1 Shuha dere as Belidaade geetettizayssi hizgidi zaarides;

2 «Ne doonappe ke7iza qaalati

gote carko mala;

awude gakkanaas hayssaththo

ne haasayanee?

3 Xoossi pirda bokkasi erizee?

Ubbaa Dandayza Xoossay

xilloteth bokkasi erizee?

4 Ne nayti Xoossa qohidaa gidikko,

istti bantta pirda ekkida guussa.

5 Gidikkoka ne Xoossako simmiko,

Ubbaa Dandayza

Xoossa woossiko,

6 suurenne geesh gidikko

izi eesoti nees bessiza sohon

nena zaarana.

7 Ne doomeththay

guuth misatikkoka,

nees poloy keehi lo7o gidana.

8 «Ane kase yeleta oychcha;

kase aawati gakkidasoza

pilgga xeella.

9 Nu layththazi

buro guuth gidida gishshas

nuni aykkoka erokko;

nu layththayka

eesho mala aadhdhizaaza.

10 Istti nees tamaarsizayssinne

nees yootizayssi

ba akeekizayssafe

ekkidi gidennee?

11 Tumukka carey bayndason

shacca maatay mokki erizee?

Haaththi bayndason

marcoy cililizee?

12 Hayssi hanontta aggiko diccidi

buuch gakkanaappe sinththan

buro cililan dishe melees.

13 Xoossa dogiza asata

ubbaa wurseththay

hessa mala hanana;

Xoossi baawa giza asata

hidotay qanxxettana.

14 Achcharo keeththa mala

miishshan ammanetteettes;

istti hidota ooththiza

miishshi diikkoka

kawushshara dhayana.

15 Achcharo keeththa bolla

istti zemppizaa gidikko

izi minni eqqenna;

achcharo keeththaza izi oykkiko

duuxeretti wodhdhana.

16 Haaththa kallida harumay

ho7o demmidi daayees;

17 Xaphoza shuchcha

muuhe giddon yeddees;

zaalla za7an xaphees.

18 Ba dizasoppe shodettiza wode

izi dizasozi erettenna.

19 Iza wurseththi hessa mala gidees;

hara maatati biittafe doleettes.

20 «Xoossi wosoy baynda

asata olenna;

iita asata qese minththenna.

21 Hessa gishshas nenikka

ufayssan miiccana malanne

‹Ililana› mala izi ooththana.

22 Nena ixxiza asati gidikko

yeella may7ana;

iita asata keeththika dhayana.»