Yaburin Sora 58

Ala nan kitisa tinxinxin na

1 Dawudaa maxandi ɲaxumɛna, bɛti baane kuntigin xa. A xa ba alo bɛtin naxan xili: "I Nama Halagin Ti."

2 Ɛ tan muxu gbeene,

ɛ falane mi tinxin feu!

Ɛ nɔɛ adamadiine makitɛ tinxinni ba?

3 Ɛn-ɛn de! Tinxintareyana ɛ bɔɲɛni,

ɛ gbalon nakelima bɔxɔn ma.

4 Xabu e bari waxatini, e ɲaxu.

Wuledene lɔxi ayi xabu e bari lɔxɔni.

5 E xɔlɛn luxi nɛn alo saɲin xɔlɛna,

alo fɔdɔgɔɔn naxan mi saɲi suxun xuiin mɛma,

6 naxan mi a kanna xuiin namɛma.

Saɲi suxun na fatan kiki,

a mi nɔɛ a suxɛ.

Bɛti xuini te.

7 Ala, i xa e ɲinne magira e dɛ!

Alatala, i xa na yatane dɛɛn kala!

8 E xa ɲan alo igen naxan bɔxɔnma.

E tanbane xa yelefu ayi.

9 E xa liga

alo korosiraan naxan fati tununma ayi lingini,

alo diin naxan faxaxi barixi, a mi sogen to.

10 Tansin xindena hanma a xarena,

ne ganma nɛn tunden bun.

Foyen ɲaxudene fan xalima nɛn,

a e raxɔri.

Bɛti xuini te.

11 Tinxin muxune ɲaxanma nɛn

bayo a gbeen ɲɔxɔma nɛn.

E fama e sanna maxadeni nɛn

muxu ɲaxine wunla ra.

12 Nayi, adamadiine yi a fala,

"Ala tinxin muxune saren fima yati!

Ala na yatigi, naxan dunuɲa makitima!"