1 «Istta aawati

taas dorsa wudeza heemmiza

ta kanatara montta mala

istti ta kadhiza asatakkoshin;

ha7i gidikko

layththan taappe naatiza asati

ta bolla qilcceettes.

2 Isttas wolqqay ixxida gishshassinne

istta bollay gilqida gishshas

aykkoka tana go7ettenna.

3 Metoppenne kosha daroppe

dendidayssan

bazzo biitta bi biidi

miththa xapho maxeththi

gancceettes.

4 Maxine mala mal7iza bazzon

mokkiza dumma dumma

miththa hayththata maxeettes;

mal7ontta sankkara xapho

qorereththi meettes.

5 Asi kaysota waassidi

gooddizayssa mala

isttika deraa giddofe gooddeettes.

6 Istti bantta duussaso

haaththi baynda shaafa giddon,

asi baynda bazzo biittaninne

kelka giddon bookettida

gongolotan

dosay baynda de7ida.

7 Woray dizaso yuuyi yuuyi

wora do7ata mala waasseettes;

wora garsan issi bolla

shiiqetti aqeettes.

8 Bantta biittafe xurqafen shocetti

goodettida gishshas

lo7o sunththinne wozinay

bayndayta gididi deettes.

9 Ha7i qasse istta nayti

yeththan tana qidheettes;

tani istta giddonkka

miiceteththas attadis.

10 Tana shaatettidi

taappe haakkeettes;

aykko yeellayka baynda

ta sinththan cutetteettes.

11 Xoossay ta wolqqa daabursidi

tana kawushshida gishshas

istti qasse bixalay baynda

para mala

ta bolla dhoodhu dhoodheettes.

12 Taappe ushachcha baggara

yeda diccidayti

ta bolla dendida;

tana oykkanaas

woximade woththida;

tana giddoththida.

13 Taas aadhdhizaso dhayssidi

tana wodhana koyeettes.

Istti hayssaththo ooththanayssa

digganaadey deenna.

14 Di7oy menththi gelizayssa mala

isttika tana cuggi gelida;

ubbaaka menththereththidi

ta bolla yida.

15 Gita dagamay tana gakkides;

taas diza bonchchoy

carko mala aadhdhides;

ta attana giza hidotay

shaara mala dendi dhaydes.

16 «Ta shemppoya keeha ceecadus;

hayqoska matadus.

17 Omars kumeth ta meqeththati

hargen waayetteettes;

sakozikka taas shemppo

immenna.

18 Tana sakkiza

wolqqama sakoza gaason

ta may7oy gundi moorettides;

qoodhe xunththa shamize mala

tana cuulli oykkides.

19 Xoossi tana duge

biittan olida gishshas

tani gudullanne

bidinth misatadis.

20 Xoossoo, ta nena woossadis;

gido attiin ne taas zaarabeekka;

ta eqqada neekko woossadis;

neni gidikko ne sinththa

taakko zaarabeekka.

21 Ne taas addafe menxe iitadasa;

neni ne gita wolqqankka

tana gooddadasa.

22 Ne tana denththada

carko bolla woththadasa;

izi tana yuushshana malakka

ooththadasa;

gote carkoyka

tana shirechchi shirechchi

yeggees.

23 Asa ubbaas qaada gidida hayqos

ne tana aaththada immanayssa

ta erays.

24 «Issi metotida uray

maado demmanaas

ba kushe miccidi woossishin

tumappe ay asikka iza qohenna.

25 Tani metotida asatas

yeekkabeekkinaa?

Manqotaska mishettabeekkinaa?

26 Lo7o miish demmana ga

ta naagishin

iita miishshi tana gakkides;

poo7oy yaana ga ta naagettishin

taas gallassay dhumides.

27 Ta wozinay daro ceecides;

ay saroka demmabeekke;

meto gallassatikka

ta bolla gakkida.

28 Ta bollay awa xuussan gidontta

muuzoteththan karexxides;

duulata asa sinththan eqqada

maado taas oychchays.

29 Asappe shaakettada

worakanatas isha,

guttotas lagge gidadis.

30 Taas galbazi karexxidi dendides;

taas bollazikka

mishan xuugettides.

31 Tani ta ufays

isttan qonccisiza

bagananne zayey

ha7i ta kayottada

kessiza zilassa qaala

sissiza miish gidida.