1 Dawudaa bɛtina, bɛti baane kuntigin xa. 2 A naxan ba Nabi Natan to fa a fɛma a yalunyaan ligaxina e nun Batiseba.

3 Ala, diɲa n ma i ya hinanna nin.

N ma matandine mafelu

i ya kininkinin gbeeni!

4 N hakɛne birin ba n ma.

I yi n yulubine xafari.

5 N na n ma matandine kolon.

N na n mirima n yulubine ma waxatin birin.

6 N na i tan nan keden yulubi tongoxi.

N naxan nabaxi,

na ɲaxu i yɛɛ ra yi.

Nanara, i na falan ti,

i tan nan tinxin,

i na kitin sa, i yoon sɔtɔ.

7 N barixi hakɛn nin yati!

Yulubi kanna nan yi n na

xabu nga fudikan na a ra.

8 I waxi ɲɔndin nan xɔn ma n sɔndɔmɛni yati!

I n xaranma fekolonna ma n bɔɲɛni.

9 N yulubin ba n ma

nanara n sariɲanɲɛ.

I xa n maxa nanara n fixɛ

dangu balabalan kɛsɛn na.

10 N mɔn xa sɛwa n ɲaxan.

I bɔɲɛn naxan kalaxi,

na mɔn xa sɛwa.

11 I yɛɛn ba n yulubine ra,

i yi n mafelu n hakɛne birin na.

12 Ala, bɔɲɛ sariɲanxin sa n yi.

I mɔn yi n xaxili ragidi.

13 I nama n kedi i yɛtagi.

I nama i ya Nii Sariɲanxin ba n yi.

14 I mɔn xa kisin sɛwan fi n ma.

Xaxili faɲin xa n mali.

15 Nanara, n matandi tiine xaranɲɛ

i ya kirane ma,

yulubi kanne yi xɛtɛ i ma.

16 N nakisimana, Ala,

n nakisi n ma faxa tixin ma.

Ala, yandi n xunba,

alogo n xa i ya tinxinyaan nali bɛtini.

17 Marigina, na liga n xa,

n xa i tantun.

18 Saraxan mi rafan i ma,

xa na mi a ra,

n yi a bama i xa nɛn nun.

Saraxa gan daxin mi i kɛnɛnɲɛ.

19 Yɛtɛ magodon nan Ala rafan saraxan na.

Ala, i mi na kanna rabeɲinɲɛ

naxan nimisaxi a bɔɲɛni a tubi.

20 Tin, i Siyon nasabati.

I mɔn xa Yerusalɛn yinna ti.

21 Na waxatini,

tinxin saraxane rafanma i ma nɛn.

Saraxa gan daxine yi i kɛnɛn.

Na waxatini,

nxu yi turane rali i xa i ya saraxa ganden fari.