28 Ke amaakemaana koo, sia Yisọs amaakediọọñọ ke afịd ñkpọ amaakweeñe, nọ ikọ Abasi e-ekewette asu, anye amaabo, "Itọñ ansat." 29 Atu ukọd fineka amaanaa akpere, ndin ammọ emaenyiin ndọbọ ke atu ado edot ke ñkọk hisọb enyan Yisọs ke ñkpọkinua. 30 Ke Yisọs amaakebọ ukọd ado, anye amaabo, "A-akweeñe." Ndin anye amaasuuk iwuod ke isọñ asaana ukpọñ amọ ayaak.

23 Ke mbon ekọñ emaekekọñ Yisọs ke krọs, ammọ emaesiak afọñidem amọ ke itie inaañ edat keedekeed, afọñ idakidem kpọd akesʌhọ Yisọs ke idem. Afọñ idakidem amọ akedo ifre keed tọọñọ ke anyọñ tutu asịm isọñ, ikinieghe itie e-ekesiaha ekịm ke ñkañ.

24 Ammọ emaebo emọ-emọ ete, "Yak ñnyịn ikiiwaak afọñ ami, ado yak isịn ukañ ise me anie idiinie."

Ñkpọ ami aketịppe nọ ato do ikọ Abasi e-ekewette asu:

"Ammọ emaedeeme mme afọñ mmi ke atu idem ammọ.

Enyʌñ esịn ukañ ebaña afọñidem mmi."

Se mbon ekọñ ekenam ake adodo.

25 Eka Yisọs, ayịneka eka amọ awonwaan, Mmeri anwaan Klopas ye Mmeri Makdalin mmọdo ekedudak ekpere krọs Yisọs. 26 Yisọs akewọññọ anyen akịt eka amọ naña ada ye mbed a-anye akenekkeke ama naña ada akpere, anye amaabo eka amọ, "Awonwaan, se ayịn mfo mi," 27 ndin amaanyʌñ abo mbed ado, "Se eka mfo mi." Tọọñọ ke idahado, mbed ado amaaben eka Yisọs anyọñ ufọk amọ.

33 Ke ini ammọ emaekesịm itie e-ekekoodo Ñkpọkpọrọ, ammọ emaekọñ anye ke krọs ye ndiọi awo iba ado, keed ke ubọk nnasia amọ, keed ke ubọk ufiin. 34 Yisọs amaabo, "Ete feen nọ ammọ, sia ammọ idiọọñọke se ammọ enam."* Ke emaekesịn ukañ, ammọ emaedeeme afọñ amọ.

35 Mbon awo emaeda ese, mme adaukara emaenyʌñ enọ anye inua ete, "Anye amaanyaaña mbon mfen, yak anye anyaaña idem amọ, akpedo anye ado Krais, Andimek Abasi."

36 Mbon ekọñ ñko emaenyʌñ enọ anye inua. Ammọ emaenọ anye fineka ete anwọñ, 37 enyʌñ ebo ete, "Akpedo afo ado adidem mme Yuu, nyaaña idem mfo ise."

38 Emaewet ñwed edian ke anyọñ itie a-anye akekọñọke, ete:

Ami ado Adidem mme Yuu.

39 Keed ke atu mme anam idiọọkñkpọ a-akekọñọke ye anye, amaasọñ anye anyen ate: "Idooho afo ado Krais? Nyaaña idem mfo nyʌñ inyaaña ñnyịn!"

40 Ado anam idiọọk anye ako amaasua anọ anye ate, "Nte afo ubaaha Abasi, sia afo abọọhọ ukem ufen? 41 Inọ ñnyịn ufen a-adotto ye idiọọkñkpọ ñnyịn. Ado ete ami idueghe ke usʌñ ndomokeed."

42 Ndin anye amaabo, "Yisọs, ntoiyo miin ke umaudʌk abioubọọñ mfo."

43 Yisọs amaabọọrọ anye ate, "Ami udọkkọ fiin akpanikọ, mfịn ami afo adiiba ye ami ke paradais."

33 Ke ñkanika duob mme iba uweemeayio, ekịm amaafʌk afịd isọñ tutu ñkanika ita uweemeayio. 34 Ndin ke ñkanika ita uweemeayio Yisọs amaabọñ ke akpọsọñ uyio ate, "Eloi, Eloi, lema sabaktani?" (a-awuọñọke, "Abasi mmi, Abasi mmi, nsoo inam nọ afo añkpọñ miin?")

51 Kpa ke idahado, afọñ ikpeghe tembịd amaasakka iba tọọñọ ke anyọñ tutu asịm isọñ. Isọñ amaanyeñ, mme itiad emaesaiya, 52 mme udi emaenyʌñ ekuumọ, ndin mme ikpọkidem uwak ndisana awo emaeset ke ñkpa. 53 Ammọ emaewuọñọ ke mme udi edi, ke ini Yisọs amaakeset ke ñkpa, enyʌñ ekewọt uwak awo idem ke adisana abio.

54 Sentudiọn ye mbon mfen e-ekekpemeke Yisọs ekekịt unyeñisọñ ye afịd se ikitịppe, ammọ emaekop akpọsọñ ndịk enyʌñ ebo, "Ke akpanikọ, awo ami akedo Ayịn Abasi!"

5 Ado ekekịm anye ke ntak ukwañido ñnyịn,

ekesọọk anye ke ntak ndiọiñkpọ ñnyịn;

ufen a-akebenne emem isọk ñnyịn akedoro anye ke idem,

ndin ato ke mme unan amọ ñnyịn ibọ edikọk.

6 Afịd ñnyịn, nte edọñ, imitịn usʌñ,

ñnyịn keedekeed imiwuọñọ ikeene usʌñ ñnyịn;

ndin Abọọñ adot anye

idiọọkñkpọ afịd ñnyịn.

7 Emaefiik anye enyʌñ ekuut anye,

kpayeado anye ikikʌppọke inua amọ;

emaeben anye nte ñyịn edọñ ekaa itie esiwotto unam,

ñko naña edọñ imiisisiooho uyio ke iso mbon se ikwaat anye ided,

kpa ntoro ñko anye ikikʌppọke inua amọ.

16 Mme ewa eñkanna miin ekʌk,

mme atu abʌd-abʌd awo eñkanna ekʌk;

ammọ eñkịm miin ubọk ye ukod.

17 Afịd akpọ mmi ewuọñọ edudak;

mme awo ewuuk anyen ense enyʌñ esaha.

18 Ammọ edeeme mme afọñ mmi ke atu idem ammọ

enyʌñ esịn ukañ ebaña afọñidem mmi.

7 Afịd mbon se iñkịt ensak esaha;

ammọ ensue, efuuñ iwuod.

8 Ammọ ete, "Anye abuọt idem ke Abọọñ,

yak Abọọñ anam anye abọkkọ.

Yak Abọọñ anyaaña anye,

sia anye akoppo inem ke Abọọñ."

13 Awo ndomokeed inieghe ima a-akponno akan ami: Awo adisaana uwem amọ ñyaak ke ntak mme ufan amọ.

16 "Sia Abasi akeneenekke ama ederimbod asịn anye akenọ ukweeñe Ayịn keed a-anye anieghe nọ awo akeedodo a-anịmme anye ke akpanikọ akuutak ado anie nsi-nsi uwem.

10 Sia adieke adooho ke ini ñnyịn ikikappa ido asua ye Abasi, ekenam emem ke ufọọd ñnyịn ye Abasi ato ke ntak ñkpa Ayịn amọ, kap se idahami ndin a-ñnyịn idooho keed ye anye, adinyaaña ñnyịn adiikpon die ito uwem amọ!

16 Ñnyịn idat ami idiọọñọ ima Abasi: Yisọs Krais amaayaak uwem amọ anọ ke ntak ñnyịn. Ñnyịn ñko, akpena iyaak uwem ñnyịn inọ ke ntak nditọeka ñnyịn ke Krais.

2 Anye ado uwa usioisob mme ndiọiñkpọ ñnyịn, ndin idooho ake ñnyịn ikpọọñ, ado ake afịd awo ke ederimbod.

8 Ndin sia ekekịtte anye nte awo,

anye amaasuuk idem

amọ anyʌñ asuuk iwuod tutu asịm ñkpa,

kpa ñkpa ke krọs.

9 Sia ñnyịn imidiọọñọ ke emaenam Krais aset ke ñkpa, anye ikemeke adikpa aba; ñkpa inieghe adudu ke idem amọ aba. 10 Ñkpa a-anye akekpaaha, anye akekpa akañ keed anọ idiọọkñkpọ afịd awo; ado uwem a-anye aduuho, anye adu anọ Abasi.

3 Nte ñnyịn idiọọñọke ke afịd ñnyịn i-imaikibọ uduọkmmọọñ ke Krais Yisọs imaibọ uduọkmmọọñ ñko idʌk ke ñkpa amọ? 4 Emaibuuk ñnyịn ñko ye anye ato uduọkmmọọñ ke ñkpa nọ ato do, naña ekenam Krais aset ke ñkpa ato ke ubọọñ Ete amọ, ñnyịn ñko idiinyʌñ idu ufa uwem.

27 Kpa naña ana nte awo akpa akañ keed kpọd ndin amaama anye ada ikpe, 28 kpa ntoro ke ekewaa Krais inikeed kpọd nọ aben ndiọiñkpọ uwak awo afep. Ndin anye ayaamaana adi ayọhọ akañ iba, idooho adidibiom idiọọkñkpọ, ado adididat adinyaaña nsọk mbon e-etieghe ebet anye.

22 "Nditọ Isrel ñnyịn, ikpañ utọñ ikop se ami ntañ inọọ ndufo: Yisọs a-aketooho Nasared akedo awo a-Abasi akebenne iwọt ndufo anwa-anwa ato ke mme utịppeñkpọ, mme ñkpọ ñkpaidem ye mme idiọọñọ a-Abasi akenamma ke ufọọd ndufo ato ke ubọk amọ, nte ndufo ke idem ndufo ediọọñọke. 23 Emaeyaak anye inọ ndufo ato ke uduak ye ubonoñkpọ a-Abasi akenieghe, ndin ato ke unwam mbon ibak, ndufo emaewot anye ke adikọñ ke krọs. 24 Ado Abasi amaanam anye aset ke ñkpa, anam anye abọkkọ ndutʌhọ ñkpa, sia ñkpa ikinieghe adudu adisịn anye ukad.

11 "Ami ndo eti akpemeedọñ. Eti akpemeedọñ ayaak uwem amọ anọ ke ntak mme edọñ.

26 Sia ini akeedodo a-ndufo etaaha uyo ami enyʌñ enwọñ kọọb ami, ndufo emesian ñkpa Abọọñ tutu anye atịmme adi.