1 Tantunna Alatala xa!

A lan tantun bɛtin xa ba en ma Ala xa.

Fe faɲin nan a tantunna ra e nun sɛwana.

2 Alatala mɔn Yerusalɛn tima nɛn.

A mɔn fama na muxu suxine ra nɛn

Isirayila kaan naxanye bata yi xuya ayi nun.

3 A muxune dandan

naxanye bɔɲɛye kalaxi.

A yi e maxɔlɔdene maxidi.

4 A tan nan sarene xasabin nagidima,

a yi e birin xili sa.

5 Nxu Marigin gbo,

a sɛnbɛn magaxu.

A xaxilimayaan dan mi na.

6 Alatala muxu limaniyaxine malima nɛn.

Koni a muxu ɲaxine rabirama nɛn bɔxɔni.

7 Ɛ barika bira bɛtin ba Alatala xa.

Ɛ tantun bɛtin ba en ma Ala xa bɔlɔnna ra.

8 A tan nan kundani fulunxi kore xɔnna ma.

A yi tulen nafa bɔxɔni.

A yi sɛxɛn nasoli geyane ma.

9 A xuruseene balon nagidi e ma.

A xɔline dɛge

e na e xui ramini a ma waxatin naxan yi.

10 Soo kɛndɛne xa mi a kɛnɛnma.

A mi sɛwama muxun sɛnbɛn fan na.

11 Koni naxanye gaxuxi Alatala yɛɛ ra,

e xaxili tixi a hinanna ra,

ne nan a rasɛwama.

12 Yerusalɛn kaane, ɛ Alatala binya.

Siyon kaane, ɛ Ala tantun.

13 Amasɔtɔ a bata taan so dɛɛn sɛnbɛ so,

a yi taa yi kaane baraka.

14 A tan nan bɔɲɛ xunbenla fima ɛ yamanan ma,

a balo faɲin fi ɛ ma.

15 A yi a dɛ xui tongoxine rafa bɔxɔn ma,

a falan yi siga ayi mafurɛn.

16 A kundani fulun

alo dugi fixɛna,

a ige xundin xuya bɔxɔn ma

alo xubena,

17 a balabalan kɛsɛn nagodo.

Nde nɔɛ a xunbenla raxanɲɛ?

18 Koni a falan ti nɛn,

ige xundin yi xuya ayi.

A foyen nafa, igene yi godo.

19 A yi a falane makɛnɛn Yaxuba bɔnsɔnna xɔn.

A bata tɔnne nun sariyane sɛbɛ Isirayila xa.

20 A mi na ɲɔxɔnna ligaxi siya gbɛtɛ yo xa.

E mi a sariyane kolon.

Tantunna Alatala xa!