1 «Genessati yeliza wode ne eray?

Wusha geetettiza do7ay miixattidi

yelishin beya eray?

2 Istti seebbatidi

ay lagge wode gam7izaakko

awude yelizaakko ne eray?

3 Gulbati miixattishe bantta marata

istti yelizay

awudekko ne eray?

4 Istta marati

woran diccidi minneettes;

isttafe shaakettidi beettes;

bidaappe guye

bantta aayetakko simmettenna.

5 Hardiday yeda daana mala

ooththiday oonee?

Istta qashoppe birshiday oonee?

6 Bazzoza isttas

dizaso histta immadis;

maxiney diza demban

istta woththadis.

7 Kachchi dariza katamatappe

haakkidi deettes;

guyera laaggizayti

qoodizayssa dosettenna.

8 Zumata bollan pe7eettes;

heen baas gidiza

cilila maata koyeettes.

9 «Menththi nees ooththanaas

eeno gaandee?

Woykko ne zedhen

eeno gi eqqandee?

10 Menth waaxada

gosh goyanawu dandayay?

11 Iza minoteththan ne ammanettay?

Nees deexxiza oosoza

izi ooththana mala

izas agga eray?

12 Izi neekko simmi yaana mala,

ne kath bukkiza baley dizaso

miiyanayssa ammanettay?

13 «Yanchchay ba qefe

eeson miccawus;

gido attiin

sangano kafo mala piradhdhuku.

14 Yanchchay ba phuuphphulle

biittan yeggawus;

biitta giddon uttidi

ho7ana mala ooththawus.

15 ‹Heera aadhdhizaadey

ba tohon menththees;

wora do7atikka

yedhdhi liiqiseettes›

gaada qoppuku.

16 Ba ciyetas allaga mala

menxe iitawus;

izi daaburay hadan attikokka

wuda guukku.

17 Hayssaththo izis cinccateth

dhayssada iza erontta mala

ooththiday tana.

18 Iza dendada woxxiza wode,

banara gaade woxxiza

togata bolla miiccawus.

19 «Iyoobee! Paratas wolqqa

immidaynne adussa gamma

istta morgen mayziday nenee?

20 Parata boole mala guppizay

istti harbuqishe asata

daganththana mala

ooththizay nenee?

21 Parati ola demba togetti bishe,

bantta wolqqankka ceeqettishe,

loddan adaraaso doommeettes.

22 Yash giza miish mulekka erettenna;

ay miishshika

istta daganththenna;

istta bolla giththa mashsha;

denththidaakkoka

guye simmettenna.

23 Istta toggiza olanchchati

oykkida ola miishshati,

wawaci gishe bantta giddon

giirettishe siyetteettes.

24 Zayey zayetishin co7u gi

eqqanawu dandayettenna;

yiilloninne hanqon kumidi

ola demba woxxeettes.

25 Zayey punettida taybon

ufayssan wayqeettes;

haakon dishe ola peeno ereettes;

Ola kaaleththizayti

immiza azazozanne

olanchchata ceeqeteththa siyeettes.

26 «Xiloy salo bolla paallizay,

izi ba qefeza dugeha miccizay

ne erateththanee?

27 Golley pude ke7idi

dhoqqasohon ba keeth keexxizay

ne azaziinee?

28 Golley zaallata giddon aqees;

kelka giddon ba keeth keexxees;

zaallatikka izas

qotettizaso gideettes.

29 Heen uttidi baas

miza miish xeellees;

iza ayfetikka

haakon dizaaz demmeettes.

30 Hayssa malan golleti

mizaazi dizaso shiiqeettes;

istta ciyetikka

suuth uyeettes» gides.✝