1 «Neni lewataane geetettiza

abba giddon diza do7a

mole oykkiza manxakon

oykkanaas dandayay?

Woykko iza inxarsaa

wodoron qachchanaas dandayay?✝

2 Iza siidhezan dafo aaththada,

woykko iza gacoza

manxakon gelththada,

oykkanaas dandayay?

3 Izi, ‹Tana maararkkii!› gi

nena woossanee?

Woykko lo7o qaalan

nena oychchandee?

4 Nees mernaas aylle gididi

nees ooththanawu

izi nees qaala gelanee?

5 Asara meeze kafo mala

ne iza nenara meezesanee?

Woykko nees macca nayta

kaassana mala

ne qachcha woththanee?

6 Mole zal7anchchati

iza shammanawu

miishshan marshettanee?

Woykko qanxxereththidi

iza banttas gishettanee?

7 Iza galbakka ne koyidasora

tooran cadda daakkanaas

dandayay?

Woykko iza hu7eza

hoxe miishshan

cadda lukkanawu dandayay?

8 Ane neni iza dandayana gidikko

kushen bochcha!

Izara ne baaxetida baaxe

wodenawukka balakka;

nam7anththo izara

ne baaxetanaas kajjalakka.

9 Lewataane geetettiza

abba giddo do7ara baaxetidi

iza xoonana kajjalos

dhaley deenna.

iza be7iza ubbay

babon kokkorees.

10 Iza bolla meto gaththana guussi,

hessa keena deexo gidikko,

histtiin tanara eqettanaas

xalizaadey izi baas oonee?

11 Saloppe garsan diza miishshi

wurikka taassa;

histtiin ta izas zaarana mala

taas tal7iday oonee?

12 Lewataane geetettiza

abba do7a gishshas,

iza mino wolqqa gishshassinne

izas lo7iza bolla gishshas,

ta qonccisontta aggike.

13 Orde gidida iza galba shooqanaas,

woykko iza banqila poqqanawu

dandayzay oonee?

14 Keehi yashissiza achchati diza

iza banqilata pooqqana

dandayzay oonee?

15 Izas zokko galbay

maarara uttida gondalleta mala;

addafe shiddi oykettidayta.

16 Istti issoy issaara

shiphi gida gishshas

Istta giddora haray attiin

carkoyka aadhdhenna.

17 Istti ubbayka issoy issaara

oyketti uttida gishshas

ay miishshika

istta shaakkanawu dandayenna.

18 Izi dhishiza wode

xoxolqu giza poo7oy beettees;

iza ayfetikka wontta maalado

arshe mala poo7eettes.

19 Iza doonappe tama lacoy kezees;

tamaa pinxeththika

laalettishe beettes.

20 Penttiza disttey

uttida coocen diza

afiray cuwattiza mala;

iza siidheppe cuway

kezishe beettes.

21 Izi shempiza shemppoza seelay

xiixinththa oyseththees;

tama lacoykka iza doonappe kezees.

22 Iza morgen wolqqay

kumida gishshas

iza sinththay yashissees.

23 Iza ashoy dila7a gidida gishshas

iza bollay birata mala minnees.

24 Izas tiray shuchcha mala mino;

gaacciza woxa malakka mino.

25 Ha do7azi dendiza wode

wolqqamati

attontta babon kokkoreettes.

26 Ay mashshaninne tooran

woykko wondafeninne

caddizaazan,

iza istti caddikokka xoonettenna.

27 Izi birata maqa mala

menththereththees;

Xarqimalakka musa miththa mala

tiifereththees.

28 Iza bolla wondafe xongikokka

izi yayyidi baqatenna;

Yanbarsha shuchchika

iza sinththan ishina mala.

29 Koxe maata mala qoodees;

asi iza bolla toora xongishin

qidhe miich miiccees.

30 Izas ulo galba hanchchazi

izi urqqa giddora bishin

biitta maarasha mala bookkees.

31 Abba haaththa pentta mala pocisees;

oton penttiza

zayte mala podhisees.

32 Izi aadhdhi biza ogey poo7isees;

abba haaththaaka

hoomo coppu histtees.

33 Izi yash erontta medheta;

biitta bolla iza misatiza medhetay

mulekka deenna.

34 Keehi gita gidida medhetatakka

izi kadhees;

izi do7a ubbaa bolla kawo.»