doona doona oykkidi

co7u geetteskoshin.

10 Dere daannatikka tani dizason

co7u geettesishin;

isttas inxarsi oykettiin

haasayaykka istta xooneeskoshin.

11 Tana siyida ubbay nashshides;

tana be7ida ubbay galatides.

12 Hayssika haniday

tani manqota woosa siyada

istta ashshizayssanne

yi7o nayta

ta maaddiza gishshassa.

13 Hayqqana matida asata

ta maaddiza gishshas

tana istti anjjida;

am7e maccassata ta maaddiza gishshas

ufayssan yexxida.

14 Xilloteth may7o mala may7adis;

suure pirdaka

kaabba mala gopha may7adis;

qoobe malakka

hu7en woththadis.

15 Qooqetas ayfe,

wobbetaskka toho gidadiskoshin.

16 Manqotas aawa,

ta erontta asataskka

apakatokoshin.

17 Gene asa banqila menththadis,

izi bonqqi ekkidayssaka

iza doonappe yegisadis.

18 «Tani, ‹Ta layththay

ancco mala dariin

tani tason diza mala

bonchchon hayqqana›

gadiskoshin.

19 Xaphoti ubba wode

haaththe demmiza malanne

haggatikka xaazan

cililiza miththa malakkoshin.

20 Ubba wode

ta bonchchettida mala

dayskoshin;

ta wolqqayka

ubba wode ooraxeskoshin.

21 Asay ta zoreza

laamotan co7u giidi ezgees.

22 Ta haasayay istta aliza gishshas

taappe guyera haasayza

asi deenna.

23 Goshshanchchay badhdhesa

ira demmanawu

amottizayssa mala

isttika ta haasaya siyanawu

bantta doona doydi

naageetteskoshin.

24 Ta miicca bessishin

istti ufayettetes;

ta sinththay poo7ishin xirphotida

istta sinththay birshettees.

25 Kase ta istti

koyida mala ayssayskoshin;

ba ola asa kaaleththiza

kawo mala

ta istta kaaleththadiskoshin;

istti muuzottishin

tani istta

minththeththayssikoshin.