Yaburin Sora 129

Ala maxandina Isirayila yaxune xili ma

1 Ala Batu Banxi yisiga bɛtina.

E n yɛngɛma xabu n dii ɲɔrɛ waxatini,

Isirayila kaane fan xa a fala, e naxa,

2 "E en yɛngɛma xabu en dii ɲɔrɛ waxatini,"

koni e mi en nɔ.

3 E bata n fanna makorondon,

alo xɛɛn bi daxina.

4 Koni Alatala tinxin,

a bata nxu nun muxu ɲaxine tagi bolon.

5 Muxun naxanye Siyon naɲaxuxi,

Ala xa ne yagixin naxɛtɛ.

6 E xa liga

alo sɛxɛn naxan solima banxin fari,

sogen yi a xara ayi.

7 Muxun naxan a xabama

hali yii fe kedenna a mi a sɔtɔma,

hali xidi kedenna

a raxidi muxun fan mi a sɔtɔma.

8 Dangu muxune mi a falama e xa,

e naxa, "Alatala xa barakan sa ɛ fe yi."

Hanma e naxa,

"Nxu dubama ɛ xa Alatala xinli."