1 Iyoobikka hizgi zaarides;

2 «Ane ta haasaya

wozinappe ezgite;

hayssi intte tana

minththeththida mala

inttes qoodettana.

3 Issito haasayana mala

taas gishi immite;

hessafe guye intte koyida mala

tana qidhanawu dandayeeta.

4 «Tani asho may7ida asa

bolla mishettazinaa?

Histtiin taas dandayontta aggiko

izan aazi malalisizee?

5 Ane taakko ha xeellite;

haasayay inttena

xoonanaashe gakkanaas

ta hanozi inttena shaaphees.

6 Tani qoppishin tanakka daganththees;

ta asateththaaka

yashshan kokkorisees.

7 «Ays iita asata

layththay aduqqidi

istta haaroykka daridi

biitta bolla dizee?

8 Ays istta naytinne nayta nayti

diccidi lo7i dishin beyizoo?

9 Istti aykko hirgay baynda

saron deettes;

Xoossafe boshay

istta bolla gakki erenna.

10 Istta mehetikka

issi metoy baynda yeletteettes;

isttas miizatikka

awucayontta yeleettes.

11 Bantta nayta

dorsa wude mala heemmeettes;

istta naytikka

guppi guppi kaa7eettes.

12 Karabe baqqishe, diiththi diixxishe,

dinke punnishe

ufayssan yexxeettes.

13 Bantta layththa wogeteththaninne

ufayssan aaththeettes;

waayettontta ha biittafe

hayqon shaaketteettes.

14 «Hessi hessaththo gidi dishin

istti Xoossa,

‹Nuuppe haakka; ne oge eranaas

nu koyokkon› geettes.

15 ‹Nu izas goynnana mala

Ubbaa Dandayza Xoossay

izi oonee?

Nu iza woossiin izi nuna

ay maaddanee?› geettes.

16 Istti hessa gizay

istta kushen diza haaroy wuri

istta wolqqan isttas shiiqida

misatiza gishshassa.

Tani gidikko

iita asata qofa ekkike.

17 «Histtiin iita asatas xomppey

to7i erizee?

Boshay istta bolla gakki erizee?

Xoossika istta bolla

hanqetti erizee?

18 Istti happa mala carkon bidasoy

gudulla mala gote carkon

istti pitetti

dhayda wodey dizee?

19 Intte, ‹Aawati qohida qohon

Xoossi nayta hanqettees› geeta;

ane Xoossi nagaranchchata

qaxxayo;

hessaththo hankko bantta qoho

istti akeekanawu dandayeettes.

20 Nagaranchchati bantti ooththida

qohon bantta qixaate ekketto;

ubbaa dandayza Xoossi

ba hanqoza istta bolla eho.

21 Asi hayqqidaappe guye

ba naytas qoppi erizee?

22 «Xoossi gita asata bollaka pirdana;

histtiin asi iza pirda

tamaarsana dandayzee?

23 Issi issi asati

bantta layththa wurseththi

gakkanaas aykko metoy

istta bolla gakkontta minotanne

hargey bayndayta gididi

24 istta bollay ordidi

kayshida mala,

istta meqeththaykka

shicida mala hayqqeettes.

25 Harati gidikko yiillonne

camon kumida mala

meton oykettida mala

aykko lo7o miish

be7ontta hayqqeettes.

26 Ubbayka duge duufon gelidi

biitta gideettes;

guxuneykka istta laattana.

27 «Be7ite! Intte tana qohanaas

qoppidi intte qachchida

geneza ta erays.

28 Intte, ‹Hayssa

gita addaasoy awanee?

Nagaranchchaza

duussasoy awanee?› geeta.

29 Mandara asata oychchibeekketii?

Istti inttes markkattida

markkateththaa

intte ekkeketii?

30 Heyti, ‹Iita asata bolla

boshay yiza wode

qohoy istta gakkenna;

Xoossa hanqoy qoncciza wode

istti atti baana› giidi haasayda.

31 Iita as iza iitateththaa gishshas

walassizay oonee?

Iza iita oosoza gishshas

iza qaxxayanay oonee?

32 Izi hayqqidaappe guye

iza aha tookki ekkidi

duufon efeettes;

iza duufoykka naageettes.

33 Shoobban diza biittay

izas giiga gidees;

asati ubbayka iza kaalleettes;

addafe daro asatikka

izappe sinththara beettes.

34 «Histtiin intte hada gidida yo7ora

tana minththeththanaas

ays qoppeetii?

Intte taas immiza

zaaroti ubbay wordo.»