18 Nde luxi alo i tan, Ala,

i tan naxan i ya yamaan muxu dɔnxɛne

yulubin xafarima,

i tan naxan murutɛn mafeluma?

I ya xɔlɔn mi buma han habadan

amasɔtɔ hinanna rafan i ma.

1 Dawudaa bɛtina, bɛti baane kuntigin xa. 2 A naxan ba Nabi Natan to fa a fɛma a yalunyaan ligaxina e nun Batiseba.

6 Alatala, i xaxili lu i ya kininkininna nun hinanna xɔn

bayo e yi na xabu a fɔlɔni.

7 I nama i miri n ma foningeya yulubine nun matandine ma!

N suxu i ya hinanni,

amasɔtɔ i fan, Alatala.

1 Ala Batu Banxi yisiga bɛtina.

Alatala, n bata n xui ramini i ma tɔrɔni.

2 Marigina, n xuiin namɛ,

i yi i tuli mati n ma maxandi xuiin na.

11 N mi i ya tinxinyaan namaraxi n kedenna xa.

N ni i ya ɲɔndin nun marakisina fe falama nɛn.

N mi i ya hinanna nun i ya lannayaan luxunɲɛ yamaan ma.

6 Yati, i ya fanna

nun i ya hinanna birama n fɔxɔ ra nɛn

n siin sogen birin yi.

N luma nɛn Alatalaa banxin kui

han n siin soge dɔnxɛna.

13 Alatala kininkininma a yɛɛragaxu muxune ma nɛn

alo fafan kininkininma a diine ma kii naxan yi.

15 Koni Alaa kiseen mi maligaxi Adama hakɛn na. Hali muxu wuyaxi to bata sayaan sɔtɔ a tan kedenna hakɛn xɔn, Alaa hinanna nun a kiin hinanna gbo na xa, a naxan fixi muxu wuyaxi ma muxu keden peen barakan xɔn, Yesu, a Muxu Sugandixina.

15 Na di nayi? A lan en xa lu yulubin ligɛ ba, bayo en mi fa sariyan bun ma sɔnɔn, fɔ Alaa hinanna? Ɛn-ɛn de!

4 Koni Alaa kininkininna gbo, a bata en xanu xanuntenya tilinxin na. 5 En tan naxanye yi faxaxi en hakɛne fe ra, Ala bata en niin bira en yi a Muxu Sugandixin barakani. Ɛ kisixi Alaa hinanna nan xɔn ma.

9 A yi n yabi, a naxa, "N ma hinanna bata i wasa. N sɛnbɛn nakamalima muxuna sɛnbɛtareyaan nin." Nayi, n mafura n yɛtɛ matɔxɛ n ma sɛnbɛtareyani, alogo Alaa Muxu Sugandixin sɛnbɛn xa lu n xɔn ma.

13 Naxan na a hakɛne luxun,

na mi hɛrin sɔtɔma.

Koni naxan na a ti e ra,

a xɛtɛ e fɔxɔ ra

Ala kininkininma na ma nɛn.

7 Muxu ɲaxin xa xɛtɛ a kiraan fɔxɔ ra,

hakɛ kanna xa a miriyane lu,

a tubi Alatala ma,

naxan kininkininma a ma,

en ma Ala naxan a mafeluma hinanni.

18 Anu, Alatala ɛ mamɛma

alogo a xa hinan ɛ ra,

a kelima nɛn a yi a kininkininna yita ɛ ra.

Ala naxan kiti kɛndɛn sama,

na nan Alatala ra.

Sɛwan na kanne xa

naxanye e xaxili tima a ra.

13 Ɛ siga, ɛ sa Kitabuna falani ito bunna fɛsɛfɛsɛ, a naxa, ‘Hinanna rafan n ma dangu saraxan na.’* Amasɔtɔ n mi faxi tinxin muxune xan xilideyi fɔ hakɛ kanne."

21 Na xanbi ra, Piyɛri yi fa Yesu fɛma, a yi a maxɔdin, a naxa, "Marigina, n xa ngaxakedenna mafelu dɔxɔɲa ma yoli, a na n hakɛn tongo waxatin naxan yi? Han dɔxɔɲa ma solofere ba?" 22 Yesu yi a yabi, a naxa, "N xa a fala i xa, dɔxɔɲa ma solofere mi a ra de, fɔ tonge solofere e nun solofere."

14 "Amasɔtɔ xa ɛ ɛ hakɛ tongone mafelu, ɛ Fafe naxan ariyanna yi, na fan ɛ mafeluma nɛn.

31 I ya kininkinin gbeeni,

i mi e raxɔri, i mi e rabeɲin,

bayo Ala diɲaxi kininkininxin nan i tan na."

5 A lan muxune xa donla so fonisireyani,

a yi a feene raba tinxinni.

17 Marigina nxɔ Ala,

i ya fanna xa lu nxu xɔn.

Nxɔ wanle rasɔnɔya nxu xa,

yandi nxɔ wanle rasɔnɔya nxu xa.

16 Nanara, en na en maso Ala hinantenna manga gbɛdɛn na xaxili ragidini alogo en xa kininkininna nun hinanna sɔtɔ en makoon naxanye ma.

1 Ngaxakedenne, Ala to kininkininxi ɛ ma, n na ɛ mafanma ɛ ɛ fati bɛndɛn fi Ala ma saraxan na ɛ dunuɲa yi gidini, a sariɲan, a rafan Ala ma. Na nan findixi batu faɲin na ɛ naxan ligama Ala xa.

16 Amasɔtɔ Ala bata dunuɲa xanu han a bata a Dii Xɛmɛ keden peen fi en ma, alogo muxu yo na dɛnkɛlɛya a ma, na nama halagi fɔ a habadan nii rakisin sɔtɔ.

29 Bayo a bata a ragidi a hinanni a ɛ xa la Alaa Muxu Sugandixin na, ɛ mɔn yi tɔrɔ a fe ra,

1 Manga Xesekiya yi xɛrane rasiga Yuda yamanan yiren birin yi. A mɔn yi bataxine sɛbɛ Efirami nun Manase kaane ma, alogo e xa fa Alatala Batu Banxini Yerusalɛn yi, e fa Alatala tantun, Isirayilaa Ala, Halagi Tiin Dangu Lɔxɔn Sanla* rabadeni. 2 Mangan nun a kuntigine nun yamaan birin bata yi lan a ma Yerusalɛn yi a e xa Halagi Tiin Dangu Lɔxɔn Sanla raba ɲɛɛn kike firinden ma. 3 Bayo saraxarali wuyaxi mi yi sariɲanxi na waxatini, yamaan mɔn munma yi malan Yerusalɛn yi singen, e mi yi nɔɛ na sanla rabɛ singen. 4 Bayo mangan nun yamaan lanma feen nan yi a ra, 5 e yi a ragidi, a xa rali Isirayila birin ma, keli Bɛriseba taan ma han Dan yamanani alogo muxune xa fa Yerusalɛn yi, e fa Halagi Tiin Dangu Lɔxɔn Sanla raba mɛnni Alatala xa, Isirayilaa Ala. Amasɔtɔ yamaan mi yi fa na sanla rabama e bode xɔn alo a yi sɛbɛxi kii naxan yi. 6 Xɛrane yi siga mangan nun a kuntigine bataxine ra Isirayila nun Yuda yamanan yiren birin yi, alo mangana a yamarixi kii naxan yi. E naxa, "Ɛ tan Isirayila kaane, ɛ xɛtɛ Alatala ma, Iburahimaa Ala, Isiyagaa Ala, Isirayilaa Ala alogo a mɔn xa xɛtɛ ɛ ma, ɛ tan yamaan muxu dɔnxɛn naxanye luxi ɛ nii ra, ɛ tan naxanye tangaxi Asiriya mangane ma. 7 Ɛ nama lu alo ɛ fafane, alo ɛ ngaxakedenne, naxanye mi yi tinxinxi Alatala yɛɛ ra yi, e benbane Ala, naxan e ba gbalon dɛ alo ɛ a toma kii naxan yi. 8 Nayi, ɛ nama tuli maxɔdɔxɔ ayi alo ɛ benbane. Ɛ fa Alatala ma, ɛ fa a yire sariɲanxini, a dɛnaxan nasariɲanxi han habadan, ɛ wali Alatala xa, ɛ Ala, alogo a xɔlɔ gbeen xa xɛtɛ ɛ fɔxɔ ra. 9 Xa ɛ fa Alatala ma, muxun naxanye ɛ ngaxakedenne suxu konyiyani, ne kininkininma nɛn e ma, e mɔn yi xɛtɛ yamanani ito yi. Alatala hinan, ɛ Ala, a fan, a mi a yɛtagin luxunma ɛ ma, xa ɛ xɛtɛ a ma." 10 Xɛrane yi siga taane yi Efirami yamanan nun Manase yamanani han Sabulon yamanani. Koni, muxune yi lu e magelɛ. 11 Koni, Aseri bɔnsɔnna muxuna ndee nun Manase bɔnsɔnna muxuna ndee nun Sabulon bɔnsɔnna muxuna ndee yi e yɛtɛ magodo Ala xa, e tin sigɛ Yerusalɛn yi. 12 Ala yi muxune bɔɲɛn masara Yuda fan yi, e mangan nun a kuntigine yamarin suxu, alo Alatala a falaxi kii naxan yi.

13 Yama gbeen yi fa Yerusalɛn yi Buru Tetaren Sanla* rabadeni kike firindeni. Yamaan yi gbo han! 14 Suxure batuden naxanye yi Yerusalɛn yi, e yi ne birin kala e nun e wusulan gandene, e yi ne woli Kedirɔn lanbanni. 15 Ɲɛɛn kike firinden xi fu nun naaninde lɔxɔni, e yi xuruseene kɔɛ raxaba Halagi Tiin Dangu Lɔxɔn Sanla fe ra. Nayi, Lewi bɔnsɔnna muxune nun saraxaraline yi yagi han, e yi e yɛtɛ dɛntɛgɛ Ala xa, e yi saraxa gan daxine ba Alatala Batu Banxini. 16 Birin yi a wali suxu alo e yi lan kii naxan yi, fata Alaa walikɛɛn Musaa sariyan na. Xuruseen naxanye ba saraxan na, Lewine yi lu ne wunla soɛ saraxaraline yii, e yi lu a xuyɛ saraxa ganden ma. 17 Muxu wuyaxi mi yi sariɲanxi yamaan yɛ, e mi nɔɛ saraxane bɛ Alatala xa. Nayi, Lewine yi lu xuruseene kɔɛ raxabɛ e xa Halagi Tiin Dangu Lɔxɔn Sanla fe ra. 18 Muxu wuyaxi yi na, Efirami kaane nun Manase kaane nun Isakari kaane nun Sabulon kaane yɛ naxanye mi yi sariɲanxi. Anu, e Halagi Tiin Dangu Lɔxɔn Sanla saraxa subene don nɛn, e sariyan kala na nan xɔn. Na ma, Xesekiya yi duba e xa, a naxa, "Alatala naxan fan, na xa diɲa e yulubin ma. 19 Ala xa diɲa muxune birin ma naxanye Alatala, e benbane Ala fenxi e bɔɲɛn ma feu, hali e mi yi sariɲanxi." 20 Alatala yi Xesekiya xuiin namɛ, a yi diɲa yamaan ma. 21 Nayi, Isirayila kaan naxanye yi Yerusalɛn yi, ne yi Buru Tetaren Sanla raba sɛwa gbeeni xi solofere. Lewi bɔnsɔnna muxune nun saraxaraline yi lu Alatala tantunɲɛ e sɛnbɛn birin na e maxaseene ra. 22 Xesekiya yi Lewine wali faɲi xɔntɔnna ti, naxanye yi walima Alatala xa ki faɲi. E saraxa subene don xi solofere, naxanye yi baxi bɔɲɛ xunbeli saraxane ra, e yi Alatala tantun, e benbane Ala.

23 Yamaan birin mɔn yi lan a ma, a e xa xi solofere sa sali lɔxɔne fari, e mɔn yi sanla raba sɛwani xi solofere, 24 bayo Yuda mangan Xesekiya bata yi binye gbeen fi yamaan ma, a yi e fanda tura wuli keden na e nun xuruse wuli solofere. Kuntigine fan bata yi tura wuli keden nun xuruse wuli fu ba sa mangan gbeene fari. Saraxarali wuyaxi bata yi rasariɲan. 25 Yuda kaane nun saraxaraline nun Lewine nun Isirayila kaan naxanye yi kelixi yire gbɛtɛye yi e nun xɔɲɛn naxanye yi dɔxi Isirayila kaane nun Yuda kaane yɛ, ne birin yi lu sɛwani e bode xɔn ma. 26 Sɛwa gbeen yi lu Yerusalɛn kaane yi. Xabu Isirayila Manga Dawudaa dii xɛmɛn Sulemani waxatini, na ɲɔxɔn munma yi liga Yerusalɛn yi singen. 27 Saraxaraline nun Lewine yi keli, e duba yamaan xa, e Ala maxandi, Ala yi e xuiin mɛ a konni ariyanna yi.

1 Ala yi a fala, a naxa,

"Xa muxuna nde a mɛ a ɲaxanla ra,

na ɲaxanla yi sa dɔxɔ xɛmɛ gbɛtɛ xɔn,

na xɛmɛn mɔn na ɲaxanla fenɲɛ ba?

Na mi findɛ fe xɔsixin na yamanani ba?

Ɛ tan bata suxure wuyaxi batu,

naxanye luxi n yɛɛ ra yi

alo ɛ yangane,

ɛ tan mɔn nɔɛ xɛtɛ n tan ma ba?"

Alatalaa falan nan na ra.

2 A mɔn yi a fala, a naxa,

"Ɛ yɛɛn ti geyane ra,

yiren mundun na

ɛ mi ala gbɛtɛne batuxi dɛnaxan yi?

Ɛ yi dɔxi nɛn kira xunne ma

alo ɲaxanla naxan a yangane legedenma,

alo sigatine tonbonni.

Ɛ bata yamanan naxɔsi

ɛ fe ɲaxine nun ɛ yalunya suxurene xɔn.

3 Nayi, n mi tinxi tulen yi fa,

ɲɛmɛn tulen mi faxi.

Koni, ɛ yɛtagin luxi alo yalundena,

ɛ tondima ɛ tiyɛ ɛ yagi feen na.

4 Iki, ɛ n xili,

ɛ naxa, ‘N fafe!

I tan nan yi nxu xɔyin na

nxu dii ɲɔrɛ waxatini!

5 I luma xɔlɔxi nxu ma

han waxatin mundun yi?

I luyɛ xɔlɔxi ba han habadan?’

Ɛ yi na nan falama,

koni, ɛ mɔn yi fe ɲaxin sifan birin ligama."

6 Alatala yi a fala n xa Manga Yosiyaa waxatini, a naxa, "I bata a to Isirayila kaane naxan ligaxi? E bata siga geyane birin fari e nun wudi gbeene birin bun, e sa kidene batu mɛnne yi alo yalunden naxan yanga wuyaxin suxi. 7 N yi laxi a ra nun, e yelin xanbini feni ito birin ligɛ, e xun xɛtɛma nɛn n ma. Koni, e mi e xun xɛtɛxi. Na ma, Isirayila magilɛn Yuda yanfantenna fan yi na to. 8 Hali n to n mɛxi Isirayila ra a yalunyane fe ra, n yi e ramɛ futu kala kɛdin so e yii, koni Yuda yanfantenna mi gaxuxi. Yuda kaane fan siga nɛn e sa suxurene batu alo yalunyana. 9 E yalunya kunfa gbeeni, Isirayila kaane bata yamanan naxɔsi, e yi yalunyaan liga e to e suxure gɛmɛ daxine nun e suxure wudi daxine batu. 10 Koni hali na birin, Yuda kaane mi e xun xɛtɛxi n ma e bɔɲɛn birin na, e yi wulen nan falama," Alatalaa falan nan na ra.

11 Alatala mɔn yi a fala n xa, a naxa, "Isirayilaa tinxintareyani, a tinxin dangu Yudaa yanfantenna xa. 12 Siga, i sa falani itoe ti sogeteden kɔmɛnna ma, i naxa,

‘Alatalaa falan ni ito ra.

Isirayila tinxintarena,

ɛ xun xɛtɛ!

N mi fa ɲaxuma ɛ ra sɔnɔn,

bayo n tinxin,

n mi luma xɔlɔxi habadan.

Alatalaa falan nan na ra.

13 Ɛ ti ɛ hakɛne ra tun,

bayo ɛ murutɛxi Alatala nan xili ma, ɛ Ala.

Ɛ yi ala xɔɲɛne batu wudi gbeene birin bun,

ɛ mi ɛ tuli mati n na.’ "

Alatalaa falan nan na ra.

14 Alatalaa falan ni ito ra, a naxa, "Dii murutɛxine, ɛ xɛtɛ n ma, bayo n tan nan ɛ kanna ra. N muxu keden sugandima nɛn taana nde yi, n yi muxu firin sugandi denbayana nde yi, n siga ɛ ra Siyon taani. 15 N yi yɛɛratine so ɛ yii naxanye bɔɲɛn luxi alo n bɔɲɛna, e yi lu ɛ xun na xaxilimayaan nun fe kolonni." 16 Alatalaa falan ni ito ra, a naxa, "Ɛ na wuya ayi waxatin naxan yi yamanani, Alatalaa Layiri Kankirana* fe mi fa falama na waxatini, muxune mi fa e mirima na ma sɔnɔn. A fe mi fa falama, a fe mi fa kolonma nayi, gbɛtɛye mi rafalama. 17 Na waxatini, a falama nɛn Yerusalɛn taan ma, a Alatalaa manga gbɛdɛna. Siyane birin fama nɛn a ma Alatala xinli Yerusalɛn yi. Nayi, e mi fa birama e bɔɲɛ yi fe ɲaxine fɔxɔ ra sɔnɔn e tengbesenyani."

18 "Na lɔxɔne yi, Yuda muxune nun Isirayila yamaan sigan tima nɛn e bode xɔn. E birin mɔn yi fa sa keli sogeteden kɔmɛnna yamanani, e fa yamanani n dɛnaxan so e benbane yii e kɛɛn na."

19 Ala mɔn yi a fala,

a naxa, "N mirixi a ma a

n xa ɛ yatɛ n ma diine ra,

n yi bɔxɔ faɲin fi ɛ ma,

dɛnaxan fan dangu siyane birin kɛɛn na.

N yi laxi a ra

a ɛ n xilima nɛn fafe,

ɛ mi fa ɛ xun xanbi soma n yi.

20 Anu, ɛ bata n yanfa,

ɛ tan Isirayila yamana

alo ɲaxalan yalunxina a xɛmɛn yanfama kii naxan yi!"

Alatalaa falan nan na ra.

21 Ala mɔn yi a fala, a naxa,

"Xuina nde minima geyane fari,

Isirayila kaane mayandi xuine.

E wugama bayo e bata kiraan beɲin,

e bata ɲinan Alatala xɔn, e Ala.

22 Muxu murutɛxine,

ɛ xun xɛtɛ,

n na ɛ furene dandanma nɛn."

Muxune yi a yabi, e naxa,

"Nxu tan ni i ra, nxu bata fa i ma,

bayo i tan nan Alatala ra, nxɔ Ala.

23 Ɲɔndin na a ra,

xuiin naxanye minima geyane ma kidene yi,

wulen nan ne ra.

Ɲɔndin na a ra,

Isirayila marakisin sɔtɔma Alatala nan yii, nxɔ Ala.

24 Yagin bata nxu benbane wanla kala

xabu nxu dii ɲɔrɛ waxatini,

e nun e xuruse xunxurine nun e ɲingene

nun e dii xɛmɛne nun e dii tɛmɛne.

25 Nxɔ yagin nan findixi nxu sa seen na,

nxɔ marafɛyaan yi findi nxɔ bitinganna ra,

bayo nxu bata yulubin sɔtɔ Alatala ra, nxɔ Ala,

nxu nun nxu benbane,

keli nxu dii ɲɔrɛ waxatin ma han to,

nxu mi nxu tuli mati Alatala xuiin na, nxɔ Alaa."